سپریم کورٹ بار ایسوسی ایشن کے صدر اور پیپلز پارٹی کے رہنما بیرسٹر اعتزاز احسن کی نظربندی کے سلسلے میں نئے احکامات جاری کردیئے گئے ہیں جن کا مدت ایک ماہ ہے۔
اعتزاز احسن کی اہلیہ بشریْ اعتزاز نے بی بی سی سے گفتگو کرتے ہوئے اس بات کی تصدق کی کہ حکومت پنجاب نے ان کے شوہر کی نظربندی میں توسیع کے نئے احکامات جاری کردئیے ہیں۔ ان کے بقول اعتزاز احسن کی نظربندی کے پہلے احکامات وفاقی حکومت کی جانب سے جاری کئے گئے تھے۔

انہوں نے کہا کہ وفاقی حکومت کے احکامات کی معیاد دو دسمبر کو ختم ہونے پر پنجاب حکومت کی طرف سے نظربندی کے نئے احکامات جاری کئے گئے ہیں جن کے مطابق اعتزاز احسن کو مزید ایک ماہ کے لیے نظر بند کردیا گیا ہے۔

بشریْ اعتزاز کے مطابق امریکی سفیر اعتزاز احسن سے ملاقات کے لیے تین نومبر کو ان کے رہائش گاہ پر آرہی ہیں۔

ملک میں ایمرجنسی کے نفاذ کے فوراً بعد گرفتار کیے گئے وکلاء میں اعتراز احسن بھی شامل ہیں۔ ان کو اسلام آباد سے اُس وقت گرفتار کیا گیا تھا جب وہ اپنے گھر میں ایک پریس کانفرنس سے خطاب کررہے تھے۔

اعتزاز احسن کو گرفتار کرنے کے بعد ایک ماہ کے لیے اڈیالہ جیل میں نظربند کردیا گیا۔ تاہم عام انتخابات میں لاہور کے انتخابی حلقہ سے کاغذات نامزدگی جمع کرانے کے لیے ان کو چوبیس نومبر کی رات کو اڈیالہ جیل سے لاہور ان کی رہائش گاہ پر منتقل کردیا گیا تھا اور ان کے گھر کو سب جیل قرار دے دیا گیا۔

اعتزاز احسن کی نظربندی کی معیاد اتوار کو ختم ہورہی تھی لیکن ان کو رہا کرنے کے بجائے محکمہ داخلہ کی جانب سے ان کی نظربندی کے احکامات میں ایک ماہ کی توسیع کردی گئی ہے۔

دوسری طرف اعتزاز احسن کی رہائی کے لیے ان کی اقامت گاہ کے باہر مظاہروں کا سلسلہ جاری ہے۔ اتوار کے روز امریکہ کی ایک این جی او کوڈپنک کے ارکان اور پاکستانی وکلاء رہنماؤں نے ایک احتجاجی مظاہرہ کیا اور اعتزاز کے نظربندی کے خلاف نعرہ بازی کی۔

بشکریہ بی بی سی