ایران اور امریکہ کی باہمی مخاصمت کے باوجود صدر اسلامی جمہوریہ ایران، محمود احمدی نژاد کے اس غیر مبہم بیان کو نظر انداز نہیں کیا جا سکتا کہ ”امریکہ پاکستان کے ایٹمی اثاثے تباہ کرنے کے منصوبے بنا رہا ہے“۔
یہ کوئی ایسا چونکا دینے والا انکشاف بھی نہیں جس سے اہل پاکستان کی رگوں میں سنسنی کی لہر دوڑ گئی ہو۔ خود امریکی ایک مدت سے ہمارے ایٹمی اثاثوں کے بارے میں ”گہری تشویش“ کا اظہار کر رہے ہیں۔ انہیں خدشہ ہے کہ کسی بھی وقت انتہا پسندوں کے ہاتھ ہمارے ایٹمی ہتھیار پہنچ جائیں گے، جنہیں وہ اپنی سائیکلوں، موٹر سائیکلوں، برسوں پرانی پھٹیچر گاڑیوں پر نصب کر کے ساری دنیا کو بھسم کر ڈالیں گے۔
لیکن کسی ذمہ دار ریاست کے انتہائی اہم منصب پر فائز شخص کی طرف سے ایسے دو ٹوک بیان کو سنی ان سنی کے انداز میں پس پشت ڈال دینا بھی کار دانشمنداں نہیں۔
تہران میں ایک پریس کانفرنس سے خطاب کرتے ہوئے صدر احمدی نژاد نے کہا کہ ”امریکہ پاکستان کے ایٹمی اثاثے تباہ کرنا چاہتا ہے اور ہمارے پاس اس بات کے ٹھوس شواہد موجود ہیں۔
امریکہ کا مقصد یہ ہے کہ وہ پاکستان کی حکومت اور عوام کو کمزور و ناتواں کر کے عملاً پاکستان پر اپنا کنٹرول حاصل کر لے۔ امریکہ، اقوام متحدہ اور اسی طرح کے دوسرے بین الاقوامی اداروں کو لیور کے طور پر استعمال کرتے ہوئے زمین ہموار کرے گا اور پاکستان میں وسیع پیمانے پر اپنی موجودگی کا جواز پیدا کرتے ہوئے اس کی آزادی و خودمختاری کو مفلوج کر دے گا“۔
اسی پریس کانفرنس کے دوران احمدی نژاد نے امریکی کردار پر کڑی تنقید کرتے ہوئے کہا کہ ”پچھلی امریکی انتظامیہ نے اپنے چہرے پر ایک نقاب چڑھا رکھا تھا اور نئی امریکی انتظامیہ نے بھی ایک نقاب چڑھا رکھا ہے۔ پچھلی انتظامیہ نے ایک ”متشددانہ اسلام“ دنیا میں متعارف کرایا اور موجودہ انتظامیہ ایک ”لبرل اسلام“ کا جھنڈا اٹھائے ہوئے ہے۔
یہ دونوں دراصل ”امریکی اسلام“ ہیں۔ یہ ”امریکی اسلام“ امریکہ اور یہودیوں کی بالادستی چاہتے ہیں اور صرف ان ہی کے مفادات کی راہوں پر چلتے ہیں۔ ساری دنیا جانتی ہے کہ گزشتہ کئی عشروں سے مسلط جنگیں، دہشت گردی، قتل و غارت گری اور آمریتیں، دراصل امریکہ اور اس کے اتحادیوں کی عالمی بالادستی کے حصول کی کوششوں کا نتیجہ ہیں۔
نئی امریکی انتظامیہ نے بھی اپنا سامراجی تسلط قائم کرنے کی پالیسیوں میں کوئی تبدیلی نہیں کی۔ صرف نعرے بدل ڈالے ہیں اور طریقہٴ واردات تبدیل کر دیا ہے۔
امریکہ میں یہ ڈرامے تخلیق کرنے والی اصل طاقتیں پردے کے پیچھے چھپی ہیں اور پردوں کے سامنے نظر آنے والے دراصل پس پردہ قوتوں کے عزائم میں رنگ بھرنے والے ایجنٹ ہیں۔
