ارشاد احمد عارف


کشمالہ طارق اور ریاض فتیانہ تو ان دنوں جماعتی ڈسپلن سے آزاد ہیں۔ لالہ کشن چندکے بارے میں، میں جانتا نہیں کہ ان کا تعلق کس جماعت یا دھڑے سے ہے لیکن مخدو م جاوید ہاشمی اور خواجہ سعد رفیق نے سیاسی جماعتوں میں اندرونی انتخابات کی پابندی کے حق میں ووٹ دے کر خطرے کی گھنٹی بجا دی ہے۔ مسلم لیگی قیادت کی نظروں میں جاوید ہاشمی مس گائیڈڈ میزائل ہے جبکہ خواجہ سعد رفیق عرصہ د راز تک معتوب رہنے کے بعد اب بمشکل راہ ِراست پر آیا ہے۔دیکھنا یہ ہے کہ سردار ذوالفقار کھوسہ اور چودھری نثار علی خان ہاشمی اور خواجہ کی اس آزاد روی کو کیا رنگ دیتے اور میاں صاحب کے سامنے کس انداز میں پیش کرتے ہیں، یہی دونوں آج کل شریف برادران کی آنکھ اور کان ہیں چاہیں تو ہاشمی اور خواجہ کو ڈسپلن کی خلاف ورزی کا نوٹس جاری کریں اور دل کرے تو ان کی گستاخی کو طفلانہ شوخی قرار دے کر نظرانداز کردیں۔

قومی اسمبلی کے 292 ارکان نے اٹھارہویں آئینی ترمیم منظور کرکے 1973 کے آئین کو جنرل ضیاء الحق اور جنرل پرویز مشرف کی آمرانہ فوجی تجاوزات سے بڑی حد تک پاک کردیا ہے۔ مکمل صفائی اس لئے نہیں ہوسکی کہ ہماری سیاسی جماعتیں کڑوا کڑوا تھو میٹھا مٹھا ہپ کی عاد ی ہیں۔ سیاسی جماعتوں میں اندرونی انتخابات کی پابندی کسی کو پسند نہیں تھی۔ اس شق کو 278ارکان نے دیس نکالا دے دیا تاکہ شخصی حکمرانی، موروثی سیاست اور خاندانی قیادت کے رسیا ہمارے قومی سیاستدان اپنی جماعتوں کو جنرل ایوب خان، جنرل ضیاء الحق اور جنرل پرویز مشرف کی طرح چلا سکیں۔

فوجی آمروں کے ہاتھ میں چھڑی اور تن پر وردی تھی جبکہ ہمارے سیاسی و جمہوری بادشاہوں کے ہاتھ میں پولیٹیکل پارٹیز ایکٹ کا کوڑا ہے جسے و ہ ہر اس رکن اسمبلی کی پشت پر بے دردی سے برسا سکتے ہیں جو ان کی رائے سے اختلاف یا اپنی جمہوری سوچ پر اصرار کرے۔ اٹھارہویں آئینی ترمیم کے ذریعے سیاسی جماعتوں کے قائدین کو یہ اختیار دیا گیا ہے کہ وہ عوام تو درکنار اپنی پارٹی کے کارکنوں پر انتخابی سند حاصل کئے بغیر کسی بھی منتخب رکن پارلیمینٹ کی رکنیت ختم کرسکتے ہیں۔ ان کے جاری کردہ پروانہ ٴ نا اہلی کی اطاعت سپیکر اور چیف الیکشن کمشنر پر واجب ہے۔

اگرچہ ایل ایف او کے تحت سیاسی جماعتوں میں اندرونی انتخابی عمل کی پابندی کبھی کسی بڑی سیاسی جماعت نے نہیں کی۔ جماعت اسلامی اس پابندی کے پہلے ہی انتخابی عمل جاری رکھے ہوئے ہے اور یہاں خاندانی قیادت کا رواج نہیں لیکن اس پابندی کی وجہ سے سیاسی جماعتوں کو فائل کا پیٹ بھرنا پڑتا تھا جو ہماری جمہوری قیادت کو گوارا نہ تھا اس لئے سیاسی جاگیرداروں نے یہ شق ختم کرا دی مبادا کسی مرحلہ پر جاوید ہاشمی، سعد رفیق، اعتزاز احسن اور رضا ربانی جیسا کوئی جمہوریت پسند کارکن اپنی قربانیوں اور جدوجہد کے بل بوتے پر قیادت کے خواب دیکھنا شروع کردے۔

