وہ ہمیشہ کی طرح رات کو گشت پر نکلے…نفس کے دشت کو نیکیوں کے سمندر میں بدلنے کے لیے گشت تو کرنا ہی پڑتا ہے…اورپھر ویسے بھی اُنہوں نے کبھی شہوات سے ”مفاہمت“ کی ہی نہیں تھی لہٰذا پہلو بھی اکثر بستر سے الگ ہی رہا کرتے تھے…اُس رات بھی معمول کے مطابق اپنے اسلم کے ساتھ وہ رعایا کی خبر گیری کے لیے بھیس بدل کر اُن ہی گلیوں میں سر جھکا کر چل رہے تھے جہاں ”اُن“ کے ہونے کا تصورہی ہر عاشق کو خود بخود ادب سکھادیتا ہے اور وہ تو ٹہرے خالق سے محبوب کے مانگے ہوئے عاشق! پھر اُن سے زیادہ ادب اور کون جانے ؟…اِدھر رات گہری ہوتی جارہی تھی اور اُدھراُن کی پریشانی بڑھتی جارہی تھی کہ کہیں کوئی گلی،مکان یا محلہ چھوٹ تو نہیں گیایا معبودِ برحق مجھ سے روٹھ تو نہیں گیا جو کسی سائل کی آواز، ماں کی پکار یابھوکے پیٹ رات گذارنے والوں کی سسکیاں سنائی نہیں دے رہیں؟… اِسی مضطربانہ کیفیت کے ساتھ اُنہوں نے ایک دیوار کے ساتھ ٹیک لگائی ہی تھی کہ دفعتاً ایک آواز کی سرگوشی نے سناٹے کو چیر دیا، بظاہر وہ کھسر پھسر ہی تھی مگر ماحول کی خاموشی نے غیر معمولی صوتی طاقت کے ساتھ مظاہرِ فطرت کو اُس کا گواہ بنادیا تھا…وہ ایک عورت تھی جو اپنی بیٹی کو بیدار کرتے ہوئے اُس سے کہہ رہی تھی…”بیٹی اٹھو! یہ وقت بہت مناسب ہے، تم جلدی سے دودھ میں پانی ملادو“…بیٹی نے قدرے توقف کے بعد اپنی ماں سے دریافت کیا ”امی جان! کیا آپ کو معلوم نہیں کہ آج امیر المومنین نے کیا حکم دیا ہے ؟“…ماں نے بھنویں چڑھاتے ہوئے سوالیہ نظروں سے دُختر کو گھورتے ہوئے پوچھا کہ ”کیا حکم دیا تھا؟“…بیٹی دائرہ ادب کے احاطے میں رہتے ہوئے نرم انداز میں اپنی والدہ سے یوں گویا ہوئی کہ ”امی جان!میں نے امیر المومنین کے منادی کو یہ کہتے ہوئے سنا ہے کہ دودھ میں پانی کی آمیزش نہ کی جائے“…ماں نے جواب سن کر کہا کہ ”بس اتنی سی بات ہے ، تم نے تو خواہ مخواہ مجھے بھی پریشان کردیا، گھبرانے کی ضرورت نہیں، تم بس اُٹھو اور دودھ میں پانی ملادو، ہم جہاں ہیں وہاں نہ عمر ہمیں دیکھ سکتے ہیں اور نہ ہی اُن کا منادی، جاؤ ماں کا حکم مانواور جیسا میں نے کہا ہے ویسا ہی کرو“…بیٹی نے والدہ کا آخری فیصلہ سن کر اٹل لہجے میں بیزاری کا اظہار کرتے ہوئے کہا ”امی جان! اللہ کی قسم یہ مجھ سے نہیں ہوسکتا کہ میں لوگوں کے سامنے تو عمر کی اطاعت کروں اور تنہائی میں نافرمانی کا ارتکا ب کروں، آپ کو دودھ میں پانی ملانا ہے تو خود ملادیجیے، مجھ سے یہ نہیں ہوگا“…اور کچھ دیر کے لیے پھر سے خاموشی ہوگئی…اِس بار خاموشی کو فاروق اعظم رضی اللہ تعالیٰ عنہ کی آواز نے توڑا اورآپ نے اسلم سے کہا ”اے اسلم! اِس گھر کے دروازے پر کوئی نشان لگادو اور اچھی طرح پہچان لو اور صبح آکر یہاں دیکھناکہ معاملہ کیا ہے ، اِس گھر میں کوئی مرد بھی ہے یا نہیں؟