درجہ بندی: (1 votes - 5.00 average)

يَا أَيُّهَا الَّذِينَ آمَنُواْ لاَ تَتَّخِذُواْ الْيَهُودَ وَالنَّصَارَى أَوْلِيَاءَ بَعْضُهُمْ أَوْلِيَاءُ بَعْضٍ وَمَن يَتَوَلَّهُم مِّنكُمْ فَإِنَّهُ مِنْهُمْ إِنَّ اللّهَ لاَ يَهْدِي الْقَوْمَ الظَّالِمِينَ فَتَرَى الَّذِينَ فِي قُلُوبِهِم مَّرَضٌ يُسَارِعُونَ فِيهِمْ يَقُولُونَ نَخْشَى أَن تُصِيبَنَا دَآئِرَةٌ فَعَسَى اللّهُ أَن يَأْتِيَ بِالْفَتْحِ أَوْ أَمْرٍ مِّنْ عِندِهِ فَيُصْبِحُواْ عَلَى مَا أَسَرُّواْ فِي أَنْفُسِهِمْ نَادِمِينَ وَيَقُولُ الَّذِينَ آمَنُواْ أَهَـؤُلاَءِ الَّذِينَ أَقْسَمُواْ بِاللّهِ جَهْدَ أَيْمَانِهِمْ إِنَّهُمْ لَمَعَكُمْ حَبِطَتْ أَعْمَالُهُمْ فَأَصْبَحُواْ خَاسِرِينَ (المائدۃ 51تا 53)
اے ایمان والو! یہود اور نصارٰی کو دوست مت بناؤ یہ (سب تمہارے خلاف) آپس میں ایک دوسرے کے دوست ہیں، اور تم میں سے جو شخص ان کو دوست بنائے گا بیشک وہ (بھی) ان میں سے ہو (جائے) گا، یقیناً اﷲ ظالم قوم کو ہدایت نہیں فرماتا۔سو آپ ایسے لوگوں کو دیکھیں گے جن کے دلوں میں (نفاق اور ذہنوں میں غلامی کی) بیماری ہے کہ وہ ان (یہود و نصارٰی) میں (شامل ہونے کے لئے) دوڑتے ہیں، کہتے ہیں: ہمیں خوف ہے کہ ہم پر کوئی گردش (نہ) آجائے (یعنی ان کے ساتھ ملنے سے شاید ہمیں تحفظ مل جائے)، تو بعید نہیں کہ اﷲ (واقعۃً مسلمانوں کی) فتح لے آئے یا اپنی طرف سے کوئی امر (فتح و کامرانی کا نشان بنا کر بھیج دے) تو یہ لوگ اس (منافقانہ سوچ) پر جسے یہ اپنے دلوں میں چھپائے ہوئے ہیں شرمندہ ہوکر رہ جائیں گے۔ اور (اس وقت) ایمان والے یہ کہیں گے کیا یہی وہ لوگ ہیں جنہوں نے بڑے تاکیدی حلف (کی صورت) میں اﷲ کی قَسمیں کھائی تھیں کہ بیشک وہ ضرور تمہارے (ہی) ساتھ ہیں، (مگر) ان کے سارے اعمال اکارت گئے، سو وہ نقصان اٹھانے والے ہوگئے۔
تشریح:
جب یہودیوں کی سازشوں کی وجہ سے مسلمانوں کو ان سے گہری دوستی کرنے سے روکا گیا تو اس وقت عبادہ بن صامت رضی اللہ عنہ وغیرہ کے ان سے بڑے قریبی اور گہرے تعلقات تھے لیکن اپنے ایمان کی مضبوطی اور اطاعت رسول کو مقدم رکھتے ہوئے انہوں نے ان سے مکمل براءت اور لاتعلقی کا اظہار کر دیا۔ مگربعض لوگ جو منافقانہ طور پر مسلمانوں سے ملے ہوئے تھے یا ابھی ایمان ان کے دلوں میں رچا نہیں تھا، وہ ان لوگوں سے قطع تعلق کردینے میں یہ خطرات محسوس کرتے تھے کہ ممکن ہے کہ مشرکین و یہود کی سازشیں کامیاب ہو جائیں اور مسلمان مغلوب ہو جائیں تو ہمیں ان لوگوں سے بنا کر رکھنی چاہیے کہ اس وقت ہمارے لیے مصیبت نہ بن جائے۔ گویا ان کا منصوبہ یہ تھا کہ رحمان کے بندوں اور شیطان کے پجاریوں دونوں سے بنا کر رکھیں، تا کہ فتح جس کی بھی ہو ان کی گردن بہرحال بچی رہے۔ انہی منافقین کا سردار عبداللہ بن ابی تھا جس نے رسول اللہ صلی اللہ علیہ و علی آلہ وسلم کے حکم پر سر تسلیم خم کرنے کی بجائے اعلان کیا:
إني رجل أخاف الدوائر، لا أبرأ من ولاية موالي
"مجھے تو ان سے تعلق توڑنے میں بڑا خطرہ لگتا ہے، لہٰذا میں ان سے اعلان براءت ہرگز نہ کروں گا"
اس پر یہ آیت نازل ہوئی:
