ایک بلاگ پر یہ نظم پڑھی جو آپ کے لیے یہاں کاپی پیسٹ کر رہا ہوں:

شکوہء امریکا

کیوں گنہگار بنوں، ویزا فراموش رہوں
کب تلک خوفزدہ صورتِ خرگوش رہوں
وقت کا یہ بھی تقاضا ہے کہ خاموش رہوں
ہمنوا‌ ! میں‌ کوئی مجرم ہوں کہ روپوش رہوں

شکوہ امریکا سے خاکم بدہن ہے مجھ کو
چونکہ اس ملک کا صحرا بھی چمن ہے مجھ کو

گر ترے شہر میں‌ آئے ہیں تو معذور ہیں ہم
وقت کا بوجھ اٹھائے ہوئے مزدور ہیں ہم
ایک ہی جاب پر مدت سے بدستور ہیں ہم
بش سے نزدیک، مشرف سے دور ہیں‌ ہم

یو ایس اے شکوہء ارباب وفا بھی سن لے
لبِ توصیف سے تھوڑا سا گلہ بھی سن لے

تیرے پرچم کو سرِ عرش اڑایا کس نے؟
تیرے قانون کو سینے سے لگایا کس نے؟
ہر سینیٹر کو الیکشن میں‌ جتایا کس نے؟
فنڈ ریزنگ کی محافل کو سجایا کس نے؟

ہلیری سے کبھی پوچھو، کبھی چک شومر سے
ہر سینیٹر کو نوازا ہے یہاں ڈالر سے

جیکسن ہائیٹس کی گلیوں کو بسایا ہم نے
کونی آئی لینڈ کی زینت کو بڑھایا ہے نے
گوریوں سے ہی نہیں‌ عشق لڑایا ہم نے
کالیوں سے بھی یہاں عقد رچایا ہم نے

آکے اس ملک میں رشتے ہی فقط جوڑے ہیں
بم تو کیا ہم نے پٹاخے بھی نہیں‌ چھوڑے ہیں

جب برا وقت پڑا ہم نے سنبھالی مسجد
کب تلک رہتی مسلمان سے خالی مسجد
جب گھر سے بہت دور ہوئی بلالی مسجد
ہم نے تہہ خانے (بیسمنٹ) میں‌ چھوٹی سی بنالی مسجد

ہم نے کیا جرم کیا اپنی عبادت کے لیے
صرف میلاد کیا جشنِ ولادت کے لیے

ہم نے رکھی ہے یہاں امن و اماں کی بنیاد
ہر مسلمان کو ’’یو ایس‘‘ میں پڑی افتاد
اپنی فطرت میں نہیں دہشت و دنگا و فساد
پھر بھی ہم نے تیرے شہروں کو کیا ہے آباد

ہر مسلماں ہے یہاں امن کا حامی دیکھو
ہیوسٹن جائو، ایل اے دیکھو، میامی دیکھو

گر گیا تیز ہوائوں سے اگر طیارہ
پکڑا جاتا ہے مسلمان یہاں بے چارہ
کبھی گھورا، کبھی تاڑا تو کبھی للکارا
کبھی ’’سب وے‘‘ سے اٹھایا، کبھی چھاپہ مارا

تو نے یہ کہہ کر جہازوں کو کراچی بھیجا
یہ بھی شکلاً مسلمان اسے بھی لے جا

میڈیا تیرا، دوات اور قلم تیرے ہیں
جتنے بھی ملک ہیں ڈالر کی قسم تیرے ہیں
یہ شہنشاہ یہ ارباب حرم تیرے ہیں
تیرا دینار، ریال اور درہم تیرے ہیں

تونے جب بھی کبھی مانگا ہے تجھے تیل دیا
تجھ کو جب موقع لگا تونے ہمیں پیل دیا

حالت جنگ میں ہم لوگ ترے ساتھ رہے
تاکہ دنیا کی قیادت میں تیری بات رہے
یہ ضروری تھا کہ تجدیدِ ملاقات رہے
دیکھئے کتنے برس چشمِ عنایت رہے

ہم ترے سب سے بڑے حلقہء احباب میں ہیں
پھر بھی طوفان سے نکلتے نہیں گرداب میں ہیں

’’ایڈ‘‘ دیتا ہے تری حوصلہ افزائی ہے
تیرا یہ دست کرم سود کا سودائی ہے
اسلحہ دے کے جو غیروں سے شناسائی ہے
یہ بھی اسلام کے دشمن کی پذیرائی ہے

رحمتیں ہیں تری ہر قوم کے انسانوں پر
چھاپہ پڑتا ہے تو بیچارے مسلمانوں پر۔