عالمی سطح پر انسداد منشیات کےلئے امریکی ادارے کے سابق عہدیدار تھامس سیویچ نے نیو یارک ٹائمز میں ایک آرٹیکل تحریر کیا ہے جس کا لب لباب یہ ہے کہ امریکا نے افغانستان کو منشیات کی چیمپئن ریاست بننے میں مدد دی اور اس معاملے میں افغان صدر کا بھی کچھ کردار ہے۔ آئیے آرٹیکل تحریر کرنے والے کی ہی زبانی ٹرانسلیشن پڑھتے ہیں:
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــ
”یہ یکم مارچ 2006ءکا دن تھا، میں پہلی بار افغانستان کے صدر حامد کرزئی سے ملاقات کر رہا تھا۔ کابل کا موسم صاف شفاف تھا۔ افغان صدر نے امریکی صدر، ان کی اہلیہ، وزیر خارجہ کونڈولیزا رائس اور امریکی سفیر رونلڈ نیومن کے ہمراہ امریکی سفارتخانے کا افتتاح کیا۔ افغانستان کےلئے امریکی لوگوں نے جو کچھ بھی کیا تھا اس پر افغان صدر نے انکا شکریہ ادا کیا۔ میں اس وقت انسداد منشیات کے اعلیٰ افسر کی حیثیت سے ایک ایسے ملک ؛ افغانستان پہنچا تھا جس نے دنیا کو 90 فیصد ہیروئن فراہم کی تھی۔ اس وقت میں نے افغان صدر حامد کرزئی کے منشیات کے خاتمے کے عزم سے متعلق الفاظ کو سچ سمجھ بیٹھا تھا۔ وہ میری پہلی غلطی تھی “۔
آنے والے 2 برسوں میں مجھے معلوم ہوا کہ افغان حکومت کس قدر امریکا کی بنائی گئی پالیسیوں سے منشیات کے کاروبار کو تحفظ دینے میں ملوث ہے۔ ایک طرف یہ بات بالکل درست ہے کہ کرزئی کے دشمن یعنی طالبان منشیات کے ذریعے ہی اپنی مالی ضروریات پوری کرتے ہیں، لیکن دوسری طرف حامد کرزئی کے حامی بھی ایسا ہی کرتے ہیں۔ ٹھیک اسی وقت ہماری اپنی وزارت دفاع نے بھی نیٹو سے تعلق رکھنے والے ہمارے کچھ اتحادیوں کی طرح پوست کی کاشت کےخلاف کی جانےوالی کارروائیوں کےخلاف مزاحمت بھی کی ہے، یہ چاہتے ہیں کہ ایک بار یہ جنگ ختم ہوجائے تو اس کاروبار کو بھی دیکھ لیں گے۔ مسئلہ یہ ہے کہ جب تک منشیات ختم نہیں ہونگی اور کابل حکومت اپنا کنٹرول برقرار رکھنے کےلئے پوست پر انحصار کرتی رہے گی، اس وقت تک طالبان بھی اپنی مالی ضروریات یہیں سے پوری کرتے رہیں گے اور ممکنہ طور پر یہ جنگ جاری رہے گی۔
اس بات کا بالکل امکان نہیں تھا کہ ایسا ہوگا۔ این پیٹرسن کے نائب وزیر خارجہ برائے امورِ عالمی انسداد منشیات بننے پر میں نے یکم دسمبر 2005ءکو ان کےلئے ایک بریفنگ میں شرکت کی تھی۔ میری طرف متوجہ ہوکر انہوں نے کہا کہ یہ ہم نے خود کو کس معاملے میں ڈال دیا ہے؟ اس وقت ہمیں یہ معلوم ہوا کہ ایک لاکھ 65 ہزار ہیکٹر کے رقبے پر صرف 2 ماہ کے عرصے میں افغان کاشتکاروں نے ایک سال قبل کے مقابلے میں 60 فیصد مزید پوست کاشت کی ہے اور 2006ء کی یہ کاشت تاریخ کی سب سے بڑی کاشت کہلائی جائے گی۔ یہ وہ چیلنج تھا جس کا ہمیں سامنا تھا۔