حال ہی میں ہم نے دیکھا کہ بقول امریکیوں کے انہوں نے ایک شخص (اسامہ بن لادن) کو پکڑا اور پھر اس کی لاش کو سمندر میں پھینک دیا۔ یہ وہی شخص ہے جو سابق امریکی صدر کے خاندان کا، تیل کے کاروبار میں شراکت دار تھا۔ ہماری معلومات کے مطابق اس شخص کو برسوں حراست میں رکھا گیا۔ اسے بیماریوں میں مبتلا کر کے مار دیا گیا اور اب انہوں نے یہ دعوے اس لئے کئے کہ الیکشن سر پر ہے اور وہ جیتنا چاہتے ہیں۔
اس اہم سوال کا جواب نہیں آ رہا کہ انہوں نے اس کی لاش سمندر میں کیوں پھینک دی؟ صرف اس لئے کہ نعش کا پوسٹ مارٹم امریکیوں کے بہت سے بھید نہ کھول دے“۔
گزشتہ روز ہی دوہا سے آنے والی ایک خبر کے مطابق سوڈان کے سابق نائب وزیر اور ایک اہم سیاسی راہنما جلال الدین عبدالمجید الکریم نے کہا کہ ”امریکہ کی نظریں پاکستان کے جوہری اثاثوں پر ہیں اور وہ انہیں ختم کرنا چاہتا ہے۔ پاکستان اسلام کا قلعہ ہے جس کی حفاظت تمام اسلامی ممالک پر لازم ہے۔ مجھے یاد ہے کہ ذوالفقار علی بھٹو کے دور میں امریکہ نے پاکستان کو اپنے جوہری اثاثے ظاہر کرنے کے لئے کہا تھا، لیکن پاکستان نے اس امریکی دھمکی کو نظر انداز کر دیا تھا۔ اس کے بعد سے امریکہ جو کچھ پاکستان میں کر رہا ہے یا کروا رہا ہے، اس کینظریں پاکستان کے ایٹمی اثاثوں پر ہیں“۔
گزشتہ روز ہی وزیراعظم یوسف رضا گیلانی نے پُریقین انداز میں کہا ہے کہ ”کسی کو اس بارے میں کوئی غلط فہمی نہیں ہونی چاہئے کہ ہمارے ایٹمی اثاثے محفوظ ہیں۔ ہمارے دشمن ایٹمی اثاثوں تک رسائی تو دور کی بات ہے، اُن پر ناپاک نگاہ بھی نہیں ڈال سکتے۔ ہماری خودمختاری اور ملکی سرحدوں کو خطرہ درپیش ہوا تو منہ توڑ جواب دینے کی بھرپور صلاحیت رکھتے ہیں۔“
حکومت وقت سے ہزار اختلافات اور مسلح افواج کی بعض پالیسیوں پر گرفت کے باوجود دو باتیں پورے یقین و اعتماد کے ساتھ کہی جاسکتی ہیں اور پوری قوم بھی ان کے حوالے سے یکسو ہے ایک یہ کہ ایٹمی اثاثے عالمی معیار سے بھی زیادہ محکم، کمانڈ اینڈ کنٹرول سسٹم کے تحت ہیں اور دوسری یہ کہ کسی بھی انتہا پسند یا دہشت گرد کی ان اثاثوں تک رسائی حد امکان میں نہیں۔
لیکن ان دو باتوں کے ساتھ ساتھ ایک تیسری ناقابل تردید حقیقت یہ ہے کہ امریکہ اور اس کے مدار میں گردش کرتے سیارچوں نے آج تک پاکستان کو ایک ایٹمی قوت کے طور پر قبول نہیں کیا۔ اسرائیل اور بھارت ایڑی چوٹی کا زور لگا رہے ہیں کہ پاکستان کو بے دست و پا کرکے عالمی ڈھورڈنگروں کی چراگاہ بنا دیا جائے۔
اب تک لاتعداد شواہد سامنے آچکے ہیں۔ خود امریکیوں کے بیانات اور اُن کے تھنک ٹینکس کی رپورٹس کا مجموعہ مرتب کیا جائے تو اندازہ ہو جائے گا کہ امریکی کدورت کا عالم کیا ہے۔
