نیو یارک ٹائمز کے لیے کام کرنے والے امریکی ساتھی صحافی نکولس شمیڈل کو پاکستانی حکام نے ملک بدر کردیا ہے، وہ کل پاکستان سے روانہ ہوچکے ہیں‌ امید ہے کہ وہ آج یہاں واشنگٹن ڈی سی پہنچ جائیں گے۔ انہوں نے ایک آرٹیکل بنام ’’نیکس جین طالبان Nex Gen Taliban‘‘ لکھا تھا جو نیو یارک ٹائمز میگزین کے اتوار کے ایڈیشن میں پبلش ہوا۔
نکولس شمیڈل واشنگٹن پہنچتے ہی ایک پینل ڈسکشن میں‌ شرکت کریں گے جس کا عنوان ’’پاکستان اِن پیرل Pakistan in Peril‘‘ رکھا گیا ہے۔ اس پروگرام میں‌ معروف صحافیوں اور پاکستانی امور کے ماہرین اسٹیو کول اور پیٹر برگن کو مدعو کیا گیا ہے۔ پروگرام میں‌ بش ایڈمنسٹریشن سے تعلق رکھنے والے نیشنل سیکیورٹی کونسل کے سابق سینئر عہدیدار فلینٹ لیویریٹ بھی شرکت کریں‌ گے۔
نکولس شمیڈل کو ان کی ڈی پورٹیشن سے قبل پاکستان کی انٹیریئر منسٹری (وزارت داخلہ) نے نامعلوم وجوہات کی بناء پر ملک چھوڑنے کا حکم دیا۔ تاہم امریکن جرنلسٹ برادری یہی سمجھتی ہے کہ انہیں ان کے آرٹیکل کی وجہ سے ڈی پورٹ‌ کیا گیا ہے۔ کئی سالوں بعد پہلی بار کسی امریکی صحافی کو پاکستان بدر کیا گیا ہے۔ اس سے قبل پاکستانی حکام برطانوی روزنامہ ٹیلی گراف کے صحافیوں کو بھی ڈی پورٹ‌کر چکے ہیں۔
یہ پہلی بار نہیں‌ ہے کہ پاکستانی حکام نے غیر ملکی صحافیوں کو نشانہ بنایا ہو۔ اس سے قبل نیو امیریکن فائونڈیشن کی ایلیزا گریسوالڈ‌ کو زیر حراست رکھا جا چکا ہے، 2006ء میں سی این این کے ٹیررازم اینالسٹ پیٹر برگن کو پاکستانی ویزا دینے سے انکار کردیا گیا تھا جبکہ کوئٹہ میں سینئر امریکی صحافی اور مڈل ایسٹ‌ امور کے ماہر نیر روسن کو مبینہ طور پر پاکستانی ایجنسیوں کے حکام نے متنبہ کیا تھا کہ وہ جلد از جلد پاکستان چھوڑ دیں بصورت دیگر وہ دوسرے ’’ڈینیئل پرل‘‘ بن سکتے ہیں۔