السلام علیکم،

کہتے ہیں کہ تصویر سے باہر نکل کر تصویر کو ٹھیک طرح سے دیکھ سکتے ہیں۔ بندہ جب تک خود مسئلے کا حصہ ہو، اس وقت تک مسئلے کو پوری طرح سمجھ نہیں سکتا۔ یہ بات پوری طرح ٹھیک ہے یا نہیں، یہ ایک الگ بحث ہے۔ لیکن اسی مفروضے سے ملتے جلتے کچھ مشاہدات آپ کے ساتھ شئیر کرنا چاہتا ہوں۔ ویسے جہاں تک میں نے دیکھا، کچھ حد تک مجھے اس مفروضے میں سچائی نظر آئی۔

میرے ساتھ بھی ایسا ہی ہوا۔ 2006ء میں جب پاکستان سے متحدہ عرب امارات آیا تو بہت ساری ایسی باتیں معلوم ہوگئیں۔حیرت اس بات کی ہورہی تھی کہ یہ ساری باتیں پہلے میری نظروں سے کیوں اوجھل تھیں۔ اس بات کی گتھی اب تک سلجھا نہیں پایا کہ ایسا کیوں کر ہوتا ہے؟ جو باتیں پاکستان میں میرے مشاہدے میں تھیں، لیکن میں نے ان کو اہمیت نہیں دی، ان باتوں‌کی اہمیت پاکستان سے باہر آکر کیوں محسوس ہونے لگی ہے؟

میں اپنے آپ کو پاکستانی سمجھتا ہوں۔ زبان اور علاقے کی تقسیم در تقسیم میں کبھی نہیں پڑتا۔ کوشش کرتا ہوں کہ دوستوں میں گھل مل کے رہوں، اور ہم اپنی پہچان پٹھان، پنجابی، سندھی اور بلوچی کے طور پر نہ کریں، بلکہ مسلمان اور پاکستانی کے طور پر کریں۔ نیز اردو صاف بولنے کی وجہ سے اکثر لوگ مجھے کراچی کا سمجھتے ہیں۔ وہ تو جب بعد میں بات آگے بڑھتی ہے اور میں اپنا تعلق خیبر پختونخواہ سے بتاتاہوں تو ایک ذومعنی مسکراہٹ کا سامنا ہوتا ہے، “اچھا! تو آپ ہمارے پٹھان بھائی ہیں!!!” (زور لفظ پٹھان پر)۔

مجھے پاکستان میں کبھی اس بات کا شدت سے احساس نہیں ہوا کہ میری شناخت میری مادری زبان سے کی جارہی ہے، حالانکہ میں اپنے علاقے سے باہر رہا ہوں، میرے بہت سارے دوست کراچی اور پنجاب سے تعلق رکھتے ہیں۔ تو پھر یو اے ای میں ہی کیوں مجھے یہ بات محسوس ہورہی ہے؟ اور اس بات کا احساس دلانے والا کوئی اور نہیں، اپنے پاکستانی ہیں۔ شروع شروع میں میرے سامنے پٹھانوں کی 'عزت افزائی' کی جاتی۔ میں کسی بحث میں نہ پڑنے کی خاطر بات کو سنی ان سنی کردیتا۔ بات عموماً کسی پختون بھائی کی کسی حرکت سے شروع ہوتی۔ مثلاً، ایک بار اپنے ایک جاننے والے کے ساتھ جارہا تھا۔ سامنے شلوار قمیض میں ملبوس دو افراد جارہے تھے۔ وہ لوگ فٹ پاتھ کو چھوڑ کر سڑک پر جارہے تھے۔ میرا دوست کہنے لگا، 'دیکھو، جاہل پٹھان جارہے ہیں۔ فٹ پاتھ کس لئے بنے ہیں؟؟ جو یہ لوگ اپنی جہالت دکھا رہے ہیں؟' مزے کی بات یہ ہے کہ ہم دونوں خود روزانہ اسی راستے پر فٹ پاتھ چھوڑ کر سڑک پر چل کر جاتے۔  

2007ء میں لال مسجد کا واقعہ ہوا۔ جامعہ حفصہ میں زیرِ تعلیم بچیوں کی اکثریت کا تعلق خیبر پختونخواہ سے تھا۔ ٹی وی پر ان والدین کو دکھایا جارہا تھا، جو اپنے بچوں کی تلاش میں لال مسجد سے کچھ فاصلے پر انتظار کر رہے تھے، کچھ رو رہے تھے، کچھ کے چہرے فکر و یاس کی تصویر بنے ہوئے تھے۔ میرا دوست ان کو روتے ہوئے دیکھ کر ہنسنے لگا اور کہا، ' ان لوگوں کے ساتھ ایسا ہی ہونا چاہیئے۔' اب یہ بات واضح نہیں کہ میرے دوست کی نفرت کی وجہ وہ شلوار قمیض تھی، جو ان لوگوں نے پہن رکھی تھی، یا لال مسجد کے واقعات کا ردعمل۔

اس کے علاوہ بھی بہت سارے مواقع پر پٹھانوں کو اپنی نفرت کا نشانہ بنایا جاتا ہے۔ میں ایسے موقع پر خاموش رہنا بہتر سمجھتا ہوں۔ ایک بار تو حد ہوگئی۔ دوپہر کے کھانے پر ہم تین پاکستانی اور ایک انڈین ایک ساتھ بیٹھے کھانا کھا رہے تھے۔ پاکستان کے حالات پر بات ہورہی تھی۔ اپنے ایک کولیگ، جن کا تعلق حیدرآباد سے ہے، کہنے لگے، 'جب تک ایک بھی پٹھان زندہ ہے، پاکستان میں امن نہیں آسکتا۔ ان لوگوں کے ساتھ وہی سلوک کرنا چاہیئے جو کراچی کے لوگ کرتے ہیں۔ ' یہ باتیں سن کر ہمارے انڈین کولیگ نے میری طرف دیکھا، جیسے میری طرف سے جوابی حملے کا منتظر ہو۔ میں نے اگنور کرنا ہی مناسب سمجھا۔

اب ایسا بھی نہیں، کہ باقی لوگ مل کر پٹھانوں کی تضحیک کرتے ہیں، اور پٹھان سارے کے سارے شریف ہیں۔ میں خود اپنے پختون بھائیوں کی غلطیاں دیکھتا ہوں۔ تعلیم کی کمی ایسے حرکات کی بہت بڑی وجہ ہے۔ یہاں پر زیادہ تر ٹیکسی ڈرائیور پختون ہیں۔ جن کی احمقانہ حرکتیں زبان زد عام ہیں۔ تشویش کی بات یہ ہے کہ ان کی اگلی نسل بھی ٹیکسی ڈرائیور بن کر آرہی ہے۔ میں ان لوگوں کی حرکات کو کسی بھی طرح درست نہیں سمجھتا۔ لیکن اس بات کو بھی غلط سمجھتا ہوں کہ چند افراد کی حرکتوں کی وجہ سے پوری کمیونٹی کو برا بھلا کہا جائے۔ ملک میں بندہ کیسے بھی رہے، کم از کم ملک سے باہر تو اپنے ملک کی عزت کا خیال رکھے۔ یہ بات ہر فرد کے لئے ہے، چاہے وہ کسی بھی کمیونٹی سے تعلق رکھتا ہو۔

اللٰہ تعالیٰ ہمیں اتحاد و اتفاق نصیب فرمائے۔ آمین

__________________


http:// haroonazam.wordpress.com

ھارون اعظم کا بلاگ۔