فَتَرَى الَّذِينَ فِي قُلُوبِهِمْ مَرَضٌ يُسَارِعُونَ فِيهِمْ يَقُولُونَ نَخْشَى أَنْ تُصِيبَنَا دَائِرَةٌ
اور منافقین کے جواب میں فرمایا:
فَعَسَى اللَّهُ أَنْ يَأْتِيَ بِالْفَتْحِ أَوْ أَمْرٍ مِنْ عِنْدِهِ فَيُصْبِحُوا عَلَى مَا أَسَرُّوا فِي أَنْفُسِهِمْ نَادِمِينَ
یعنی جب منافقین کے نفاق کا پردہ چاک ہو گا اور ان کی اسلام دوستی اور خیرخواہی کی قسموں کی حقیقت کھلے گی تو مسلمان حیرت زدہ رہ جائیں گے کہ کیا یہ واقعی وہی لوگ ہیں جو قسمیں اٹھا اٹھا کر کہتے تھے کہ وہ مسلمانوں کے ساتھ ہیں۔ان بد بختوں کا حشر یہ ہوا کہ اللہ تعالیٰ نے ان کے وہ تمام اعمال ضائع کر دیے جنہیں وہ نیکی سمجھ کر کیا کرتے تھے۔
حقیقت یہ ہے کہ یہودیوں اور صلیبیوں سے گہری دوستی اور انہیں سرپرست بنانے کی جو ممانعت کی گئ ہےیہ خود مسلمانوں ہی کے مفاد کی خاطر ہے۔ ورنہ اسلام کی حفاظت کا ذمہ خود اللہ تعالیٰ نے لے رکھا ہے۔ اگر مسلمانوں کا کوئی فرد یا جماعت سچ مچ اسلام کو چھوڑ ہی بیٹھے اور بالکل مرتد ہو کر کافروں سے مل جائے تو اس سے اسلام کو کوئی گزند نہیں پہنچتا، اللہ تعالیٰ اپنا کام کسی دوسری قوم سے لے لے گا۔ اللہ کے کام نہ کسی ذات پر موقوف ہیں، نہ کسی جماعت اور ملک پر۔ وہ جس سے چاہتا ہے اپنا کام لے لیتا ہے۔ مسلمان اگر مرتد ہو جائیں تو پروا نہیں، اللہ تعالیٰ ایک دوسری جماعت کھڑی کر دے گا جن سے اللہ محبت کرے گا اور وہ اللہ تعالیٰ سے محبت رکھیں گے۔ مسلمانوں کے سامنے نرم ہوں گے، اگر کسی معاملے میں اختلاف بھی ہوا تو آسانی سے قابو آ جائیں گے، جھگڑا چھوڑ دیں گے اگر چہ وہ حق بجانب بھی ہوں۔ مسلمانوں سے اپنے حقوق اور معاملات میں جھگڑا نہ کریں گے لیکں اللہ اور اس کے دین کے دشمنوں کے خلاف سخت اور قوی ہوں گے۔ یہ ایک ایسی قوم ہو گی جس کی محبت و عداوت اور دوستی اپنی ذات اور ذاتی حقوق و معاملات کی بجائے صرف اللہ اور اس کے رسول اور اس کے دین کی خاطر ہو گی۔ اس لیے ان کی لڑائی کا رخ اللہ و رسول کے فرمانبرداروں کی طرف نہیں بلکہ اس کے دشمنوں اور نافرمانوں کی طرف ہو گا۔ یہ لوگ دین حق کی اشاعت اور برتری کے لیے جہاد کرتے رہیں گے اور اس مقصد کے لیے کسی ملامت کرنے والے کی ملامت کی پرواہ نہ کریں گے۔ اپنوں کے طعنوں اور تشنیع سے بڑے بڑے عزم والوں کے قدم میں لغزش آ جاتی ہے لیکن یہ مبارک گروہ جہاد کے معاملے میں نہ کسی بیگانے کے پراپیگنڈے کا شکار ہو گا اور نہ اپنوں کی باتوں سے تنگ آ کر اس سے منہ موڑے گا۔
ان آیات کے اولین مصداق تو صحابہ کرام رضی اللہ عنہم تھے مگر یہ اس کے منافی نہیں کہ کوئی دوسری جماعت بھی اس آیت کی مصداق ہو۔ صحیح یہی ہے کہ قیامت تک آنے والے وہ مسلمان جو یہودیوں اور صلیبیوں کی دوستی سے بچتے ہوئے کفر و ارتداد کا مقابلہ کریں گے ، اسی آیت کے مصداق میں داخل ہوں گے۔یہ تینوں گروہ یعنی یہودی اور صلیبی، منافقین اور مومنین ہر زمانے میں اپنی انہیں صفات کے ساتھ موجود رہے ہیں اور تھوڑا غور کرنے سے آج بھی ان کے چہرے آسانی کے ساتھ پہچانے جا سکتے ہیں۔
(حوالہ جات: تفسیر ابن کثیر، معارف القرآن)