میں نے ایک دلچپسپ بات کچھ عرصہ پہلے پڑھی تھی کہ انگریز کا ایک اصول تھا کہ عوام کو بھوکے نہ مرنے دو ان کی بنیادی ضروریات کی اشیاء مہنگی نہ کرو ورنہ اگر عوام بھوکے مرنے لگے تو ان کا ہندوستان سے بوریا بستر گول کردیں گے۔ جتنی یونیورسٹیاں، کالجز، سکولز آج ہیں انگریز کے دور میں نہیں تھے لیکن عوام کو کھانے کو روٹی ملتی تھی یہی وجہ تھی کہ انگریز سوسال ہم پر حکومت کرگیا۔
لیکن قیام پاکستان کے بعد حکمران نہ عوام کو روٹی دے سکے، نہ تعلیم دے سکے اور نہ ہی دوسری بنیادی ضروریات پوری کرسکے۔ یہی وجہ ہے کہ عوام میں احساس محرومی پیدا ہورہی ہے۔ احساس محرومی کسی بھی ملک کے لئے زہرقاتل ہے۔ احساس محرومی ہی ہے کہ عوام سمجھتی ہے کہ اس ملک کی کسی چیز پر ان کا کوئی حق نہیں۔
سیاستدانوں نے عوام کو احساس محرومی کے علاوہ عوام کو تقسیم در تقسیم کرکے رکھ دیا ہے۔ عوام میں فرقہ پرستی، صوبائی تعصب ابھارا گیا۔ عوام کو ذات برادریوں میں تقسیم کرکے رکھ دیا گیا۔ ہمارے تعلیمی نظام نے بھی عوام کو تقسیم کرکے رکھ دیا گیا۔ امیر کا بچہ آکسفورڈ کا نصاب پڑھ رہا ہے۔ غریب کا بچہ فرسودہ سرکاری نصاب جو اسے کلرک یا نائب قاصد سے اوپر ترقی نہیں دے سکتا۔ جس کے پاس سکول کے پیسے نہیں وہ یا تو مدرسہ میں پڑھتا ہے یا پھر کسی ورکشاپ میں چھوٹو بن جاتا ہے اور پھر یہی چھوٹو اپنے استاد سے کام کے ساتھ ساتھ گالیاں اور بدزبانی سیکھتا ہے۔ سکول کا بچہ احساس کمتری کا شکار رہتا ہے۔ امیر، سیاستدان کا بچہ آکسفورڈ میں پڑھ کر اپنےاندر اکڑ پن، تکبر لے آتا ہے اور اپنے‌آپ کو دوسروں سےبرتر سمجھتا ہے۔ مدرسے کا بچہ اپنے استاد کی ہر بات کو حرف آخر سمجھتا ہے۔ اگر استاد اسے مذہبی منافرت سکھائے تو وہ بھی مذہبی منافرت کا شکار ہوجاتا ہے۔ اگر اسے کسی خاص فرقے کے خلاف ابھارا جائے تو وہ ابھر جاتا ہے۔ وہ جب مدرسے سے فارغ ہوتا ہے تو اسے کوئی سرکاری نوکری، پرائیویٹ نوکری نہیں ملتی بڑی حد تک اسے کسی مسجد میں امامت مل جاتی ہے اور وہ چندے کی رقم سے اپنا گھر چلانے پر مجبور ہوجاتا ہے۔ ہمارے ہاں رواج ہے کہ فزکس، ریاضی کے استاد کو تو پانچ چھ ہزار روپے دے دئیے جاتے ہیں لیکن قرآن پاک پڑھانے والے کو ڈیڑھ سو روپے دیکر سمجھا جاتا ہے کہ اس پر بڑا احسان کیا ہے۔

اس ملک میں امیر کا بچہ، مدرسے کے بچے، چھوٹو، سکول کے بچے سے برتر سمجھاتا جاتا ہے اور یہ سمجھاجاتا ہے کہ اس ملک پر حق ہی امیروں کا ہے۔

