پاکستانی ریاست اور معاشرہ اس وقت جس بحران سے گزر رہے ہیں وہ بلاشبہ معاشی بھی ہے اورسیاسی بھی ۔ لیکن اس سے بڑھ کر یہ بحران اخلاقی بھی ہے اورنظریاتی بھی ۔ لہذا جس طرح قوم سیاسی و معاشی مسائل کر غور کرتی ہے اسی طرح اسے اخلاقی اور نظریاتی بحرانوں پر بھی غور کرنا چاہیے تاکہ ہم اور ہمارا معاشرہ ان گھبیر مسائل سے نکل سکے

پاکستان کی دینی قوتوں کو 'انکے کام کے حوالے سے' تین گروپوں میں تقسیم کیا جا سکتا ہے۔
اہل سیاست، اہل تبلیغ اور اہل تعلیم (مدارس)۔ ان میں سے اول الذکر تینوں شعبوں میں کام کرنے کا دعوی بھی کرتے ہیں۔

اہل سیاست: جہاں تک اس دینی قوتوں کا معاملہ ہے بلاشبہ انہوں نے تعمیری اور مفید کام بھی کیے ہیں مثلا ََ اس وقت آئین میں جتنی بھی اسلامی شقیں موجود ہیں اور جتنے بھی اسلامی قوانین اور ادارے کام کر رہے ہیں وہ انہی کی جدو جہد کا ثمر ہیں۔ لیکن انکئ تعمیری کوششوں کے باوجود یہ بھی ایک تلخ حقیقت ہے کہ دینی سیاسی جماعتیں بہت کچھ نہیں بھی کر سکیں مثلا ََ وہ متحد نہیں کو سکیں۔ وہ قومی سطح پر ایسی قوت نہیں بن سکیں کہ وہ حکومت سے اپنی ترجیحات منوا سکیں
ان دینی سیاسی قوتوں کی ناکامی کی مندرجہ ذیل وجوہات پیس کی جا سکتی ہیں
1۔ اکثر دینی سیاسی جماعتیں فقہی اور مسلکی بنیادوں پر قائم ہیں لہذا انکو دوسرے مسلک کے لوگ ووٹ نہیں دیتے ۔ یوں ان میں سے کسی کی بھی کامیابی کا امکان نہیں رہتا۔ کیونکہ یا تو ووٹ بینک تقسیم ہو جاتا ہے یا پھر سیکولر جماعتیںووٹ لے جاتی ہیں۔
2۔ اکثر جماعتیں ایسی پالیسیاں اور رویے بنانے میں کامیاب نہیں ہو سکیں کہ جس سے عوام کو یقین ہو سکے کہ یہ انکے مسائل حل لر سکیں گی
3۔ بعض جماعتوں کے قائدین اخلاص اور اخلاقی ساکھ سے محروم ہیں اور عوام میں انکے حب مال و جاہ کے قصے ہر سو گردش کرتے رہتے ہیں۔
4۔ اس سے بھی انکار نہیں کیا جا سکتا کہ انکا اتحاد نہ ہو سکنے کا ایک سبب بیرونی و اندرونی مداخلت بھی ہے۔۔
5۔ اس کے علاوہ ایک تاثر یہ بھی ہے کہ ان جماعتوں کو اسٹیبلشمنٹ اپنے مقاصد کے لیے استعمال کر جاتی ہے۔

ان احوال کی اصلاح کیسے کی جائے؟

اگر اہل دین دو امور کی اصلاھ کر لیں تو شاید باقی میں بھی اصلاح کا سبب بن سکے
1 - وہ مسلک کی بنیاد پر بنی تمام سیاسی جماعتیں ختم کر کے شُوریٰ اورمشترکہ ایشوز پر ایک دینی سیاسی جماعت بنا لیں۔ ان ایشوز کا تعین کوئی مشکل کام نہیں مثلا ََ نفاذ شریعت، بد امنی، مہنگائی ،جاگیر داری اور سرمایداری کا خاتمہ وغیرہ
2۔ یہ کہ دینی جامعتیں اپنے اندر خود احتسابی کو رواج دیں۔ اگر کسی لیڈر کے بارے میں ثابت ہو جائے کہ وہ ملی و قومی مفاد پر اپنے مفاد کو ترجیح دیتا ہے اور شوریٰ کو نظر انداز کرتا ہے تو اس کو بلا توقف باہر کر دیں۔ یہ احتساب شرعی تقاضہ بھی ہے۔

