خرم شہزاد خرم

[ترمیم] ہیں رقیبانہ بہم دست و گریباں گل و صبح
دعوئِ عشقِ بتاں سے بہ گلستاں گل و صبح

ہیں رقیبانہ بہم دست و گریباں گل و صبح

ساقِ گلرنگ سے اور آئنۂ زانو سے

جامہ زیبوں کے سدا ہیں تــہِ داماں گل و صبح

وصل آئینۂ رخاں ہم نفسِ یک دیگر

ہیں دعا ہاۓ سحر گاہ سے خواہاں گل و صبح

آئنہ خانہ ہے صحنِ چمنستاں تجھ سے ٭

بسکہ ہیں بے خود و وارفتہ و حیران گل و صبح

زندگانی نہیں بیش از نفسِ چند اسد

غفلت آرامئِ یاراں پہ ہیں خنداں گل و صبح

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔

٭ یہاں متن میں " تجھ سے" کو کاٹ کر موٹے قلم سے شکستہ خط میں " یکسر" تحریر کیا ہے۔ (حاشیہ از پروفیسر حمید احمد خان مرتبِ نسخۂ حمیدیہ)

[ترمیم] موۓ شیشہ کو سمجھتے ہیں خطِ پیمانہ ہم
بسکہ ہیں بدمستِ بشکن بشکنِ میخانہ ہم

موۓ شیشہ کو سمجھتے ہیں خطِ پیمانہ ہم

غم نہیں ہوتا ہے آزادوں کو بیش از یک نفس

برق سے کرتے ہیں روشن شمعِ ماتم خانہ ہم

بسکہ ہر یک موۓ زلف افشاں سے ہے تارِ شعاع

پنجۂ خورشید کو سمجھتے ہیں دستِ شانہ ہم

نقش بندِ خاک ہے موج از فروغِ ماہتاب *

سیل سے فرشِ کتاں کرتے ہیں تا ویرانہ ہم

مشقِ از خود رفتگی سے ہیں بہ گلزارِ خیال

آشنا تعبیرِ خوابِ سبزۂ بیگانہ ہم

فرطِ بے خوابی سے ہیں شب ہاۓ ہجرِ یار میں

جوں زبانِ شمع داغِ گرمئِ افسانہ ہم

جانتے ہیں جوششِ سوداۓ زلفِ یار میں

سنبلِ بالیدہ کو موۓ سرِ دیوانہ ہم

بسکہ وہ چشم و چراغِ محفلِ اغیار ہے

چپکے چپکے جلتے ہیں جوں شمعِ ماتم خانہ ہم

شامِ غم میں سوزِ عشقِ شمع رویاں سے اسد ٭٭

جانتے ہیں سینۂ پر خوں کو زنداں خانہ ہم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔

٭ اس مصرع پر " لا لا" لکھا ہے اور حاشیے موٹے قلم سے شکستہ خط میں اس کے بجاۓ مصرعِ ذیل تحریر کیا ہے: ہے فروغِ ماہ سے ہر موج یک تصویرِ خاک

٭٭ اس مصرع کا آخری حصہ بعد میں " سوزِ عشقِ آتشِ رخسار سے" بدلا گیا ہے۔ حاشیے میں موٹے قلم سے شکستہ خط میں یہ مقطع لکھا ہے:

دائم الحبس اس میں ہے لاکھوں تمنائیں اسد جانتے ہیں سینۂ پر خوں کو زنداں خانہ ہم (حواشی از پروفیسر حمید احمد خان)

[ترمیم] جانشینِ جوہرِ آئینہ ہے خارِ چمن
صاف ہے ازبسکہ عکسِ گل سے گلزارِ چمن

جانشینِ جوہرِ آئینہ ہے خارِ چمن

ہے نزاکت بس کہ فصلِ گل میں معمارِ چمن

قالبِ گل میں ڈھلی ہے خشتِ دیوارِ چمن

برشگالِ گریۂ عشاق دیکھا چاہیے

کھل گئی مانندِ گل سو جا سے دیوارِ چمن٭

تیری آرائش کا استقبال کرتی ہے بہار

جوہرِ آئینہ ہے یاں نقشِ احضارِ چمن

بس کہ پائی یار کی رنگیں ادائی سے شکست

ہے کلاہِ نازِ گل بر طاقِ دیوارِ چمن

الفتِ گل سے غلط ہے دعوئِ وارستگی

سرو ہے باوصفِ آزدی گرفتارِ چمن

وقت ہے گر بلبلِ مسکیں زلیخائی کرے

یوسفِ گل جلوہ فرما ہے بہ بازارِ چمن

وحشت افزا گریہ ہا موقوفِ فصل گل اسد

چشمِ دریاریز ہے میزابِ سرکارِ چمن

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔

٭ یہ شعر مرتب کے بقول قلمی مخطوطے کے متن کے بجاۓ حاشیے پر موٹے قلم سے شکستہ خط میں درج ہے۔ جویریہ مسعود

[ترمیم] دامنِ تمثال آبِ آئنہ سے تر نہیں
ضبط سے مطلب بجز وارستگی دیگر نہیں

دامنِ تمثال آبِ آئنہ سے تر نہیں

ہوتے ہیں بے قدر در کنجِ وطن صاحب دلاں ٭

عزلت آبادِ صدف میں قیمتِ گوہر نہیں

باعثِ ایذا ہے برہم خوردنِ بزمِ سرور

لخت لختِ شیشۂ بشکستہ جز نشتر نہیں

واں سیاہی مردمک ہے اور یاں داغِ شراب

مہ حریفِ نازشِ ہم چشمئِ ساغر نہیں

ہے فلک بالا نشینِ فیضِ خم گر دیدنی

عاجزی سے ظاہرا رتبہ کوئی برتر نہیں

دل کو اظہارِ سخن اندازِ فتح الباب ہے

یاں صریرِ خامہ غیر از اصطکاکِ در نہیں

کب تلک پھیرے اسد لب ہاۓ تفتہ پر زباں

طاقتِ لب تشنگی اے ساقئِ کوثر نہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔

٭ مفتی انوار الحق کے مطابق یہ مصرع متن میں پہلے یوں تھا: ہوتے ہیں بے قدر در گنجِ وطن صاحب دلاں (جویریہ مسعود)

[ترمیم] مردمک ہے طوطئِ آئینۂ زانو مجھے
ہم زباں آیا نظر فکرِ سخن میں تو مجھے

مردمک ہے طوطئِ آئینۂ زانو مجھے

یادِ مژگاں بہ نشتر زارِ صحراۓ خیال

چاہیے بہرِ تپش یک دست صد پہلو مجھے

خاکِ فرصت برسرِ ذاقِ فنا اے انتظار

ہے غبارِ شیشۂ ساعت رمِ آہو مجھے

اضطرابِ عمر بے مطلب نہیں آخر کہ ہے

جستجوۓ فرصتِ ربطِ سرِ زانو مجھے

چاہیے درمانِ ریشِ دل بھی تیغِ یار سے

مرہمِ زنگار ہے وہ وسمۂ ابرو مجھے

کثرتِ جور و ستم سے ہو گیا ہوں بے دماغ

خوبرویوں نے بنایا ہے اسد٭ بد خو مجھے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔

٭ اس مصرع میں " ہے اسد" کے لفظ کو کاٹ کر " غالب" لکھا گیا ہے۔ (حاشیہ از حمید احمد خان)

[ترمیم] پانی پیے کسو پہ کوئی جیسے وار کے
( اس غزل کے دو شعر اردو ویب کے نسخے میں 218 نمبر کے غزل میں درج ہیں ۔ جویریہ مسعود)

یوں بعدِ ضبطِ اشک پھروں گرد یار کے

پانی پیے کسو پہ کوئی جیسے وار کے

سیاب پشت گرمئِ آئینہ دے ہے، ہم

حیراں کیے ہوۓ ہیں دلِ بے قرار کے

بعد از وداعِ بہ خوں در طپیدہ٭٭ ہیں

نقشِ قدم ہیں ہم کفِ پاۓ نگار کے

ظاہر ہے ہم سے کلفتِ بختِ سیاہ روز

گویا کہ تختۂ مشق ہے خطِّ غبار کے

حسرت سے دیکھ رہتے ہیں ہم آب و رنگِ گل

مانندِ شبنم اشک ہے مژگانِ خار کے

آغوشِ گل کشودہ براۓ وداع ہے

اے عندلیب چل کہ چلے دن بہار کے

ہم مشقِ فکرِ وصل و غمِ ہجر سے اسد

لائق نہیں رہے ہیں غمِ روزگار کے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔ ٭٭ اس لفظ کی جدید املا تپیدہ ہے۔ جویریہ مسعود

[ترمیم] ناخنِ انگشت تبخالِ لبِ بیمار ہے
(اس غزل کے 6 شعر اردو ویب کے نسخے میں 174 نمبر غزل میں درج ہیں ۔ جویریہ مسعود)

بسکہ حیرت سے ز پا افتادۂ زنہار ہے

ناخنِ انگشت تبخالِ لبِ بیمار ہے

زلف سے شب درمیاں دادن نہیں ممکن دریغ

ورنہ صد محشر بہ رہنِ صافئِ رخسار ہے

در خیال آبادِ سوداۓ سرِ مژگانِ دوست

صد رگِ جاں جادہ آسا وقفِ نشتر زار ہے


جی جلے ذوقِ فنا کی نا تمامی پر نہ کیوں

ہم نہیں جلتے، نفس ہر چند آتش بار ہے

ہے وہی بد مستی ہر ذرّہ کا خود عذر خواہ

جس کے جلوے سے زمیں تا آسماں سرشار ہے

مجھ سے مت کہہ تو ہمیں کہتا تھا اپنی زندگی

زندگی سے بھی مرا جی ان دنوں بے زار ہے ٭٭٭


بس کہ ویرانی سے کفر و دیں ہوۓ زیر و زبر

گردِ صحراۓ حرم تا کوچۂ زنّار ہے

اے سرِ شوریدہ نازِ عشق و پاسِ آبرو

یک طرف سودا و یک سو منتِ دستار ہے

وصل میں دل انتظارِ طرفہ رکھتا ہے مگر

فتنہ تاراجی تمنا کے لیے درکار ہے

ایک جا حرفِ وفا لکھا تھا سو بھی مٹ گیا

ظاہرا کاغذ ترے خط کا غلط بردار ہے

خانماں ہا پائمالِ شوخئِ دعوٰی اسد

سایۂ دیوار سے سیلابِ در و دیوار ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔ ٭٭٭ یہ تینوں شعر اصل قلمی نسخے میں حاشیے پر موٹے قلم سے بد خط شکستہ میں لکھے ہوۓ ہیں ( حاشیہ از پروفیسر حمید احمد خان)

__________________

محمدعدنان

ماشا اللہ فوٹو ٹیک بھائی بہت اچھا کام ہے آپ کا
keep it up

خرم شہزاد خرم

شکریہ