کئی بار تذکرہ کر لینے کے بعد بھی کنڈو لیزا رائس کے اس بیان کا حوالہ پرانا نہیں لگتا کہ ”ہم نے پاکستان کے ایٹمی اثاثوں کے بارے میں ایک ہنگامی پلان تیار رکھا ہے۔“
ایک فتنہ ساماں ٹاسک فورس کی افغانستان میں موجودگی بھی کوئی نہ کوئی معنی ضرور رکھتی ہے۔ ابھی دو ہفتے قبل نیٹو کے سیکرٹری جنرل ایڈرس فاگ راسموسین نے کہا تھا۔“ مجھے یقین ہے کہ پاکستان کے ایٹمی ہتھیار محفوظ ہیں اور ان کی اچھی طرح حفاظت کی جارہی ہے لیکن بہرحال یہ ہمارے لئے تشویش کا ایک موضوع ہے اور ہم گہری نظر سے سب کچھ دیکھ رہے ہیں۔“
پاکستان کی ہزار کوششوں کے باوجود نہ تو امریکا اور اس کے اتحادیوں کی یہ تشویش ختم ہورہی ہے اور نہ ہی ہمارے ایٹمی اثاثوں پر جمی ”گہری نظریں“ دائیں بائیں ہٹ رہی ہیں۔
اب تک امریکا نے ایٹمی پروگرام سے رشتہ و تعلق رکھنے والوں کو معاف نہیں کیا۔ پروگرام کے بانی ذوالفقار علی بھٹو کو نمونہ عبرت بنا دیا گیا۔
پروگرام کی تعمیر میں سب سے نمایاں کردار ادا کرنے والے جنرل محمد ضیاء الحق کو بھسم کر دیا گیا۔
دھمکیوں کے باوجود ایٹمی دھماکے کرنے والے نواز شریف کے گرد سرخ دائرہ لگا دیا گیا او ر وہ ناقابل معافی قبیلے کا فرد ہوگیا۔ ڈاکٹر عبدالقدیر خان کو اپنے اشاروں پر ناچنے والے مکا باز کمانڈو کے ذریعے سربازار رسوا کرکے عملاً قید میں ڈال دیا گیا۔
یہ ساری کہانی ہمارے سامنے ہے۔ ہم جیسوں کی باتوں کو ”غیرت بریگیڈ“ کی فتنہ پردازی کہہ کے رد کر دیا جاتا ہے۔ ہیلری کلنٹن بھی کہہ گئی ہیں کہ سازشی تھیوریوں سے باز آجاؤ۔ لیکن جب حالات و واقعات صاف اشارا کر رہے ہیں جب پاکستان کے عوام کے دل کسی انہونی کے خوف سے لرز رہے ہیں، جب پاکستانی وزیراعظم کو ایٹمی اثاثوں کے بارے میں ایک کڑا بیان جاری کرنے کی ضرورت محسوس ہورہی ہے اور جب احمدی نژاد جیسا ذمہ دار شخص کہہ رہا ہے کہ ایران کے پاس ٹھوس شواہد موجود ہیں تو پھر ہمیں صورت حال کی سنگینی کا احساس ہونا چاہئے
اور کسی بھی ممکنہ افتاد کا سدباب کرنے کے لئے تمام ضروری اقدامات میں لمحہ بھر کی تاخیر نہیں کرنی چاہئے۔ فوری طور پر ایران سے رابطہ کرکے احمدی نژاد کے بیان کے محرکات اور متذکرہ ٹھوس شواہد کا جائزہ لینا چاہئے۔
امریکہ پہلی یلغار یقینی طور پر سفارتی محاذ سے کرے گا اور اقوام متحدہ، ایٹمی توانائی ایجنسی اور ایسے ہی دوسرے ادارے اس کے اہم مورچے ہوں گے۔ کیا ہم اس یلغار کے دفاع کے لئے تیار ہیں؟
جناب وزیراعظم نے ”دشمن کی ناپاک نگاہوں“ کا ذکر کیا ہے لیکن اُن دوستوں کی نگاہوں کو کیا نام دیا جائے جو پاکستان میں چار سو دندنا رہے ہیں اور جو کسی بھی وقت کچھ بھی کر گزرنے کی صلاحیت حاصل کرچکے ہیں۔

__________________
(اے پروردگار) ہم تیری ہی عبادت کرتے ہیں اور تجھ ہی سے مدد مانگتے ہیں