تین بار سفیر کی حیثیت سے خدمات انجام دینے والی پیٹرسن نے لاءاینفورسمنٹ بیورو (جس کے درجن بھر ممالک میں انسداد جرائم کے پروگرامز جاری ہیں) میں مجھے اپنا نائب بنایا۔ تھامس کہتے ہیں کہ افغانستان میں منشیات کے خاتمے کےلئے میں نے مقامی قبائل سے ملاقات کی، امریکا میں وائٹ ہائوس حکام کو بریفنگ دیں اور یہ آئیڈیا پیش کیا کہ افغانستان میں پوست کے کھیتوں پر ”گلائی فوسیٹ“ کا فضائی اسپرے کیا جائے۔ یہ ایک ایسا کیمیکل ہے جو امریکا اور یورپ میں کھیتوں میں اضافے پودے ختم کرنے کےلئے استعمال کیا جاتا ہے اور اس کا انسانی صحت پر کوئی اثر نہیں۔ تاہم حامد کرزئی نے اس منصوبے کی شدید مخالفت کی اور کہا کہ لوگ یہ سمجھیں گے کہ فضاءسے زہر اسپرے کیا جا رہا ہے اور ایسا کیا گیا تو سخت مزاحمت ہوگی جس سے میری (کرزئی کی) حکومت کو خطرات لاحق ہوجائینگے، حالانکہ ایسی کوئی بات نہیں تھی لیکن حامد کرزئی کی مخالفت کے باعث ایسا اسپرے نہ ہوسکا۔
اس وقت کے امریکی وزیر دفاع ڈونلڈ رمسفیلڈ بھی میرے خیالات کا دفاع کرتے تھے لیکن اس وقت وہ سیاسی مشکلات میں گھر چکے تھے اسلئے وہ جب بھی میرا دفاع کرتے تھے کونڈولیزا رائس انہیں خاموش کرادیتی تھیں۔ اس سلسلے میں این پیٹرسن نے اور افغانستان میں اعلیٰ ترین امریکی فوجی لیفٹیننٹ جنرل کارل آئیکن بیری کے درمیان بات چیت ہوئی تو آئیکن بیری نے انہیں بتایا کہ منشیات یقیناً بری چیز ہیں لیکن ہمارا حکم یہ ہے[ کہ منشیات افغانستان میں ہماری ترجیح نہیں۔ پیٹرسن نے انہیں بتایا کولمبیا میں باغیوں کی جانب سے منشیات سے مالی مدد حاصل کرنے کی مثال پیش بھی پیش کی۔ آئیکن بیری کو کولمبیا کے اس واقعے کا علم تھا لیکن پینٹاگون کی حکمت عملی واضح ترین تھی: ”طالبان کو شکست دو اور بعد میں کسی سے کہو کہ وہ منشیات کے اس کاروبار کو تباہ کرے“۔
بہرالحال، ہمارے ادارے ڈرگ اینفورسمنٹ اینڈمنسٹریشن (ڈی ای اے) نے ہیروئن کی اسمگلنگ اور اس کے خاتمے کے لیے اپنے طور پر کارروائی کرنا شروع کیا۔ اسمگلرز اور سرغنہ کو نشانہ بنایا، ڈرگ اسمگلنگ نیٹ ورکس کو تباہ کیا لیکن زمینی کارروائی میں‌ حملوں کا خطرہ بہت تھا۔ ڈی ای اے کے پاس افغانستان میں زبردست ایجنٹ تھے لیکن زیادہ نہیں۔ پینٹاگون نے منشیات کے خاتمے کے پروگرام کے حوالے سے ہمیں ایم آئی 17 ہیلی کاپٹرز دینے کا وعدہ کیا تھا، وہ نہیں ملے۔ ایجنٹس کو کارروائی کے حوالے سے مشکلات کا سامنا تھا۔ کارروائی کے حوالے سے پینٹاگون نے ہمیں کابل ائر پورٹ پر تھوڑی جگہ بھی دینے کا وعدہ کیا تھا لیکن۔۔۔۔ نتیجہ یہ ہوا کہ انسداد دہشت گردی کے حوالے سے کوششیں‌ دھیرے دھیرے سست پڑتی گئیں۔ افغانستان میں جتنی پوست پیدا ہو رہی تھی اس کا ایک فیصد سے بھی کم حصہ پکڑا جا رہا تھا۔ منشیات کی کھیپوں کو پکڑنے کا یہ سلسلہ 2006ء میں اس وقت شدید مشکلات کا شکار ہوا جب افغانستان میں‌ مشرقی کمان سنبھالنے والے ٹو اسٹار جرنیل بینجمن فریکلی نے پوست کی کاشت کے حوالے سے نمبر ون سمجھا جانے والے افغان صوبے ننگر ہار میں ڈی ای اے کی تمام کارروائیاں بند کردیں۔ جرنیل کا کہنا تھا کہ انسداد منشیات کے لیے کی جانے والی کارروائیاں اسکے آپریشنز میں غیر ضروری رکاوٹ پیدا کر رہی تھیں۔