فوجی آمر تو دنیا کو دکھانے اور اپنی حکمرانی کا جواز پیش کرنے کے لئے ریفرنڈم یا انتخابات کا تکلف کرتے ہیں مگر ہمارے مقدس سیاسی خانوادے اسے کسرشان سمجھتے ہیں۔ وہ عامتہ الناس کو یہ موقع دینے کے لئے تیار ہیں کہ پولنگ بوتھ پر جا کر ٹھپہ لگائیں لیکن کسی سیاسی کارکن کو اس قابل نہیں سمجھتے کہ وہ بیچارہ ووٹ کے ذریعے کسی کو قیادت کا منصب سونپے۔ اس کا کام صرف دریاں بچھانا، نعرے لگانا اور بوقت ِ ضرورت حوالات اور جیل میں پولیس و دیگر ریاستی اداروں کی اذیتیں برداشت کرنا ہے۔ سیاسی کارکن پیدا ہی مار کھانے کے لئے ہوتا ہے سو وہ اب تک کھاتا چلا آرہا ہے۔

اس طرح کی خامیوں، امتیازی قوانین اور آمرانہ رویوں کی وجہ سے ملک کا آئین، جمہوری عمل اور سیاسی ڈھانچہ تقدس حاصل نہیں کرسکا۔ عوام اس کے تحفظ کے لئے سینہ سپر ہوں تو کیونکر ان کی نظر میں یہ مراعات یافتہ طبقے کا کھیل ہے۔ کسی عامی کو اس سے کیا لینا دینا۔ اگر اٹھارہویں آئینی ترمیم کے ذریعے سیاسی جماعتوں میں انتخابات کی پابندی کو برقرار رہنے دیا جاتا تو میاں نواز شریف، آصف علی زرداری، چودھری پرویز الٰہی، مولانا فضل الرحمن اور اسفندیار ولی کو خاص فرق نہ پڑتا۔ 2002 سے اب تک اس شق کی موجودگی میں بھی خاندانی اور موروثی قیادت پوری آب و تاب سے موجود ہے۔ صرف فوجی آمر ایوب خان اور ضیاء الحق کے صاحبزادے انتخابی کامیابی کے محتاج ہیں او ر رکن اسمبلی بن کر ہی کسی سیاسی جماعت میں اپنی جگہ بنا سکتے ہیں۔ بلاول زرداری، حمزہ شہباز، مونس الٰہی رکن اسمبلی ہوں نہ ہوں پوری جماعت ان کے اشارہ ٴ ابرو پر چلتی ہے۔ ہمارے سیاسی کلچر میں بیٹی، بیٹا تو کیا داماد بھی ما ن نہیں۔ پارٹی لیڈر کا داماد ، پارٹی کا داماد اور شوہر، پارٹی رہنما کا مجازی خدا سمجھا جاتا ہے۔ اس کی عزت، گھر اورخاندان میں ہو نہ ہو پارٹی میں بہت زیادہ ہوتی ہے۔ بسا اوقات حقیقی اولاد سے زیادہ۔ صنم بھٹو اور مرتضیٰ بھٹو اس کی نمایاں مثال ہیں۔

کل کلاں کو موروثی قیادت کے آئینی تحفظ کی یہ شق مساوی انسانی حقوق کے منافی ہونے کی وجہ سے عدالت ِ عظمیٰ میں چیلنج ہوگئی تو پارلیمینٹ اور عدلیہ میں تصادم کے نعرے بلند ہوں گے۔ پارلیمینٹ کی بالادستی کا شور مچے گا اور سیای قائدین کو گلہ ہوگا کہ عدالتیں موروثی قیادت کے رنگ میں بھنگ ڈالنا چاہتی ہیں لیکن سوال یہ ہے کہ سلطانی جمہوری کے علمبردار ہمارے مقبول و معتبر رہنما اکیسویں صدی میں سولہویں صدی کی خاندانی سیاست کے مرض میں کیوں مبتلا ہیں اور اس پسماندہ سچ سے چھٹکارا کیوں نہیں پاتے۔ وہ اپنی ناک سے آگے دیکھنے کی اہلیت نہیں رکھتے یا اپنی اپنی جماعتوں میں موجود نیک نام، ایثار پیشہ اور فوجی آمروں کے مدمقابل پورے قد سے کھڑے ہونے والے مردان کار سے خوفزدہ ہیں جو کسی نہ کسی روز ملک میں جمہوریت کی مضبوطی کے لئے سیاسی جماعتوں میں جمہوریت کا نعرہ بلند کرسکتے ہیں لیکن یہ تو بالآخر ہوگا کہ نوشتہ ٴ دیوار ہے۔

ـــــــــــــــــــــــــ ـــــــــــــــــــــــــ ـــــــــــــــــــــــــ ــــــــــــــــــــــ
روزنامہ جنگ۔

__________________


http:// haroonazam.wordpress.com

ھارون اعظم کا بلاگ۔