۔۔اور وزیراعظم پاکستان کی شاہ خرچیاں


وزیراعظم سید یوسف رضا گیلانی نے قریباً50ہزار ڈالر کی گھڑی سمیت 70ہزار ڈالر کے کپڑے زیب تن کر رکھے تھے ۔ ۔ ۔ ٹی وی اینکر پرسن کا دعویٰ
خاتون صحافی کے سوال پر وزیراعظم نے کہا میں نے اچھے کپڑے پہن لئے تواچھی گھڑی کیوں نہیں
وزیراعظم کے جسم پر کپڑوں کی مالیت سے سوات کے متاثرین کے لئے 4ہزار واٹر کولر 12ہزار پنکھے خریدے جا سکتے ہیں
اسلام آباد ۔ ایک نجی ٹی وی چینل کے اینکر پرسن نے دعویٰ کیا ہے کہ وزیراعظم سید یوسف رضا گیلانی نے قریباً50ہزار ڈالر کی کھڑی سمیت 70ہزار ڈالر کے کپڑے زیب تن کر رکھے تھے ، جس پر ایک خاتون صحافی نے سوال کیا تو وزیراعظم نے جواب دیا جب میں نے اچھے کپڑے پہنے ہیں تو اچھی گھڑی کیوں نہیں پہن سکتا ۔ اینکر پرسن کا کہنا تھا کہ حال ہی میں وزیراعظم نے بہت سے اینکرز کو کھانے پر دعوت دی اس میں دلچسپ بات یہ تھی کہ ایک خاتون صحافی نے نقطہ اٹھایا کہ وزیراعظم نے جو گھڑی پہن رکھی ہے اس کی قیمت کم از کم 50ہزار ڈالر سے زیادہ ہے یہ گھڑی چھوٹے سکریپ کی تھی جس پر ڈائمنڈ ڈائل لگا ہوا تھا اس دوران خاتون صحافی نے وزیراعظم سے سوال کیا کہ صدر آصف علی زرداری نے وفاقی کابینہ کے وزراء کو ہدایت کی ہے کہ پیپلز پارٹی کے وفاقی کابینہ کے تمام ممبران عام گھڑیاں پہنا کریں گے پھر وزیراعظم آپ نے اتنی قیمتی گھڑی کیوں پہن رکھی ہے؟ تو جواب میں وزیراعظم نے کہاکہ جب میں نے اچھا سوٹ پہن رکھا ہے تو گھڑی کیوں نہیں پہن سکتا ۔ اینکرپرسن کے مطابق ہم نے اندازہ لگایا کہ وزیراعظم نے جسم پر اس وقت 70ہزار ڈالر یعنی تقریباً56لاکھ پہن رکھے تھے، جن سے اسو قت سوات آپریشن کے متاثرین کیلئے کم از کم 4ہزار واٹر کولر اور 12ہزار سے زائد پنکھے آسکتے ہیں ۔ کیونکہ 70ہزار ڈالر 56لاکھ روپے بنتے ہیں یعنی ایک آدمی نے 56لاکھ روپے کے صرف کپڑے پہن رکھے تھے ۔ پروگرام میں مسلم لیگ (ن) کے رہنما حنیف عباسی نے اس پر کہاکہ اسلام آباد میں 10بیورو کریٹ ایسے ہیں جن کی گردن پر اگر ہاتھ رکھ کر ملک و قوم کا لوٹا ہوا پیسہ واپس لیا جائے تو یہ اربوں ڈالر باہر نکل سکتے ہیں۔ حنیف عباسی نے کہاکہ اگر میرے پاس آمدن سے زیادہ پیسہ ہے تو مجھے ضرور پکڑیں لیکن پچیس ہزار روپے تنخواہ لینے والے بیورو کریٹس کے پاس کروڑوں روپے کہاں سے آ گئے ہے ۔انہوں نے کہاکہ مشرف سمیت تمام ڈکٹیٹرز اور بیورو کریٹس کا احتساب ہونا چاہیے جب تک ایسا نہیں ہوتا تو حالات بہتر نہیں ہو سکتے