جنرل خالد بن ولید کو کسی اور نے نہیں رسول اللہ نے سیف اللہ کا خطاب دیا تھا۔ جنرل خالد بن ولید کی فوجوں نے پہلے پورا جزیرہ نما عرب، اس کے بعد ایران کی ساسانی سلطنت اور پھر مشرقی رومن سلطنت کو کھدیڑ ڈالا اور لاکھوں مربع میل خلافتِ راشدہ میں شامل کردیے۔ شمال تا جنوب یہ تاثر پھیل گیا کہ جہاں خالد بن ولید کے قدم پہنچیں گے فتح یقینی ہے۔
جب خلیفہ دوم حضرت عمر تک یہ بات پہنچی تو انہوں نے خالد بن ولید سے عین اس وقت کمان لے کر ابوعبیدہ ابنِ جراح کے حوالے کردی جب ناقابلِ تسخیر خالد کا لشکر مدینہ سے ہزاروں میل دور رومی سلطنت کے اہم مرکز دمشق کو فتح کرنے کی لڑائی کے آخری مرحلے میں الجھا ہوا تھا۔
حضرت عمر سے پوچھا گیا یہ آپ نے کیا کیا ؟ کہنے لگے کامیابی و ناکامی تو اللہ کے ہاتھ میں ہے۔ یہ انسان کے بس کی بات کب سے ہوگئی۔

فرانسیسی مدبر اور پہلی عالمی جنگ کے دور میں وزیرِ اعظم رہنے والے جارج کلیمنشیو کا یہ فقرہ لاکھوں بار دہرایا جاچکا ہے کہ جنگ ایک سنجیدہ کام ہے اسے جنرلوں پر نہیں چھوڑا جاسکتا۔

جب اٹھارہ سو اکسٹھ میں امریکی خانہ جنگی شروع ہوئی اور وفاق عملاً معطل ہوگیا۔ ملک شمال اور جنوب میں بٹ گیا تو صدر ابراہم لنکن کی فوج کے سربراہ جنرل ارون میکڈوول تھے۔

چار سالہ جنگ کے دوران صدر لنکن نے سات جرنیل تبدیل کیے۔ ان میں جنرل جارج میڈ جیسا باصلاحیت اور جری کمانڈر بھی تھا جس نے گیٹس برگ کی جنگ جیت کر وفاق مخالف قوتوں کی شکست کا راستہ ہموار کیا۔

لیکن صدرِ مملکت ان کی کارکردگی سے بھی مطمئین نہ ہوئے اور جب جنگ ختم ہوئی تو جنرل یولیسس گرانٹ نے باغی جنوب کے آخری دستوں سے ہتھیار رکھوائے۔ کسی نے ابراہم لنکن سے نہیں پوچھا کہ عین جنگ میں چار سال کے دوران سات جرنیل یکے بعد دیگرے کیوں تبدیل کردیے ۔

اگر دوسری عالمی جنگ کا کوئی ایک امریکی فوجی ہیرو چنا جائے تو بلاشبہہ وہ جنرل ڈگلس میک آرتھر ہوگا۔ جس نے پورا بحرالکاہل جاپانیوں سے خالی کروایا۔ فلپینز آزاد کروایا ۔جاپان پر قبضہ کیا اور یورپ میں لڑنے والے اتحادیوں کو موقع دیا کہ وہ پوری توجہ ہٹلر کے خلاف مبذول کرسکیں۔

سن پچاس میں جنگِ کوریا شروع ہوئی تو جنرل میک آرتھر کو شمالی کوریا سے نبرد آزما اتحادی افواج کی قیادت دی گئی۔ لیکن ایک برس بعد عین اس وقت جب جنگ کا پانسہ کسی بھی طرف پلٹ سکتا تھا، صدر ٹرومین نے جنگی پالیسی پر جنرل میک آرتھر کے اظہارِ ناپسندیدگی کو مسترد کرتے ہوئے انہیں کمان سے برخواست کردیا اور جنرل رج وے کو کمان دے دی۔

کتنےعجیب تھے وہ رہنما جو عین حالتِ جنگ میں اپنے کمانڈر بدل دیتے تھے۔

آپ سمجھ تو گئے ہوں گے!!

وسعت اللہ خان
بی بی سی اردو