مشرقِ وسطیٰ میں مطلق العنان بادشاہتوں اور آمرانہ حکومتوں کے خلاف عوامی احتجاج پر امریکی دوعملی واضح ہے۔ جہاں ایک طرف امریکہ اور اس کی اتحادی نام نہاد ’بین الاقوامی برادری‘ عوام کو حکومتی تشدد سے بچانے کے نام پر لیبیا میں فوجی کارروائی میں مصروف ہے وہیں یمن اور بحرین میں پُرامن مظاہرین کے خلاف حکومتوں کے بہیمانہ تشدد پر لب کشائی کی جرات سے محروم ہے۔ یہ دوعملی اور تضاد نہ صرف امریکہ اور یورپی حکومتوں میں نظر آ رہا ہے بلکہ تقریباً تمام مغربی میڈیا بھی اس دوعملی اور کھلے تضاد میں اپنی حکومتوں کا شریک ہے۔ سی این این اور بی بی سی جیسے مغربی خبررساں ادارے جہاں لیبیا اور شام میں حکومت مخالف تحریکوں کو بڑھا چڑھا کر پیش کر رہے ہیں وہاں بحرین جیسے ممالک میں جمہوری اصلاحات کی تحریکوں کی واجبی خبریں ہی پیش کی جاتی ہیں۔ قطر کا معروف خبررساں ٹیلی ویژن الجزیرہ، جو تیونس، مصر اور لیبیا میں حکومت مخالف تحریکوں کا سب سے بڑا مبلغ رہا ہے وہ بحرین میں حکومت مخالف تحریک کی خبروں کا عملاً بائیکاٹ کیے ہوئے ہے۔ واضح رہے قطر اور یو اے ای امریکہ اور ناٹو کی لیبیا کے خلاف فوجی کارروائی کا باقاعدہ حصہ ہیں۔ قطر کے حاکم نے لیبیا پر قطر ائیر فورس کے حملوں کا الجزیرہ ٹیلی ویژن پر دفاع کرتے ہوئے کہا کہ عوام کے تحفظ کے لیے یہ حملے ضروری تھے۔ دوسرے ملکوں میں ایسی صورت حال میں الجزیرہ کے نام نہاد آزاد صحافیوں کو یہ توفیق نہیں ہوئی کہ وہ قطر کے حکمران سے یہ سوال کر سکیں کہ کیا قطر، بحرین اور یمن میں عوام کے تحفظ کے لیے ایسی ہی کارروائی کی حمایت کرے گا۔

اس حوالے سے سعودی عرب، خلیج تعاون کونسل کے ممالک اور امریکہ کے درمیان ہونے والی مفاہمت اب کوئی راز کی بات نہیں۔ لیبیا پر امریکہ اور ناٹو حملوں کی کھلی حمایت کے بدلے سعودی عرب اور اُس کے اتحادی خلیج تعاون کونسل کے ممالک کو بحرین، سعودی عرب اور یمن میں کھلی من مانی کا موقع دیا گیا ہے۔ امریکہ نہ صرف یمن اور بحرین میں حکومتی تشدد پر خاموش ہے بلکہ بحرین میں جمہوریت کی حامی تحریک کو کچلنے کے لیے سعودی عرب اور خلیج تعاون کونسل کے ممالک کو فوجی مداخلت کی کھلی چھٹی دے چکا ہے۔ یاد رہے سعودی عرب، یو اے ای اور دوسری خلیجی ریاستوں کے کئی ہزار فوجی بحرین میں حکومت کی مدد کے لیے جا چکے ہیں۔ بحرین میں حکومت مخالف جمہوری تحریک کو فرقہ وارانہ رنگ دینے کی کوششیں کی جا رہی ہیں۔

