پاکستان کے چیف جسٹس افتخار محمد چوہدری کی سربراہی میں ایک چھ رکنی بنچ نے گذشتہ ماہ قومی اسمبلی کے دو اور پنجاب اسمبلی کے ایک رکن کے خلاف اس مقدمے کی شنوائی کی کہ انہوں نے دو ہزار آٹھ کے عام انتخابات میں جعلی یا مشکوک تعلیمی اسناد کی بنیاد پر حصہ لیا۔ تینوں نے سزا سے بچنے کے لئے اپنی پارلیمانی نشستوں سے استعفی دے دیا۔


پاکستان کے صدر آصف علی زرداری، انھوں نے جعلی اسناد رکھنے والوں کو پھر الیکشن لڑنے کے لیے ٹکٹ دیئے

ان میں سے ایک رکنِ قومی اسمبلی نذیر جٹ ہیں جن پر الزام تھا کہ انہوں نے پاکستان کے زیرِ انتظام کشمیر کی الخیر یونیورسٹی کی حاصل کردہ ڈگری کے مندرجات میں ہیراپھیری کی کوشش کی۔جبکہ فیصل آباد سے رکنِ صوبائی اسمبلی محمد اجمل پر الزام تھا کہ انہوں نے دارالعلوم محمودیہ بنوں کی غیر تسلیم شدہ سند کی بنیاد پر الیکشن لڑا۔ مظفر گڑھ سے رکنِ صوبائی اسمبلی اللہ وسایا لغاری عرف چنو خان کو بھی مشکوک تعلیمی سند کے سبب اپنی نشست سے ہاتھ دھونے پڑے۔جبکہ مظفر گڑھ سے ہی رکنِ قومی اسمبلی اور قومی اسمبلی کی سپورٹس کمیٹی کے چیرمین جمشید دستی کو بھی اپنی نشست گنوانی پڑی۔ کیونکہ وہ سپریم کورٹ کے روبرو اپنی مذہبی مدرسے سے حاصل کردہ ڈگری اصلی ثابت کرنے میں ناکام رہے۔

لیکن یہ کوئی خاص خبر نہیں۔ایسا اکثر ہوتا آیا ہے۔خبر اصل میں یہ ہے کہ پیپلز پارٹی کے پارلیمانی بورڈ نے ایوانِ صدر میں اجلاس کے دوران فیصلہ کیا کہ نذیر جٹ ، اللہ وسایا لغاری اور جمشید دستی اپنی ہی خالی کردہ نشستوں سے پیپلز پارٹی کے ٹکٹ پر ضمنی انتخاب لڑیں گے۔ یہ فیصلہ پیپلز پارٹی کے پارلیمانی بورڈ نے شریک چیرمین آصف علی زرداری کی ہدائیت پر کیا۔ جن کے بارے میں حتمی طور سے طے نہیں ہے کہ انہوں نے اکنامکس اینڈ بزنس ایڈمنسٹریشن میں گریجویشن لندن کے غیر تسلیم شدہ پیڈنٹن سکول سے کی یا کراچی کے سینٹ پیٹرکس کالج سے کی۔

ڈاکٹر بابر اعوان نے پی ایچ ڈی کی ڈگری انیس سو اٹھانوے میں بذریعہ خط و کتابت کورس امریکہ کی ’یونیورسٹی آف مونٹی سیلو‘ سے حاصل کی۔ جس کے بارے میں یونائیٹڈ سٹیٹس ایجوکیشن فاؤنڈیشن کا کہنا ہے کہ سن دو ہزار میں یونورسٹی آف مونٹی سیلو کو ایک اعشاریہ سات ملین ڈالر جرمانہ عائد کرکے بند کردیا گیا تھا۔لیکن بابر اعوان آج بھی خود کو ڈاکٹر صاحب کہلوا کر خوشی محسوس کرتے ہیں۔
پارلیمانی بورڈ کے اجلاس میں وفاقی وزیرِ قانون ڈاکٹر بابر اعوان نے بھی بورڈ کا رکن نہ ہونے کے باوجود شرکت کی۔ خود ڈاکٹر بابر اعوان نے پی ایچ ڈی کی ڈگری انیس سو اٹھانوے میں بذریعہ خط و کتابت کورس امریکہ کی ’یونیورسٹی آف مونٹی سیلو‘ سے حاصل کی۔ جس کے بارے میں یونائیٹڈ سٹیٹس ایجوکیشن فاؤنڈیشن کا کہنا ہے کہ سن دو ہزار میں یونورسٹی آف مونٹی سیلو کو ایک اعشاریہ سات ملین ڈالر جرمانہ عائد کرکے بند کردیا گیا تھا۔ کیونکہ یہ ادارہ ڈگری پروگرام شروع کرنے کا مجاز نہیں تھا۔ پاکستان کے ہائر ایجوکیشن کمیشن کا بھی کہنا ہے کہ ڈاکٹر بابر اعوان کا کوئی قصور نہیں کیونکہ انکی طرح ہزاروں طلبا ’یونیورسٹی آف مونٹی سیلو‘ کی دھوکہ دہی کا شکار ہوئے۔ لیکن بابر اعوان آج بھی خود کو ڈاکٹر صاحب کہلوا کر خوشی محسوس کرتے ہیں۔