عوام کو گدھا (معذرت کے ساتھ) بنادیا گیا ہے جس پر بجلی، گیس، پانی کا بوجھ لاد دیا گیا ہے۔ وہ جو بھی چیز خریدتا ہے اس پر ٹیکس بھی دیتا ہے۔ وہ سالہا سال ریڑھی لگا کر اپنے بچوں کے لئے روٹی کماتا ہے پھر اچانک خادم اعلٰٰی کو جوش آتا ہے تو وہ ساری ریڑھیاں الٹ پلٹ‌کرادیتا ہے۔ ایک شخص جو ایمانداری سے اپنی نوکری کرنا چاہتا ہے تو اسے مجبور کیا جاتا ہے کہ وہ اعلٰٰی لوگوں کے برے کام بھی کرے اگر نہیں کرتا تو وہ اپنی نوکری سے ہاتھ دھو بیٹھتا ہے یا اپنے لئے مسائل کھڑے کرادیتا ہے۔

جب لوگ سڑک پار کرنے کی کوشش کرتے ہیں تو سڑک پار کرتے ہوئے کئی منٹ‌لگ جاتے ہیں کیونکہ گاڑیوں والے اور موٹر سائیکلوں والے یہ نہیں دیکھتے کہ کس نے سڑک پار کرنی ہے اور وہ اپنی ہی رفتار سے گاڑی چلاتے رہتے ہیں اور سڑک پار کرنیوالے کو یا تو بھاگ کر سڑک پار کرنا پڑتی ہے یا کسی نہ کسی طریقے سے گاڑیوں کے دوران سڑک پار کرنے میں کامیاب ہوجاتے ہیں۔ یہاں جو شخص گاڑی چلاتا ہے وہ ساری سڑک کو اپنی ملکیت سمجھتا ہے وہ کسی پیدل شخص کو اتنا موقع فراہم نہیں کرتا کہ وہ سڑک پار کرسکے۔

عوام جب پرامن ہوکر بھی سڑکوں پر آتی ہے تو اس پر پولیس لاٹھیاں برسانا شروع کرتی ہے پھر اس کا ردعمل یہ ہوتا ہے کہ عوام بھی جواب میں ہاتھا پائی شروع کردیتے ہیں۔ اشتعال میں آکر گاڑیاں، سرکاری املاک توڑ دی جاتی ہیں۔


عوام میں‌غصہ اور نفرت بڑھتی جارہی ہے۔ جب بھی انہیں موقع ملتا ہے تو یہ سب کچھ تہس نہس کرکے آگے بڑھتے جاتے ہیں۔ اگر یہ لوگ واپڈا کے دفاتر یا گاڑیوں کو آج آگ لگاسکتے ہیں توکل کلاں ان کی ہمت انتی بڑھ سکتی ہے کہ یہی لوگ کسی وزیر، سرکاری بابو یا سیاستدان کے گھر کو بھی آگ لگاسکتے ہیں۔ یہ لوگ اگر گاڑیوں، دفاتر کو جلاجلا کر اتنی ہمت پیدا کرنے میں کامیاب ہوگئے کہ کسی بھی وزیر، بیوروکریٹ یا سیاستدان کی فیکٹری، گھر یا گاڑی کو توڑنے، لوٹنے یا جلانے میں کی ہمت پیدا کرگئےتو یہ بہت الارمنگ ہے۔

وہ دن زیادہ دور نہیں جب کسی شخص کو گالی دینا پڑے تو اسے سیاستدان کہہ کر مخاطب کیا جائے گا۔ سیاستدان اپنی وقعت اتنی تیزی سے کھورہا ہے کہ سیالکوٹ میں خواجہ آصف کو جوتے دکھائے جاتے ہیں اور ان کے سامنے ہی نواز شریف مردہ باد کے نعرے لگائے جاتے ہیں۔ پیپلزپارٹی کے خلاف نعروں میں زرداری **** ہائے ہائے کے نعرے لگتے ہیں اور یہ ٹی وی پر بھی دکھائے جاتے ہیں۔

__________________
حکمران کے محبوب ہونے اور فرعون بننے میں رویے کا فرق ہے۔