عمران خان نے لاہور میں کامیاب جلسہ کیا کر دیا، ہر طرف ایک نیا شور و غوغا برپا ہو گیا۔ میڈیا عمران کو پاکستان کے "واحد" نجات دہندہ کے طور پر پیش کرنا شروع ہو گیا۔ پیپلز پارٹی خوش ہو گئی کہ تخت لاہور کی بنیادیں ہلنا شروع ہو گئی ہیں تو نواز لیگ والے اس کو ناگہانی آفت سمجھنا شروع ہو گئے ہیں۔ شہباز شریف اتنا ڈینگی سے پریشان نہ ہوئے ہوں گے جتنا وہ اور انکے ہمنوا اس ایک جلسے سے ہو گئے۔
عمران خان کے حامیوں میں زندگی کی ایک نئی لہر دوڑ گئی اور بیشتر تو اتنے پُرجوش ہو گئے کہ عمران کی مخالفت کرنے تو بڑی بات خود اپنی سوچ کے مخالف بات کرنے والوں پر ایسے چڑھ دوڑنے لگے جیسے بادشاہت انکے نام لکھ دی گئی ہو۔ دوسری طرف عمران پر تنقید کرنے والوں میں ٹھنڈ پڑگئی اور تنقیدی صفوں میں خاموشی طاری ہو گئی۔ لیکن میں تو وہ ہوں کہ جو پنگا لیئے بغیر چین سے رہ نہیں سکتا۔

مجھے نہیں معلوم کہ مستقبل میں کیا ہو گا۔ ہو سکتا ہے کہ عمران خان ہی مستقبل کا وزیر اعظم ہو ۔ لیکن اُس کو "واحد" نجات دہندہ سمجھنے والے اتنے زیادہ پُرجوش ہیں کہ وہ کئی حقائق کو بھُلا بیٹھے ہیں۔

یہ کہنا بجا کہ عمران کے جلسے میں "ینگ جنریشن" کی اکثریت تھی۔ لیکن افسوس اس کو تعصب کہا جائے یا ذہنی بھلکڑ پن کہ کئی اور جماعتیں بھی اس قسم کے بڑے بڑے جلسے منعقد کرتی ہیں۔ لیکن بدقسمتی سے ان کو وہ میڈیا فیم حاصل نہیں ہوتا کہ وہ ہماری آنکھوں کا تارا بن سکیں۔ دُور کیوں جائیں حال ہی میں لاہور میں اسلامی جمیعت طلبہ نے 60ہزار کے لگ بھگ صالح نوجوانوں کا تین روزہ اجتماع منعقد کیا۔ اُس میں نہ ہُلڑ بازی تھی اور نہ بازاری پن۔ نہ "پے رول" پر "تماشائی" لائے جانے کا الزام لگا اور نہ کبھی اس پر یہ کہا گیا کہ کسی جماعت نے دوسری جماعت کو نیچا دکھانے کے لیے اپنے بندے بھیجے۔ لیکن پھر بھی میڈیا کو اتنی توفیق نہ ہو سکی کہ وہ چند منٹ کی ہی کوریج دے دیتا۔
اسلامی جمیعت طلبہ ہر سال ایسا اجتماع منعقد کر لیتی ہے۔ اس کو کیوں کوئی نجات دہندہ نہیں گردانتا؟

جماعت اسلامی اور تبلیغی جماعت بھی ہر سال میں ایک مرتبہ لاکھوں افراد کا مجمع اکھٹا کر لیتے ہیں۔ اُن اجتماعات کا نظم و ضبط اورکردار مثالی ہوتا ہے۔ لیکن انکو تو وہ میڈیا کوریج نہیں دی جاتی جتنی عمران اور الطاف کو دی جاتی ہے۔

کہا جاتا ہے کہ عمران نے ورلڈ کپ جتایا ، اب وہ ملک کو بھی جتائے گا۔ ارے بابا جس طرح ورلڈ کپ کی فتح نا اہل کپتان اور نا اہل ٹیم کے مقدر میں لکھ دی گئی تھی اُسی طرح اگر انکے مقدر میں ملک و قوم کی سربراہی لکھ دی جائے تو الگ بات ہے ورنہ یہ کہنا کہ عمران بہت عظیم قائد تھا تو یہ غلط بات ہے۔ عمران سے زیادہ عظیم قائد سری لنکا کا رانا ٹُنگا تھا۔ جس نے اپنی ٹیم کو صفر سے ورلڈ کپ ہیرو بنایااور اب تک وہ مانی ہوئی ٹیمز میں شمار ہوتی ہے۔ یہ کیا بات ہوئی کہ "اندھے ہاتھ بٹیرا" آ جائے اور وہ اس کو اپنا کارنامہ گردانے۔