اہل تبلیغ/ اہل دعوت و اصلاح
یہ تمام دینی جماعتوں کی بنیادی ذمہ داری ہے کہ ہر انسان تک دین اسلام کا پیغام پہنچائیں۔ اور ماشا اللہ سے آج بھی پاکستان میں دینی لحاظ سے کسی قسم کا کوئی بھی شعور، رونق یا سرگرمی پائی جاتی ہے وہ انہی دینی جماعتوں کی وجہ سے ہی ہے۔ لیکن یہ بھی ایک حقیقت ہے کہ بگاڑ کی قوتیں اس قدر طاقتوراور منظم ہیں اور انہوں نے جدیدیت اور روشن خیالی کے پیروکار اصحاب اقتدار کو ایجنت بنا کر پوری ریاستی قوت کو بگاڑ کے راستے پر لگا رکھا ہے۔ مثلا ََ الیکٹرونک اور پرنٹ میٰڈیا کے ذریعے، نظام تعلیم میں تبدیلی کے ذریعئے ( داؤد پبلک سکول :شرم اور فخر) غلط معاشی،قانونی اور دیگر تدابیر کے ذریعے دینی قوتوں دینی قوتوں کی اصلاحی و دعوتی سرگرمیوں کو ناکام و غیر موثر بنا کر رکھ دیا ہے۔ ہمارے معاشرے کے اکثر افراد و طبقات دینی و اخلاقی لحاظ سے بد سے بدتر ہوتے جا رہے ہی۔

ایسے میں ضرورت اس بات کی ہے کہ تمام قسم کی تحریکیں آپس میں سر جوڑ کر بیٹھیں، متحد و منظم ہوں، اپنی دعوتی و اصلاحی پالیسیوں کا جائزہ لیں اور انہیں موثر بنانے پر غور و فکر اور فیصلے کریں۔
دینی جماعتوں کی دعوتی و اصلاحی سرگرمیاں بڑی حد تک غیر موثر ہو چکی ہیں اور لادین مغربی تہذیب کا سیلاب اسلامی اقدار و روایات کو بہائے لیے جا رہا ہے۔ اس لیے اگر اب بھی دینی قوتوں نے عقل کے ناخن نہ لیے تودینی لحاظ سے مستقبل مخدوش بلکہ تاریک نظر آ رہا ہے۔
مثلا ََ دینی قوتیں بتائیں کہ اکثر محض لوگوں کو کلمے یاد کروا یا انکے کلمے ٹھیک کروا رہے ہیں (بلا شبہ یہ بھی ایک اہم کام ہے) مگر ہمارے الیکٹرونک میڈیا نے فحاشی و عریانی کا جو طوفان کھڑا کر رکھا ہے، ٹی وی انٹرنیت کے موجودہ حالات میں اسلام کی حیا اور عفت جیسے بینادی اقدار کیسے سلامت رہ سکتی ہیں؟ ہماری تعلیم جس طرح ویسٹرنائز، مخلوط اور غلط اقدار ( داؤد پبلک سکول :شرم اور فخر ) پر مبنی ہوتی جا رہی ہیں ان حالات میں یہ ہمارے بچے بچیوں کو کس حد تک مسلمان رہنے دے گی؟ مخلوط تعلیم، مغربی نصاب، بے پردہ اور فیشن زدہ استانیاں، مغرب زدہ یونیفارم، مغربی زبان میں تعلیم، جیسے عوامل ہمارے بچوں بچیوں کو کس حد تک اچھا مسلمان بنا سکیں گے؟
ان دینی جماعتوں نے عوام کو اس زہر سے بچانے کے لیے کیا قدامات کیے ہیں؟ کیا محض مساجد کے باہر پمفلٹ تقسیم کر دینے، جمعہ کا خطبہ دے دینے اور کلمہ یاد کروا دینے سے ہم لوگوں کو اچھا مسلمان بنا لیں گے۔ اس معاملے کا سب سے ہولناک پہلو یہ ہے کہ دینی قوتوں کی ناکامی کی وجہ سے ادھورے علم رکھنے والے لوگ مایوس ہو کرتبدیلی لانے کے لیے اسلحہ اٹھا چکے ہیں۔ جس کا نتیجہ دونوں طرف سے مسلمانوں کے خون کا زیاں ہے۔

بشکریہ اور تلخیص از روزنامہ امت کراچی