امریکا میں حکمران نو قدامت پسند گروہ ایک نئے سیاسی جغرافیائی تذبذب کا شکار ہے کہ جنرل پرویز مشرف کی حکومت ختم ہوگئی تو کیا ہوگا۔
اس وقت ’’اس ماہ کا بحران‘‘ Crisis of the Month کے حوالے سے پاکستان ایران کی جگہ پر آگیا ہے۔ امریکا (بشمول اسرائیل) کو اس وقت ایران پر بمباری کرنے کا جنون سوار ہے اور یہ دونوں ممالک اتنی شدید بمباری کے خواہش مند ہیں کہ ایران کم از کم صنعتی دور سے پہلے کے دور میں‌ چلا جائے۔ ایران میں تیل کے دنیا کے سب سے بڑے ذخائر موجود ہیں اور امریکا ان ہی کے حصول کا خواہش مند ہے، وہ ایسی ٹیکنالوجی کے حصول پر بھی کام کر رہا ہے جو ایٹمی ہتھیار بنانے کےلئے استعمال ہوتی ہے۔ اسرائیل یہی سمجھتا ہے کہ ایرانی ٹیکنالوجی یہودی سلطنت کے خلاف ہی استعمال ہوگی اور یہی وجہ ہے کہ وہ ایرانی جوہری ٹھکانوں پر امریکا کے ساتھ مل کر کارروائی کرنے کا خواہاں ہے۔ دوسری جانب پاکستان کے پاس تیل نہیں‌ ہے لیکن اس کے پاس ایسے جوہری ہتھیار اور انہیں چلانے کا نظام موجود ہے جس کے ذریعے بحیرہ روم تک مار کیا جاسکتا ہے۔ امریکا کا منصوبہ ہے کہ وسط ایشیاء کے تیل کے ذخائر کو پائپ لائن کے ذریعے افغانستان اور پھر کراچی تک پہنچایا جائے اور یہی وجہ ہے کہ نیٹو کے 30 ہزار سے زائد فوجی افغانستان میں‌ اسلامی انتہا پسندوں سے لڑ رہے ہیں۔ (عراق کی طرح افغانستان پر بھی تیل کی وجہ سے ہی حملہ کیا گیا تاکہ پائپ لائن بچھانے کی راہ ہموار کی جا سکے۔ یہ ایک ایسا منصوبہ ہے جسے طالبان امریکا کی بجائے روس کے ساتھ شروع کرنا چاہتے تھے لیکن امریکا کے منع کرنے اور اس کے بعد طالبان کی جانب سے حکم عدولی کرنے پر امریکا نے افغانستان پر حملہ کیا)۔ اس لئے، لڑائی کی کسی بھی صورت میں‌ پاکستان انتہائی اہمیت کا حامل ہوگیا ہے اور اولین ترجیح بن چکا ہے۔
امریکا کے نئے قدامت پسند گروپ Neo-Con Cabal اس بات سے خوفزدہ ہے کہ پاکستان کے جوہری ہتھیار اور بیلسٹک میزائل کہیں‌ انتہا پسندوں، جو کہ اپنے فرقہ وارانہ مقاصد کے حصول کےلئے جنرل پرویز مشرف کی حکومت کا تختہ بھی الٹنا چاہتے ہیں، کے ہاتھوں میں نہ چلے جائیں۔ اس امریکی گروپ کا ماننا ہے کہ انتہا پسند پاکستان میں شرعی قوانین لاگو کرنے کے خواہاں ہیں۔ اس گروپ کو دوسرا خطرہ اس بات سے ہے کہ اگر پاکستان کے ہتھیار انتہا پسندوں کے ہاتھوں میں چلے گئے تو وہ کشمیر کے معاملے پر بھارت کو ہراساں کرنے کی کوشش بھی کر سکتے ہیں اور افغانستان میں موجود نیٹو کے مفادات کو بھی نقصان پہنچا سکتے ہیں اور ساتھ ہی ساتھ اسامہ بن لادن اور ایمن الظواہری کو ایک جگہ سے دوسری جگہ جانے کےلئے زیادہ سے زیادہ راستہ مل جائے گا۔ اس حوالے سے کیا کیا جائے:‌ معروف امریکی مصنفین فریڈرک کیگن اور مائیکل او ہین لون نے امریکی انتظامیہ کو مشورہ دیا ہے کہ وہ پاکستان کے لئے ایک ایسے فوجی آپریشن کی تیاری کی جائے جیسا عراقی صوبے الانبار اور دارالحکومت بغداد میں کیا گیا تھا۔ اپنے مشترکہ آرٹیکل میں‌ دونوں شخصیات نے مزید کہا ہے کہ امریکی فوج پاکستان میں آپریشن کرکے جوہری پروگرام کا کنٹرول حاصل کرلے اور بعد میں‌ پاکستانی جوہری مواد کو نیو میکسیکو یا ایسے ہی کسی دوسرے شہر میں‌ منتقل کردیا جائے۔ تاہم دونوں شخصیات نے اس بات کا بھی اعتراف کیا ہے کہ اس حوالے سے کی جانے والی کسی بھی کارروائی میں امریکا کے حامی پاکستانی بھی شاید امریکا کی حمایت نہ کریں۔ دونوں نے تجویز کیا ہے کہ پاکستان کے جوہری اثاثوں کی حفاظت کےلئے مامور تو پاکستانی سیکیورٹی اہلکاروں کو کیا جائے لیکن ان کی غیر ملکی اہلکار نگرانی کریں گے۔ دوسرا طریقہ یہ ہے کہ پاکستانی ایلیٹ فورسز کو ہی اس کام پر مامور کیا جائے اور ان کی حمایت جاری رکھی جائے تاکہ کنٹرول کسی اور کے ہاتھوں میں نہ جانے پائے۔ (شاید امریکا اس ہی پالیسی پر عمل پیرا ہے جس کا ثبوت امریکا کی جانب سے جنرل پرویز مشرف کی مستقل حمایت ہے) ۔ آرٹیکل میں کہا گیا ہے کہ جنرل پرویز مشرف پر دو بار خود کش حملہ ہوچکا ہے اور کسی حملے میں‌ ان کے قتل ہونے کی صورت میں بے نظیر بھٹو یا مڈل کلاس وکیل طبقے کے اقتدار میں آنے کے امکانات نظر نہیں آرہے لیکن اس بات کے امکانات زیادہ ہیں کہ پاکستان دو یا اس سے زائد حصوں میں تقسیم ہوجائے (اسے پاکستانی ڈس انٹی گریشن پلان کہا گیا ہے) جس میں‌ اسلامی انتہا پسند جتنا ہوسکے گا اتنے حصے پر کنٹرول کرلیں گے۔ آرٹیکل میں مزید کہا گیا ہے کہ پہلے پاکستان میں جاری تشدد کو ہمدردانہ پریشانی کی حد تک دیکھا جاتا تھا لیکن اب یہ امریکا کےلئے خطرہ بن چکا ہے یہ بالکل ایسا ہی خطرہ ہے جیسا پہلے امریکا کو سویت ٹینکوں سے لاحق تھا، ہمیں چاہئے کہ سفارتی اور سیاسی سطح پر خود کو محفوظ بنانے کےلئے کارروائیاں جاری رکھیں، اور سلسلے میں پاکستان ایک بہت بڑا ٹیسٹ ہوسکتا ہے۔