“…اسلم بتاتے ہیں کہ جب صبح میں نے معلومات حاصل کیں تو پتہ چلا کہ لڑکی کا باپ مر چکا ہے اور وہ کنواری ہے جو اپنی ماں کے ساتھ تنہا رہتی ہے …تفصیلات جاننے کے بعد سیدنا عمر  نے اپنے بیٹوں کو بلوایا اور سب کو جمع کرنے کے بعد اُن سے فرمایا”میں چاہتا ہوں کہ تم میں سے کسی کا نکاح اُس لڑکی کے ساتھ کروں جسے میں نے گذشہ شب ایمان کی بہترین حالت میں دیکھا ہے“…آپ کے صاحبزادے حضرت عاصم نے عرض کیا کہ ”بابا جان! میں حاضر ہوں“…چنانچہ سیدنا عمر نے اُس لڑکی کے لیے پیام بھجوایا اور عاصم  سے اُس کا نکاح کردیا، اُن کے ہاں ایک بیٹی پیدا ہوئی اور اُس کے ہاں بھی بعد میں ایک بیٹی پیدا ہوئی جس نے سیدنا عمر بن عبدالعزیز رضی اللہ تعالیٰ عنہ نے جیسے گہر نایاب کو جنم دیا…ہاں وہی عمر بن عبدالعزیز جنہوں نے مروان بن حَکم کے اُس خود ساختہ مفاہمتی قانون کا خاتمہ کیاجس سے آل مہلب، ہبیرہ، حجاج اور خالد بن سعید نے بھرپور فائدہ اٹھایا تھا…کالے قانون کے نفاذ سے انکار اور ایمان کے تحفظ پر اصرار کا چراغ اُن کی تربیت گاہ میں اُسی خاتون نے روشن کیا تھا جسے ایک طرف فاروقِ اعظم  کی بہواور دوسری جانب عمر بن عبدالعزیز کی نانی ہونے کا شرف حاصل ہے…
مروان سے لے کر سلیمان بن عبدالملک تک ”حکومتی مفاد“ کے پیشِ نظر ”حکمت عملی“ کے تحت اسلام کے عظیم غازیوں طارق بن زیاد، موسی بن نصیر، محمد بن قاسم اور قتیبہ بن مسلم کی خدمات کا صلہ دردناک شہادت یا معاشی تنگی کی صورت میں دیاگیا، حکومت کے حالات ایسے ہوچکے تھے کہ بیت المال عوامی نہیں بلکہ ”ذاتی خزانہ“ تصور کیا جاتا تھا…”دوستوں“ اور شراب و شباب کی محافل کے ”ساتھیوں“ کو بڑی بڑی جاگیریں عطا کی گئیں، بعض مخالفین کی جانب سے ”حمایت “ کرنے پراُن کی سزائیں معاف کردی گئیں اور بعض طاقت وروں سے ”مفاہمت“ کی خاطر سعید بن جبیر، کمیل بن زیاد، ابراہیم بن یزید رحمھما اللہ اور عبد اللہ بن زبیر اور مصعب بن زبیر رضی اللہ عنہم کو شہید کردیا گیا…ایسے میں عمر بن عبدالعزیز پیدا ہوئے جنہوں نے قومی و حکومتی مفاہمت اور اِس جیسے ناموں کی دھجیاں بکھیرتے ہوئے خلافتِ منہاج علی النبوة کا احیا کیا…امام ابن جوزی کے مطابق(کسی اور کے مطابق نہیں)آپ نے خلیفہ بنتے ہی سب سے پہلے جو کام انجام دیا وہ لوگوں کے غصب شدہ مال کی واپسی تھی…تاریخ ابن خلکان کے صفحات میں درج ہے کہ آپ نے مسندِ اقتدار سنبھالتے ہی تمام اموال کو مکاتیب لکھے اور اُن سے جائیدادوں اور بیت المال کا حساب مانگا، اُس وقت امت کا دو تہائی مال صرف ”ایک خاندان“ کے قبضے میں تھا، عمر بن عبدالعزیز  کے مکاتیب پر ”این آر و کے تحت فائدہ اٹھانے والوں“ نے جواب دیا”اللہ کی قسم ! یہ مال اور جائیداد اُس وقت تک واپس نہیں ہوسکتا جب تک کہ ہمارے سر تن سے جدا نہ ہوجائیں، ہم اپنے اجداد کو کافر بناسکتے ہیں اور نہ ہی اپنے بچوں کو مفلس“…اِس سخت جواب کے بعد عمر بن عبدالعزیز نے جواباً دمشق کی جامع مسجد میں ایک خطبہ ارشاد فرمایا جسے امام جوزی کی تحریر کردہ ”سیرت عمر بن عبدالعزیز“ کے صفحہ۸۱۱ پر ملاحظہ کیا جاسکتا ہے کہ …”اُن لوگوں(حکومتی افراد) نے ہم خاندان والوں کو ایسی جاگیریں اور عطایا دیے جس کو اللہ کی قسم ! اُن کو دینے کا حق تھااور نہ ہی ہمیں لینے کا…چنانچہ میں خلیفہٴ وقت کی حیثیت سے اصلی حق داروں کو اُن کا حق واپس دینے اعلان کرتا ہوں اور اِس کی ابتدا اپنے ہی گھر سے کرتا ہوں“…جس کے بعد آپ نے جاگیروں کی اسناد کا خریطہ منگوایا…وزرا ء اِن اسناد کو نکال کر پڑھ کر سناتے جاتے تھے اور آپ قینچی سے اُنہیں کاٹ کر پھینکتے جاتے تھے یہاں تک کہ فجر سے ظہر کا وقت ہوگیا…تاریخ الخلفا میں علامہ جلال الدین سیوطی لکھتے ہیں کہ آپ کی اہلیہ فاطمہ بنت عبدالملک کے پاس موتیوں کا ایک ہار تھا جو اُن کے باپ خلیفہ عبدالملک نے اُنہیں دیا تھا، آپ نے وہ ہار لے کر اپنی شریک ِ حیات سے کہا ”تم اور یہ ہار، دونوں ایک ساتھ نہیں رہ سکتے“…این آر او کے ایسے چیتھڑے اُڑے کہ بنی امیہ کے تقریباً ڈیڑھ سو افراد عالی شان مکانوں سے نکل کر ”فٹ پاتھ“ تک آگئے … اِن میں سے بعض تو صوم و صلوٰة کے پابند اور متقی بھی تھے مگر قانون کی عملداری میں آپ نے اُن کی بھی ذرہ برابر پرواہ نہیں کی اور یہ صورت حال اُ س وقت تک جاری رہی جب تک کہ آپ کی ”پراسرار شہادت“ نہ ہوگئی…
حضرت عمر بن عبدالعزیز  نے مفاہمتی قانون کا ایسا خاتمہ کیا کہ ظالم اور غاصب امراء و عمال سخت تعزیری سزاؤں سے بچ نہ سکے…حجاج بن یوسف کا خاندان جو ظلم و زیادتی میں مشہور تھا اُس کو جلا وطن کردیاگیا…یمن کے والی عبدالحمید کو رقعہ لکھا کہ ”وسوسہٴ شیطانی اور حکومت کے ظلم و جور کے بعد انسا ن کی بقا نہیں ہوسکتی اِ س لیے میرا خط ملتے ہی ہر حق دار کو اُس کا حق دو اور ہر غاصب کو برطرف کردو“…فارس کے امرا کو لکھا کہ ”خبردار! میں اب یہ نہ سنوں کہ چندمنظورِ نظر افراد کو فائدہ پہنچانے کے لیے عذائی اجناس کے نرخوں میں اضافہ کردیاگیا ہے ، اگر ایسا ہوا تواللہ کا قانون نافذ کرنے میں عمر پیچھے نہیں رہے گا“…
صدر صاحب ایک سوال ہے اور چونکہ آپ ہمارے ملک میں ”سب سے بڑے“ ہیں ، شاید مجھے اِس کا جواب دے سکیں کہ”جب انسان اپنی خواہش سے دنیا میں نہیں آتا اور نہ ہی اُس کی مرضی سے موت آئے گی توپھر وہ پیدائش اور موت کا درمیانی وقفہ اپنی مرضی سے کیوں جینا چاہتا ہے ؟
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــ
ڈاکٹر عامر لیاقت حسین-روزنامہ جنگ