ایوانِ صدر کے پارلیمانی بورڈ اجلاس میں وزیرِ اعظم یوسف رضا گیلانی بھی شریک ہوئے۔ جنہوں نے جعلی ڈگری یافتہ جمشید دستی کی خالی کردہ نشست پر اپنے بھائی مجتبی گیلانی کو ٹکٹ دلوانا چاہا۔ اور مجتبی گیلانی کی راہ ہموار کرنے کے لئے جمشید دستی کو اپنا مشیر برائے لائیو سٹاک اور فشریز بنانے کی بھی پیش کش کی۔ لیکن وزیرِ اعظم کو شائد یہ یاد نہ رہا کہ کچھ ماہ پہلے ہی جمشید دستی کو قومی اسمبلی کی سپیکر فہمیدہ مرزا نے تین دن کے لئے قومی اسمبلی کی رکنیت سے معطل کردیا تھا۔ کیونکہ جمشید دستی نے پارٹی کے شریک چیرمین آصف زرداری کی ہمشیرہ فریال تالپور کے خلاف متنازعہ ریمارکس پر قومی اسمبلی کے ایوان میں مسلم لیگ ق کے پارلیمانی لیڈر فیصل صالح حیات کا گریبان پکڑنے کی کوشش کی تھی۔ یہ بات پارٹی ہائی کمان بھلا کیسے بھول سکتی تھی۔

اگرچہ جمشید دستی ’شہادت العالمیہ‘ کی ایم اے کے برابر ڈگری رکھنے کے باوجود بھی سپریم کورٹ کے بنچ کے سامنے قرآن کے پہلے پانچ سپاروں اور پہلی دو سورتوں کا نام درست نہیں بتا سکے اور انہوں نے جعلی ڈگری کی سزا سے بچنے کے لئے ازخود قومی اسمبلی کی نشست خالی کردی۔ لیکن جمشید دستی نے جئیو ٹی وی چینل کے پروگرام ’عالم آن لائن‘ کے میزبان اور مشرف دور کے سابق وزیرِ مملکت برائے مذہبی امور ڈاکٹر عامر لیاقت حسین کے سامنے قرآنی معلومات سے متعلق تمام سوالوں کے درست جوابات دیئے۔


جمشید دستی جنھیں جعلی ڈگری کے باعث قومی اسمبلی کی رکنیت سے مستعفیٰ ہونا پڑا تھا

خود ڈاکٹر عامر لیاقت حسین کا شمار بھی صاحبِ کرامت شخصیات میں ہوتا ہے۔ اس سے پہلے وہ یہ کرامت بھی دکھا چکے ہیں کہ سپین کے ٹرنٹی کالج اینڈ یونیورسٹی سے ڈاکٹر عامر لیاقت حسین کو پندرہ مارچ دو ہزار دو کو ایم اے اسلامک سٹڈیز کی ڈگری عطا ہوئی اور پھر اکیس روز بعد اسی یونیورسٹی نے ڈاکٹر صاحب کو اسلامک سٹڈیز میں ڈاکٹریٹ کی ڈگری سے بھی سرفراز کر ڈالا۔ انہی اسناد کی بنیاد پر ڈاکٹر عامر حسین دو ہزار دو کی قومی اسمبلی کے لئے منتخب ہو کر منزلِ وزارت تک پہنچے۔ یہ واقعہ بھی کرامت سے کم نہیں کہ ڈاکٹر صاحب کی مذکورہ دونوں ڈگریوں کی کراچی یونیورسٹی نے ایک ہی دن میں عبوری تصدیق بھی کردی۔ مگر ہائر ایجوکیشن کمیشن آف پاکستان کی تسلیم شدہ تعلیمی اداروں کی فہرست میں سپین کے ٹرنٹی کالج اینڈ یونیورسٹی کا آج بھی کوئی وجود نہیں ۔

اٹھائیس مارچ کو پیپلز پارٹی سے تعلق رکھنے والے پنجاب کے وزیرِ محنت اشرف سوہنا نے پنجاب اسمبلی کے فلور پر کہا کہ اسوقت اسمبلیوں کے چالیس کے لگ بھگ ارکان کے خلاف جعلی تعلیمی ڈگریوں کے مقدمات زیرِ التوا ہیں اور پیپلز پارٹی اور مسلم لیگ ن کو ٹکٹ دیتے وقت یہ بات دھیان میں رکھنی چاہیے۔ اس پر پنجاب کے وزیرِ قانون رانا ثنا اللہ نے یہ قانونی دلیل دی کہ ایک تو انتخاب لڑنے کے لئے بی اے کی ڈگری کی شرط دو ہزار آٹھ کے انتخابات کے بعد ختم ہوچکی ہے۔ دوم یہ کہ کوئی سیانا سیاستداں ڈگری کا محتاج نہیں ہوتا۔۔۔۔۔۔
ـــــــــــــــــــــــــ ـــــــــــــــــــــــــ ــــــــــــــــــ
وسعت اللٰہ خان - بی بی سی

__________________


http:// haroonazam.wordpress.com

ھارون اعظم کا بلاگ۔