دفتر خارجہ نے متعلقہ حکام سے بھارتی وزیر کی جانب سے جمعہ کو تمام قواعد و ضوابط کو نظر انداز کرتے ہوئے واہگہ کی سرحد پار کر کے پاکستان میں داخل ہونے کے واقعہ سے متعلق رپورٹ طلب کرلی ہے۔

اگرچہ بھارتی میڈیا پاکستان میں داخل ہونے کے واقعہ کو غیر ارادی قرار دے رہا ہے لیکن سفارتی مبصرین کا کہنا ہے کہ بھارتی وزیر مملکت برائے تجارت جئے رام رمیش جس طرح پاکستانی سرحد میں داخل ہوئے ہیں اس سے ظاہر ہوتا ہے کہ وہ پاکستانی خود مختاری کا کوئی احترام نہیں کرتے۔

بھارتی میڈیا کی اطلاعات کے مطابق جئے رام رمیش کچھ بھارتی اہلکاروں بشمول ڈپٹی کمشنر امرتسر کے ایس پنّوں اور بی ایس ایف اہلکاروں کے ہمراہ پاکستان رینجرز کے کانفرنس ہال تک آئے جو پاکستانی سرحد میں چالیس گز اندر واقع ہے۔

حکومتِ پاکستان نے اس واقعہ کا سخت نوٹس لیا ہے کیونکہ یہ سفارتی آداب سے مطابقت نہیں رکھتا۔ وزارت داخلہ نے بھی متعلقہ حکام سے کہا ہے کہ وہ اس کی رپورٹ پیش کریں۔ وزارت داخلہ کے ترجمان بریگیڈیئر (ر) جاوید اقبال چیمہ نے کہا ہے کہ وہ اس واقعہ سے متعلق رپورٹ ملنے کے بعد ہی کوئی تبصرہ کرسکتے ہیں۔

دلچسپ بات یہ ہے کہ ایسا ہی ایک واقعہ قیام پاکستان کے ابتدائی دنوں میں بھی پیش آیا تھا جب سابق بھارتی فوجی سربراہ جنرل کریاپّہ اپنی جیپ میں اس وقت کے کور کمانڈر لاہور جنرل موسیٰ خان سے ملنے کےلئے لاہور پہنچ گئے تھے۔ اس واقعہ کے وقت دونوں اہلکار بریگیڈیئر تھے اور قیام پاکستان سے قبل کے دوست تھے۔ اپنے دفتر کے باہر بھارتی بریگیڈیئر کو دیکھ کر جنرل موسیٰ خان ان پر چلائے اور انہیں حکم دیا کہ وہ فوری طور پر اپنی سرزمین پر واپس لوٹ جائیں بصورت دیگر انہیں گولی مار دی جائے گی یا پھر گرفتار کرلیا جائے گا۔ موسیٰ خان نے انہیں یاد دلایا کہ وہ ایک خود مختار ملک میں موجود ہیں جو اب بھارت کا حصہ نہیں ہے۔ اس پر بھارتی فوجی افسر پشیمانی کا اظہار کرتے ہوئے تیزی سے واپس لوٹ گئے۔

جمعہ کو ہونے والے واقعہ میں بھارتی وزیر کا کسی پاکستانی اہلکار نے سرحد کے اندر داخل ہوتے ہوئے استقبال نہیں کیا۔ ان کا پاکستان میں داخلہ پروٹوکول کے بھی خلاف تھا تاہم جئے رام رمیش سے جب یہ پوچھا گیا کہ انہوں نے قانونی دستاویزات کے بغیر کس طرح بین الاقوامی سرحد پار کی تو انہوں نے کہا کہ وہ صرف دو قدم اندر گئے تھے اور پاکستان میں داخل نہیں ہوئے تھے۔

بی ایس ایف کے انسپکٹر جنرل ارویند رنجن سے جب رابطہ کیا تو انہوں نے کہا ہے کہ وہ کسی کو بھی قانونی دستاویزات کے بغیر سرحد پار کرنے کی اجازت نہیں دیتے لیکن شیڈول کے مطابق اجلاس میں شرکت کےلئے خود سرحد پار جاتے ہیں۔

انہوں نے بتایا کہ جب بھارتی وزیر نے سرحد پار کی تو وہ اس وقت موجود نہیں تھے۔ رنجن کے مطابق وہ موقع پر موجود بی ایس ایف کے حکام سے رپورٹ ملنے کے بعد اس معاملے کا جائزہ لیں گے۔

انتہائی اعلیٰ سطح کے امیگریشن ذرائع نے بتایا ہے کہ بھارتی وزیر نے محض تجسس کی وجہ سے سرحد پار کی تھی حتیٰ کہ پاکستانی رینجرز نے بھی سرحد پار کرتے ہوئے انہیں نہیں روکا۔

ڈپٹی کمشنر امرتسر کا کہنا ہے کہ بھارتی وزیر کے دورے کا مقصد سرحدی علاقے کا جائزہ لینا تھا جس کو پاکستان سے تجارت روابط بہتر بنانے کےلئے جلد جدید بنائے جانے کا امکان ہے۔ انہوں نے مزید کہا کہ قانونی دستاویز کے بغیر پاکستان کا دورہ کوئی ایشو نہیں ہے۔

پاکستان اس معاملے کو بھارت کے ساتھ سرکاری طور پر اٹھا سکتا ہے۔ اس معاملے پر رپورٹ ملنے کے بعد اسلام آباد نئی دہلی سے احتجاج بھی کرسکتا ہے۔