دراصل ہمارے ملک کی جو یہ حالت ہے اور ہم پر عذاب کی صورت میں ایسے ناعاقبت اندیش حکمران مسلط ہیں تو اسکی دیگر بہت سی وجوہات تو ہیں ہی لیکن ایک بڑی وجہ یہ ہے کہ سارے ملکی نظام میں سے دانشور کو نکال باہر کر دیا گیا ہے۔نہ کوئی سید محمد تقی ہے،نہ رئیس امروہوی اورنا کوئی جالب ہے نا فیض
سچ پوچھیں تو یہ مسئلہ صرف پاکستان کا ہی نہیں ننانوے فیصد سے زائد مسلم ممالک کا ہے اور جہاں جہاں آمریت،بادشاہت یا ملوکیت موجود ہے وہاں زر خرید اور خودساختہ نام نہاد دانشور ”شاہ” کے کاسہ لیس اور درباری تاریخ نویس کی طرح ہیں۔
پاکستان کو جس نہج پر یہ حکمران اور انکے حواری لے آئے ہیں اس جگہ پر شاید کوئی معجزہ بھی کچھ نہ کر سکے۔ الطاف حسین،نواز شریف،آصف زرداری،قاضی حسین احمد۔ مولانا فضل الرحمٰن اور اسی قماش کے دوسرے تمام سیاست دان ضمیر فروش تو تھے ہی لیکن اب قوم فروخت بن چکے ہیں اور یہ سب ایک جیسے،ایک ہی ماں کی اولاد،ایک ہی قماش کے لوگ اور ایک ہی تھالی کے چٹے بٹے ہیں۔ جسکو جب بھی موقع ملتا ہے وہ اپنے ہی عوام پر وار کرتا اور انکا خون چوستا ہے۔
پاکستان میں اگر آپ غور کریں تو قلم کار طبقہ لکھنے کے حوالے سے جیسے ناپید ہو چکا ہے یا پھر لمبی تان کر سو گیا ہے۔ پچھلے کئی برس سے مجھے کسی بڑے لکھنے والے شاعر ادیب کی کوئی تحریر دکھا دیجئے جس میں موجودہ حالات کا تذ کرہ ہو یا پھر عوام دشمن حاکموں کی ناپاک حاکمیت کا پردہ چاک کیا گیا ہو اور یا پھر عوام کی بے بسی کی کوئی بات کی گئی ہو۔
بے شرمی صرف برہنہ ہونا نہیں ہے بلکہ یہ بھی بے شرمی ہے جو اس وطن عزیز کے سیاستدانوں اور حکمرانوں سے لیکر ہر طبقے اور شعبے میں آ گئی۔
حکمران بے شرم،حکومتی نظام بے شرم،عدالت بے شرم،ججوں کی اکثریت بے شرم، قاتلوں کو حمایت کرنے والے کتنے ہی وکلا بے شرم، اسمبلیاں بے شرم،الیکشن کمیشن بے شرم،ابلاغ کے ادارے بے شرم، بکاؤ مال قلم کار بے شرم ،صاحبان جبہ و دستار بے شرم، سیاستدانوں کی ایک بہت بڑی اکثریت بے شرم، وعظ و نصیحت کرنے والے بے عمل ملاں بے شرم اور حتیٰ کہ عوام کی ایک بڑی تعداد بھی بے شرم ہو چکی ہے۔ عوام اس لیئے کہ ظلم سہنے والا بھی ظلم کرنے والے کا بھائی ہے۔
یہی عوام ہیں جو بار بار اپنے اور اپنے بچوں کے قاتلوں کو ووٹ دیکر اسمبلیوں میں لاتے ہیں۔ ہمارے عوام سے تو نیپال کے بھوکے ننگے عوام ہزارہا درجے بہتر ہیں جنہوں نے صدیوں کی بادشاہت کا جنازہ اس طرح نکالا کہ کوئی کندھا دینے والا نہیں تھا۔
جس ملک میں انٹر پول کو مطلوب شخص ملکی سیکیورٹی کا ذمیدار بن جائے،جہاں سزا یافتہ لوگ ملک کے بڑے بڑے اداروں کے نگراں ہوں اور جہاں دودھ کی رکھوالی کو بلی کو بٹھا یا گیا ہو وہاں اب ہم کس سورہء احزاب یا سورہ ء فیل کے نزول کے انتظار میں ہیں۔