امریکی اخبار نے نیانقشہ جاری کردیا

امریکی اخبار نیویا رک ٹائمز میں جنوبی ایشیا کا ایک نیا نقشہ شائع کیا گیا ہے جس میں پاکستان کے شمالی علاقے اور صوبہ سرحد افغانستان میں شامل کئے گئے جبکہ بلوچستا ن کو ایک آزاد ریاست دکھایا گیا ہے ، اس طرح پاکستان کا علاقہ بہت محدود ہوگیا ہے ۔اس نقشے نے پاکستانی اعلیٰ حکام کو تشویش میں مبتلا کر دیا ہے ۔اخبار کے مطابق اعلیٰ پاکستانی فوجی حکام نے ان خدشات کا اظہار کیا ہے کہ امریکہ پاکستان کو نقصان پہنچانے کی غرض سے افغانستان اور بھارت کی معاونت کررہا ہے ۔ نیویارک ٹائمز کے مطابق امریکیوں کے اس نقشے کے بعد فوجی افسروںسمیت پاکستانیوں پر اب حقیقت کھل گئی ہے کہ امریکہ مسلم ممالک کی واحد نیوکلیئر طاقت پاکستان کو توڑنا چاہتا ہے۔ تجزیہ نگار طلعت مسعود کہتے ہیں بھارت سے معاہدہ کرکے امریکہ نے ایٹمی منظرنامہ مکمل طور پر بدل دیا ہے۔پاکستان افغانستان میں بھارت کی بڑھتی ہوئی سرگرمیوں پر بھی پریشان ہے ۔اخبار کے مطابق امریکی کمانڈ ر جنرل ڈیوڈ میکرنن کو اس سلسلے میں ایک بار تلخ صورتحال کا سامناکر نا پڑ اہے جب انہوں نے اسلام آبا د میں امریکی سفارتکا ر کے گھر پاکستانی سیاستدانوںسے ملاقات کی ۔جنرل میکرنن نے واشنگٹن میں ایک تقریب میں بتایا تھاکہ مجھے وہاں دو سوالات کئے گئے تھے کہ جب افغانستان پر امن تھا تو امریکی وہاں کیوں آئے اور یہ امریکہ کرسمس سے قبل افغانستا ن میں بھارتی فوجی بلارہا ہے ۔اخبار لکھتا ہے بہت سے مبصرین کہتے ہیں پاک فوج کو کمزور کرنے کے لئے امریکہ دراصل خود طالبان کی مالی مدد کر رہا ہے تاکہ پاکستانی ایٹمی ہتھیاروں پر قبضہ ہوسکے ۔حال ہی میں ایک پاکستانی فوجی افسر نے باجوڑ میں ایک صحافی سے بات کرتے ہوئے کہا تھا اسامہ بن لاد ن کا کوئی وجود نہیں ،یہ امریکیوںکی اختراع ہے اور افغانستان پر حملے کے ذریعے پاکستان میں گھسنے کےلئے امریکہ کو اس کی ضرورت ہے ۔

__________________