بحرین کی اکثریت شیعہ مکتبہ فکر سے تعلق رکھتی ہے جبکہ حکمران شاہی خاندان کا تعلق سنی مکتبہ فکر سے ہے۔ شاہی خاندان الخلیفہ کا تاریخی تعلق سعودی عرب کے علاقہ نجد سے ہے جو دو صدی قبل بحرین میں آباد ہوا تھا۔ بحرین کی حکومت، سعودی عرب اور خلیجی ممالک بحرین میں جاری مظاہروں کے اس سلسلے میں ایران پر الزام عائد کر رہے ہیں، اگرچہ بحرین کی عرب شیعہ آبادی تاریخی اعتبار سے کبھی بھی ایران کے قریب نہیں رہی۔ ایرانی حکومت کی جانب سے ان الزامات کی سختی سے تردید کی جا رہی ہے تاہم ایران، سعودی عرب اور خلیجی ممالک کی جانب سے بحرین میں فوجی مداخلت کی سخت مخالفت کر رہا ہے اور سعودی عرب کی جانب سے بحرین میں فوجی مداخلت کو ’آگ سے کھیلنے کے مترادف‘ قرار دے رہا ہے۔ بحرین اور سعودی عرب میں حکومت مخالف مظاہروں کے معاملے میں ایران اور سعودی عرب کے درمیان کشیدگی میں تیزی سے اضافہ ہو رہا ہے۔ تین اپریل کو ریاض، سعودی عرب میں خلیج تعاون کونسل کے ممالک کا اجلاس ہوا ہے جس میں ایرانی حکومت کو سخت تنقید کا نشانہ بنایا گیا ہے۔ کچھ روز پہلے کویت نے اپنے ملک میں ایرانی سراغ رسانی کے ایک گروہ کو گرفتار کرنے کا دعویٰ کیا تھا۔ اگرچہ ایرانی حکومت کی جانب سے کویت کے اس دعوے کی تردید کی گئی ہے۔

مشرقِ وسطیٰ میں شیعہ، سنی منافرت کا فروغ پاکستان سے بھی متعلق ہے۔ جہاں سعودی عرب اور خلیجی ممالک کے فوجی دستوں نے حکومت کے استحکام کے لیے بحرین میں فوجی مداخلت کی ہے وہیں بحرین کی داخلی سکیورٹی اور پولیس کے لیے پاکستان سے بھی بھرتیاں کی جا رہی ہیں۔ اخباری اطلاعات کے مطابق پچھلے ایک ماہ سے اخبارات میں اشتہار شائع ہونے کے بعد پاکستان سے کم از کم ایک ہزار سے زیادہ افراد کو بحرین کی سکیورٹی افواج کے لیے بھرتی کیا گیا ہے۔ اطلاعات یہ ہیں کہ یہ سلسلہ تاحال جاری ہے۔ ایران اور سعودی عرب کے درمیان بڑھتی ہوئی کشیدگی اور شیعہ، سنی منافرت کی موجودگی میں پاکستان سے بحرین کی سکیورٹی افواج کے لیے بھرتیوں کا سلسلہ پاکستان کے دور رس مفاد میں نہیں ہو گا۔ پہلے سے خبریں آ رہی ہیں کہ مظاہرین نے بحرین کی سکیورٹی افواج میں شامل پاکستانی نژاد افراد کے خلاف ردعمل کے طور پر پرتشدد کارروائیاں کی ہیں۔

مشرقِ وسطیٰ میں امریکی پالیسی کے تضاد کی وجوہ کوئی ڈھکا چھپکا معاملہ نہیں۔ سعودی عرب اور خلیجی ریاستوں کے حکمران شاہی خاندان امریکہ کے تاریخی اتحادی رہے ہیں۔ مشرقِ وسطیٰ میں ایران کے بڑھتے ہوئے اثر و رسوخ کی روک تھام کے لیے آل سعود اور اُن کی وہابی آئیڈیالوجی امریکہ کی ضرورت ہے۔ جبکہ شام اور لیبیا کی مثال دوسری ہے۔ مشرقِ وسطیٰ میں امریکی حکمت عملی کے ماہرین شام کو خطے میں امریی مفادات کے لیے ایک بڑا خطرہ تصور کرتے ہیں جس کی وجہ شامی حکومت کا ایران اور اسرائیل مخالف حزب اللہ اور حماس سے قریبی اتحاد ہے۔ یہی وجہ ہے کہ شام کے شہر ’درا‘ میں پچھلے دنوں ہونے والے حکومت مخالف مظاہروں کو امریکی حکومت اور مغربی میڈیا بڑھا چڑھا کر بیان کر رہے ہیں اور امریکہ اور اُس کے اتحادیوں کی واضح طور پر کوشش ہے کہ شام میں حکومت مخالف مظاہروں کا سلسلہ تیزی سے آگے بڑھ سکے۔
شفقت اللہ
ہمشہری
http://www.humshehri.com/DetailStory.aspx?ID=4295

__________________

اندازِ بیاں گرچہ بہت شوخ نہیں ہے
شاید کہ اتر جائے ترے دل میں مری بات