افغان کاشتکاروں کو متبادل فصلیں فراہم نہ کرنے پر یونائیٹڈ اسٹیٹس ایجنسی فار انٹرنیشنل ڈویلپمنٹ یعنی یو ایس ایڈ (USAid) پر بھی شدید تنقید کی گئی (خصوصاً کانگریس نے تنقید کی)۔ یو ایس ایڈ نے افغان کاشتکاروں کو متبادل فصلوں کے بیج، کھاد اور دیگر ضروری چیزیں فراہم کی تھیں لیکن اس حوالے سے ملک کے دیگر حصوں میں زرعی پروگرامز شروع نہیں ہوسکے۔ کابل میں موجود یو ایس ایڈ کے افسران و اہلکار لائق، اہل اور پرعزم تھے لیکن شدت پسندوں کے حملوں میں ان کے کئی ساتھی مارے جاچکے تھے لہٰذا وہ طالبان کے علاقوں میں‌ اپنے پروگرامز شروع کرنے میں ہچکچاہٹ محسوس کر رہے تھے۔
اس دوران ہمارے محکمہ انصاف نے افغانستان میں انسداد منشیات کے مقدمات کی عدالتیں لگانے کے کام کو حتمی شکل دیدی۔ افغانستان میں انصاف کا معاملہ قبائلی سردار، مذہبی رہنما اور کم تنخواہ والے انتہائی بدعنوان ججوں کے سر پر ڈالا ہوا تھا۔ اگر کسی مقدمہ میں منشیات اسمگل کرنےوالا شخص عدالت میں‌ لایا بھی جاتا تھا تو ہم اسے رشوت کے عوض عدالت کے دوسرے دروازے سے باہر جاتا دیکھتے تھے۔ اس معاملے میں ہمیں کئی اور بھی رپورٹس ملیں۔
پھر افغان نیشنل پولیس کا مسئلہ سر پر کھڑا ہوگیا۔ پینٹاگون تواتر کے ساتھ یہ دعویٰ کرتا رہتا تھا کہ افغان نیشنل پولیس (جسے پینٹاگون نے ہی تربیت دی تھی) زبردست کارکردگی کا مظاہرہ کر رہی ہے، لیکن حقیقت میں اس پولیس، جسے جرمن فوج اور امریکی محکمہ خارجہ کی جانب سے تربیت ملی تھی، کی کارکردگی ایسی نہیں تھی۔ افغانستان میں‌ ایک قابل احترام فوجی نے مجھے یہ بھی بتایا کہ اصل میں‌ افغان فوج بھی کوئی خاص کارکردگی نہیں‌ دکھا رہی، اسکی تربیت کا معاملہ ناقابل یقین ہے اور اس پر کم رقم خرچ کی جا رہی ہے لہٰذا فوج میں‌ جہاں‌ ضرورت پڑتی ہے وہاں پولیس کے اہلکاروں کے ذریعے خالی جگہیں پر کی جاتی ہیں۔ فوج میں دھکیلے گئے ان پولیس اہلکاروں نے جہاں بھی حکومتی رٹ برقرار رکھنے کے لیے مشکل علاقے میں کارروائی میں‌ حصہ لیا صرف جانیں‌ ہی گنوائیں۔
امریکی اداروں اور افغام حکومت کے پاس ان ایشوز سے نمٹنے کے لیے کوئی واضح حکمت عملی موجود نہیں‌ تھی۔ جب میں نے اسٹیٹ‌ ڈپارٹمنٹ کے کیریئر افسر سے افغانستان میں انسداد دہشت گردی کے لیے مختلف ایجنسیوں‌ کے درمیان رابطے کے حوالے سے دریافت کیا تو انہوں نے مجھے وہی چارٹس دکھانا شروع کئے جو مہینوں‌ قبل میں واشنگٹن میں کابینہ کو دکھا کر بریف کیا کرتا تھا۔ انہوں نے اعتراف کیا کہ تحریری طور پر کوئی حکمت عملی موجود نہیں ہے۔

(باقی بعد میں)