ماہرین اقتصادیات متفق ہیں کہ موجودہ مالی بحران کوروکنے کے لئے نئے مالی نظام کی ضرورت ہے۔ویسے صہیونی مقتدرہ اور امریکی نیوکونز کے سرخیل جارج ڈبلیو بش وغیرہ پرانے نظام کو بدلنے کے حق میں نہیں ہیں۔

دنیا کو بلا شبہ ایک نئے مالی نظام کی ضرورت ہے جوپوری طرح ’بلا سودی‘‘ہو اور جو طبقہ امرا کو فائدہ پہنچانے والے تحفظات سے پاک ہو۔اور دنیا میں ایسا صرف ایک ہی نظام فی الوقت موجود ہے:اسلامی اقتصادی نظام جو سود سے بھی پاک ہے اور بے جا تحفظات سے بھی مبرا ہے۔جو بلا تفریق پوری انسانیت کے لیے ہے۔

حالات یہ ہیں کہ مندی ،کساد بازاری دنیا میں کم ہونے کے بجائے بڑھتی جا رہی ہے۔مندی کا سیدھا سا مطلب ہے :مانگ کم پیداوار زیادہ۔مانگ میں کمی اس لئے ہوتی ہے کہ عوام کی قوت خرید گھٹ جاتی ہے۔ جیب خالی ہوگی تو کوئی بھلا کیا خریدے گا؟ورلڈ بینک کے چیف اکنامسٹ جسٹن لین کا کہنا ہے موجودہ مندی اور مالی بحران 1930 کے گریٹ ڈپریشن سے زیادہ سنگین ہوسکتا ہے۔

عالمی بازار میں خام تیل کی قیمتیں مسلسل کم ہوتی جارہی ہیں وجہ یہ ہے کہ دنیا میں قطعی غیر متوقع طور پر تیل کی مانگ اور کھپت میں اضافے کے بجائے کمی کا رجحان پیدا ہوگیا ہے۔صہیونی مقتدرہ تیل کی قیمتیں 150ڈالر سے دو سو ڈالر فی بیرل تک لے جانے کے خواب دیکھ رہا تھا لیکن 11 جولائی 2008ء 128 ڈالر فی بیرل تک پہنچ کے تیل کی قیمتوں نے جو لڑھکنا شروع کیا تو پانچ مہینے میں ایک سو ڈالر فی بیرل سے زائد کی کمی آچکی ہے جو بذات خود ایک ریکارڈ ہے۔

معاشی بحران کا معاملہ یہ ہے کہ اس کی بدولت سپر پاور کی امریکی حیثیت کا تیاپانچہ ہونے والا ہے اور امریکہ سمیت پوری دنیا میں بہ بحث جاری ہے کہ امریکہ کے بعد نئی سپر پاور کون ہوگا؟ماہرین کا اندازہ ہے 2011 سے2020 تک امریکہ کا زوال مکمل ہوچکا ہوگا۔
آج بھی صورت حال یہ ہے کہ نیوز ویک کے ایڈیٹر فرید زکریا تک نے بند لفظوں میں یہ اعتراف کیا ہے کہ امریکی معیشت صرف چین اور سعودی عرب کی دولت کے سہارے ٹکی ہوئی ہے۔حقیقت یہی ہے کہ ان میں سے کوئی ایک ملک بھی امریکہ کی کفالت اور امداد سے ہاتھ اٹھالے تو امریکی ٹائی ٹینک کل کا ڈوبتا آج ہی ڈوب جائے۔

در اصل موجودہ سرمایہ دارانہ نظام ہی خطرے میں ہے اور فرید زکریا کی مانیں تو ان کا کہنا یہ ہے کہ ’’یہ کیپیٹل ازم کا بحران نہیں گلوبلائزیشن کا بحرا ن ہے۔ در اصل گلوبلائزیشن کی بنیاد سودی سرمایہ داری سامراجی نظام ہی پر رکھی گئی تھی لہذا اس کا یہ حشر تو ہونا ہی تھا۔

آج حالت یہ ہے کہ دنیا میں 2 کروڑ لوگ بدترین فاقہ کشی کے شکا رہیں اور چالیس کروڑ افراد بس بھکمری کی کگار پر ہیں۔گذشتہ انیس برسوں میں گلوبلائزیشن کے نتیجے میں ترقی پذیر دنیا غربت سے پاک تو کیا ہوتی،غربت کا عفریت ترقی یافتہ ممالک کو بھی اپنے شکنجے میں کستا چلا جا رہا ہے۔صرف ایک ملک امریکہ میں اور صرف سال 2008ء میں بیس لاکھ افراد چھاٹنی کا شکا رہو کر بے روزگار ہو چکے ہیں۔

محض ایک مہینے نومبر2008ء میں پانچ لاکھ 33ہزار امریکی بے روزگار ہوئے ہیں۔ایک امریکی ماہر اقتصادیات رچرڈ مارون کا کہنا ہے کہ’’آپ اس سے زیادہ بری حالت کا تصور بھی نہیں کرسکتے۔امریکی اقتصادی ڈھانچہ پوری طرح منہدم ہو چکا ہے۔‘‘ایک یونانی ماہر اقتصادیات بوفیس فانسون نے لکھا ہے کہ موجودہ سرمایہ دارانہ نظام نے عالم انسانیت کو ہلاکت کی کگار پر پہنچا دیا ہے۔

اس نے لکھا ہے کہ ’’ہمارے بینکو ں کے ساتھ جو کچھ ہو رہا ہے اس کو سمجھنے کے لئے ہم کوانجیل کے بجائے قرآن پاک کو پڑھنے کی زیادہ ضرورت ہے۔اگر ہمارے بینکوں کے ذمہ داروں نے قرآن کے معاشی احکامات کی تطبیق کی ہوتی تو ہم اس بحران کا شکار نہ ہوتے کیونکہ پیسہ پیسے کو جنم نہیں دیتا۔‘‘

اسی طرح ایک فرانسیسی اقتصادی جریدے نے عالمی اقتصادی نظام میں اسلامی شریعت کی تطبیق کی وکالت کی ہے۔انہوں نے اپنے مقالے بعنوان ’’کیا وال اسٹریٹ اسلامی شریعت کے اصول ماننے کی اہل ہوگئی ہے؟‘‘ میں لکھا ہے کہ اسلامی (بلا سودی معاشی)اصولوں کی عملی تطبیق کے بغیر اب کوئی چارہ نہیں۔ایک مکمل بلا سودی اسلامی نظام کے سوا اورکوئی نظام اب ہمیں اس عالمی معاشی بحران سے نہیں بچا سکتا۔‘‘

عالم نقوی