واشنگٹن (تجزیہ … شاہین صہبائی) ایم کیو ایم چیف الطاف حسین نے زوردار، گرجدار اور چلّاتے ہوئے سیلاب اور اس کے متاثرین کے حوالے سے ملک میں جاری بحث میں مزید تیزی پیدا کردی اور ملک کو درپیش تاریخی بحران سے نمٹنے میں سیاست دانوں کے ظالمانہ طریقے کا ذکر کیا۔ اتوار کو عزیز آباد میں اپنے خطاب کے اختتام پر الطاف حسین نے براہِ راست پاک فوج کو مخاطب کرتے ہوئے کہا کہ آپ نے ماضی میں ہمیشہ اقتدار کیلئے مارشل لا نافذ کیا لیکن عوام کے مفاد میں ایسا کبھی نہیں کیا۔ لیکن آج اگر ملک میں بدعنوان سیاست دانوں کے حمایت یافتہ جاگیردارانہ نظام کے خاتمے کیلئے ”محب وطن جرنیلوں“ نے مارشل لا نافذ کیا تو ایم کیو ایم پاک فوج کی مکمل حمایت کرے گی۔ پاکستانی ٹی وی چینلوں کے چند مبصرین اور سیاست دانوں نے فوراً اس چونکا دینے والے بیان کی تشریح کرتے ہوئے اسے مارشل لا کا براہِ راست مطالبہ قرار دیا۔
الطاف حسین کی جانب سے ” محب وطن جرنیلوں “ کی اصطلاح کا استعمال بھی معنی خیز تھا۔ انہوں نے الفاظ چبائے بغیر کہا کہ بدعنوان سیاست دان ملک توڑنے پر تلے ہوئے ہیں، ملک میں فرانس جیسے انقلاب کی ضرورت ہے۔ خطاب کے اختتام کے فوراً بعد میں نے لندن میں ایم کیو ایم کے ہیڈکوارٹرز فون کیا اور الطاف حسین کے اہم مشیر سے بات کی کیونکہ میں یہ جاننا چاہتا تھا کہ الطاف بھائی نے یہ بات آخر کس حوالے سے کی۔ مجھے بتایا گیا کہ الطاف بھائی چاہتے ہیں کہ پاک فوج ان افراد (خورشید شاہ، جاکھرانی اور دیگر) کے خلاف کارروائی کرے جنہوں نے جان بوجھ کر سندھ کے ہزاروں لوگوں کو ڈبویا اور ڈیموں کو توڑ کر اور کٹ لگا کر اپنی زمینیں بچائیں۔ لیکن شاید تھوڑا سوچنے کے بعد الطاف حسین کے مشیر نے کہا، ”لیکن میں یہ واضح کرنا چاہتا ہوں کہ الطاف بھائی نے ملک میں جمہوریت کے خلاف مارشل لا کی بات نہیں کی“۔ سیلاب کے سیاسی، سماجی اور اقتصادی نتائج کے حوالے سے ملک میں پہلے ہی بحث کا سلسلہ جاری ہے۔ کئی مبصرین افراتفری کی صورتحال کی پیش گوئی کر رہے ہیں جبکہ چند بشمول صدر مملکت یہ کہتے ہیں کہ وہ اس واقعے کو موقع میں تبدیل کردیں گے۔ تاہم، چند اشارے اب واضح ہونا شروع ہوگئے ہیں حالانکہ یہ اب بھی اِدھر اُدھر پھیلے ہوئے ہیں۔
ان میں سے کچھ مندرجہ ذیل ہیں:
# میڈیا میں دکھایا گیا ہے کہ جو لوگ جامشورو کوٹری ہائی وے بلاک کئے ہوئے تھے وہ وفاقی وزیر خورشید شاہ پر مشتعل تھے۔ ان میں سے ایک کا کہنا تھا کہ سندھیوں نے تہیہ کرلیا ہے اور یہ پیغام وزیر صاحب خورشید شاہ کو بھیج دیا گیا ہے کہ اگر کسی بھی ”غیرت مند“ سندھی کو موقع ملا تو انہیں دیکھتے ہی گولی ماری جائے گی۔ خورشید شاہ پر الزام ہے کہ انہوں نے ٹوڑی بند کو توڑا جس سے آدھا سندھ پانی میں ڈوب گیا۔ مظاہرین چلا رہے تھے کہ ”ہم نے ان لوگوں کو نہیں بلکہ بھٹو کو ووٹ دیا تھا“۔
# ممکن ہے کہ خورشید شاہ کو گولی مارنے کے بیان، جو نشر ہوگیا لیکن اسے ایڈٹ کیا جانا چاہئے تھا، نے خورشید شاہ کو کئی ٹی وی چینلوں پر سامنے آنے پر مجبور کردیا تاکہ وہ اپنا موقف بیان کرسکیں اور دعویٰ کرسکیں کہ انہوں نے اپنی زمینیں اور جائیداد بچانے کیلئے سیلاب کے پانی کا رخ بلوچستان کی جانب نہیں موڑا۔ کتنے لوگ ان کی بات پر یقین کریں گے؛ یہ ایک علیحدہ سوال ہے۔
# کئی سنجیدہ سیاست دانوں اور مبصرین نے ٹی وی چینلوں پر یہ کہنا شروع کردیا ہے کہ جس سندھ کارڈ کی بات صدر زرداری کر رہے تھے، کہ یہ انہیں تمام مخالف قوتوں سے بچائے گا، وہ سیلاب کے پانی میں بہہ گیا ہے۔ یہ بات بالکل درست ہے؛ اب سندھی اپنی ہی حکومت کو قصور وار قرار دے رہے ہیں اور اس طرح کی اطلاعات بھی ہیں کہ کئی خاندانوں نے گڑھی خدا بخش میں ذوالفقار علی بھٹو اور بینظیر بھٹو کے مزاروں میں پناہ لے لی ہے۔
# ایک اور وزیر جاکھرانی نے ٹی وی پر یہ کہا کہ سابق وزیراعظم میر ظفر اللہ جمالی نے سیلاب سے متاثرہ علاقوں کے دورے کے موقع پر انہیں دھمکی دی کہ اگر شگاف کے معاملے پر ہیرا پھیری کی گئی تو خون بہے گا۔ جمالی کے بارے میں یہ تاثر پایا جاتا ہے کہ وہ ٹھنڈے مزاج کے صبر و تحمل والے سیاست دان ہیں جو اس طرح کی زبان استعمال کبھی نہیں کرتے۔ اگر وہ اب خون بہنے کی بات کر رہے ہیں تو شاید انہیں 11/ ہزار وولٹ کا جھٹکا لگا ہوگا۔
# وزیر صاحبہ حنا ربانی کھر انتہائی باہمت خاتون ہیں،وہ کابینہ کیلئے روانہ ہوئیں لیکن جب مشتعل افراد نے ان کی گاڑی پر پتھراؤ کیا تو انہوں نے فوراً راہِ فرار اختیار کرنے میں ہی عافیت جانی۔ بعد میں لوگوں کا کہنا تھا کہ انہوں نے حنا ربانی کھر کی گاڑی پر لگے جھنڈے پر پتھراؤ کیا تھا۔
# وزیراعظم صاحب صرف جعلی کیمپوں کا دورہ کرنے کیلئے باہر نکلے لیکن ان متاثرین سے ملے بغیر ہی واپس چلے گئے جو ٹی وی چینلوں پر روتے بلکتے نظر آ رہے تھے۔
# آئی ایس آئی کے سابق چیف جنرل (ر) اسد درانی کا کہنا تھا کہ پختون مظاہرین گلیوں میں بلوا کر رہے ہیں، چارسدہ، مظفر گڑھ اور سکھر میں خواتین امدادی اشیاء کے ٹرکوں کو لوٹ رہی ہیں اور فسادات پھیل رہے ہیں۔ انہوں نے کہا افراتفری پہلے ہی پھیل چکی ہے۔ ان کا کہنا ہے کہ موجودہ نظام بچانے کی کوئی ضرورت نہیں ہے، اسے ڈی ریل ہوجانا چاہئے۔ انہوں نے پیش گوئی کی ہے کہ بعد میں مذہبی گروپ صورتحال سنبھال لیں گے، انہیں صورتحال سنبھالنے کا حق ہوگا۔ ان کا خیال ہے کہ صورتحال تباہ کرنے سے امید کی کرن پیدا ہوگی۔
# اے این پی کے وزیر بشیر بلور کا مطالبہ ہے کہ کراچی کو پاک فوج کے حوالے کردیا جائے۔ ان کا مطلب یہ تھا کہ سویلین نظام کے تحت اے این پی اور ایم کیو ایم ایک ساتھ نہیں چل سکتیں۔
# اور اب الطاف بھائی تقریباً یہ مطالبہ کر رہے ہیں کہ سندھ کارڈ آرمی کے حوالے کردیا جانا چاہئے۔ پس پردہ خطرہ اس بات کا ہے کہ سندھی اب کراچی کا رخ کر رہے ہیں اور ایم کیو ایم کو ایک مرتبہ پھر آبادی کی منتقلی سے خطرہ ہے اور پختون سندھی آبادی اس کے حامیوں کے خلاف خفیہ معاہدہ کر سکتی ہے۔ یہ چند نشانیاں ایک ایسے آتش فشاں کی ہیں جو اب پھٹنے والا ہے۔ کسی بصیرت اور عزم کے بغیر حکومتی رد عمل یہ ہے :
…مزید ٹیکس، جی ایس ٹی، فلڈ ریلیف سرچارج، گیس پٹرول اور بجلی کے مہنگے تین نرخ، ملنے والی امداد سنبھالنے کیلئے شفاف نظام کی عدم موجودگی، سیاست چمکانا اور چند متاثرین (کسی کو نہیں معلوم کہ وہ اصلی ہیں یا جعلی) میں چیک تقسیم کرکے فوٹو سیشن کرانا۔ حکومتی ترجمان حسین حقانی کا کہنا ہے کہ میڈیا اس بات کی حوصلہ افزائی کر رہا ہے کہ پاک فوج موجودہ جمہوری حکومت کے خلاف ہے لیکن ایسی کوئی بات نہیں؛ خاکی وردی والوں اور سویلین حکومت میں اختلافا ت نہیں ہیں۔ ممکن ہے کہ یہ اختلافات سب کے علم میں نہ ہوں لیکن زمینی حقائق اور بیانات کو دیکھا جائے تو ایسا نہیں ہے۔
پنجاب ریلیف کمیٹی کیلئے وزیراعظم کی جانب سے مقرر کردہ پیپلز پارٹی کے ایک سینیٹر صلاح الدین ڈوگر نے کھل کر (ریکارڈ پر آکر) کہا کہ طیارے کے ذریعے وہ امدادی اشیاء جو وزیراعظم صاحب نے متاثرین میں تقسیم کرنے کیلئے ملتان بھیجی تھیں؛ وہ فوج لے کر چلی گئی۔ لب لباب یہ ہوا کہ فوج کو ان پی پی کے جیالوں پر اعتماد نہیں۔ صرف فوج ہی نہیں بلکہ اقوام متحدہ، امریکا اور برطانیہ کی بیرونیس سعیدہ وارثی بھی اسی مسئلے کے حوالے سے سفارتی لب و لہجہ اختیار کرتے ہوئے اپنی رائے کا اظہار کرچکی ہیں۔ ہلیری کلنٹن کہتی ہیں کہ پاکستان اختلافات ختم کرے؛ امریکی سفیر این ڈبلیو پیٹرسن کہتی ہیں کہ واشنگٹن کو زرداری حکومت پر اعتماد ہے اور امریکا اسی کے ذریعے امداد فراہم کرے گا۔ باہر بیٹھا ہر شخص ان کی ساکھ کو بہتر کرنے کی کوشش کرتا ہے لیکن اس کے باوجود ان کی ساکھ کی چھاپ اس قدر مضبوط ہے کہ اسے ختم نہیں کیا جا سکتا۔ الطاف بھائی کے بالواسطہ مطالبے اور اے این پی کی پاک فوج کو براہ راست دعوت کے بعد کسی اور نے نہیں بلکہ پیپلز پارٹی کے اپنے ہی اتحادیوں نے آئندہ کا روڈ میپ تیار کرلیا ہے۔ ملک کو نہ صرف ایک ایسے تاریخی اور بے مثال بحران کا سامنا ہے بلکہ اسے انتظامی حوالے سے بھی بدترین صورتحال کا سامنا ہے۔ وزیراعظم طاقت ور ہوتے ہوئے بھی اپنے اختیارات استعمال نہیں کرسکتے جبکہ جس صدر کے پاس طاقت نہیں ہے، وہ ہار ماننے کو تیار نہیں۔ 6/ دنوں میں وزیراعظم نے تین کمیشن بنا ڈالے، سب کے سب کافور ہوگئے کیونکہ ایوانِ صدر آمادہ نہیں تھا۔ ایک طرف صدر صاحب سیلاب سے متاثرہ علاقوں میں امریکی سینیٹر کے ساتھ فضائی دورہ کرتے ہیں تو دوسری طرف وزیراعظم صاحب بے داغ اور چمکدار کپڑے اور شاندار چشمہ پہنے جعلی ریلیف کیمپوں کا دورہ کرتے ہیں۔ صدر صاحب کا کہنا ہے کہ طوفانِ نوح علیہ السلام کے بعد یہ سب سے بڑا سیلاب ہے لیکن وہ اس کشتی کا ذکر نہیں کرتے جو اس آفت سے بچانے کیلئے انسانوں اور جانوروں کو اٹھا کر مصیبت سے نکالے گی۔ ابھی کئی ناکامیاں سامنے آنا باقی ہیں کیونکہ زرداری صاحب کے بارے میں سب کو معلوم ہے کہ وہ درست راستہ اختیار نہیں کریں گے تاوقتیکہ تلوار ان کی گردن تک پہنچ جائے۔ سوال یہ پیدا ہوتا ہے کہ مزید کتنا وقت دیا جائے گا اور مزید کتنی غلطیاں برداشت کی جائیں گی۔ بظاہر ایسا معلوم ہوتا ہے کہ اب مزید نہیں۔

__________________
(اے پروردگار) ہم تیری ہی عبادت کرتے ہیں اور تجھ ہی سے مدد مانگتے ہیں