سعودی حکومت نے وزیر اعظم کے دورہ سعودی عرب کے دوران پاکستان کو ادھار کی بنیاد پر تیل دینے یا بجٹ میں معاونت کرنے کےلئے کوئی ٹھوس وعدہ نہیں کیا، وزیراعظم کی جانب سے خانہ کعبہ اور روضہ رسول کے دروازے کھولنے کی دو درخواستیں بھی تسلیم نہیں کی گئیں، پاکستان پیپلز پارٹی کے چیئرمین آصف علی زرداری اور وزیر دفاع چوہدری احمد مختار پاکستان کےلئے مالیاتی مدد حاصل کرنے کی کوششوں کے سلسلے میں تاحال جدہ میں ہیں۔

سعودی بادشاہ عبداللہ بن عبدالعزیز نے وزیراعظم پاکستان کے اعزاز میں کوئی ضیافت دی اور نہ ولی عہد سلطان بن عبدالعزیز نے ان سے ملاقات کی (اطلاعات کے مطابق وہ وزیر اعظم کے دورہء سعودی عرب کے موقع پر یورپ کے وزٹ پر گئے ہوئے تھے)۔ وزیر اعظم کے دورے کے بعد سعودی حکام کے وعدوں کے حوالے سرکاری سطح پر کوئی ٹھوس بات نہیں بتائی گئی، تاہم سعودی عرب کی اعلیٰ قیادت نے دورے پر آئے ہوئے پاکستانی وزیر اعظم کویقین دہانی کرائی ہے کہ متعلقہ حکام انکی درخواست پر غور کریں گے۔ مذاکرات میں پاکستان اور سعودی عرب نے کارپوریٹ فارمنگ کے شعبے میں تعاون بڑھانے کا فیصلہ کیا ہے اور سعودی کاشت کاروں کو پاکستان میں کاشت کاری کےلئے بڑے رقبے پر پھیلی ہوئی زرعی زمینیں دی جائیں گی جبکہ سعودیوں کو اپنی کمائی ہوئی دولت اپنے ساتھ لے جانے کی اجازت ہوگی، اس تعاون کی تفصیلات بعد میں ہونے والے رابطوں میں طے کی جائیں گی۔ذرائع کے مطابق سعودی عرب زمینوں پر کاشت کاری کےلئے بڑے پیمانے پر سرمایہ کاری کرےگا۔

مدینہ منورہ اور مکہ معظمہ کے مقدس دروازے کھولنے کی پہلی درخواست سفارتی چینلز کے ذریعے دی گئی تھی تاہم شاہی محل سے متعلقہ حکام نے یہ درخواست مسترد کر دی۔ بعد ازاں وزیر اعظم نے ذاتی طور پر اس ہی قسم کی ایک اور درخواست بھرپور شائستگی کے ساتھ پیش کی تاہم یہ درخواست بھی شائستگی کے ساتھ مسترد کر دی گئی۔ وزیر اعظم کے ہمراہ جانے والے وفد کو یہ اعزاز نہ ملنے پر مایوسی ہوئی۔ دلچسپ امر یہ ہے کہ مسلم مملکتوں اور حکومتوں کے سربراہان کو کم از کم ان کے پہلے دورہ سعودی عرب کے موقع پر مقدس مقامات کے اندر داخل ہونے کا اعزاز دیا جاتا رہا ہے، اس معاملے پر تبصرے کےلئے کوئی عہدیدار دستیاب نہیں تھا کیونکہ ترجمان دفتر خارجہ صدیق خان وزیر خارجہ شاہ محمود قریشی کے ہمراہ غیر ملکی دورے پر روانہ ہوچکے ہیں۔ صرف گورنر مکہ معظمہ نے وزیر اعظم کے اعزاز میں ظہرانہ دیا۔

پیپلز پارٹی کے رہنما آصف علی زرداری اور چوہدری احمد مختار ارض مقدس پرسعودی حکومت کے مہمان کے طور پر قصر ظفر میں مقیم ہیں اور یہ جدہ کے شاہی محل کے بالکل سامنے ہے۔ ذرائع کے مطابق توقع ہے کہ وہ ایک دو روز میں واپس آجائیں گے۔

کہا جا رہا ہے کہ وفاقی وزیر برائے مذہبی امور سید خورشید شاہ جنہوں نے گزشتہ ماہ سلطنت کے دورے کے دوران سعودی حکام کو تیل کا اضافی کوٹہ دینے پر قائل کرنے کی کوشش کی تھی وہ انہیں قائل نہیں کرپائے، شہزادہ نائف نے اس موقع پر مہمان وزیر سے کہا ہے کہ وہ ایسے حاجیوں کو بھیجیں جو اچھی طرح تربیت یافتہ ہوں کیونکہ بغیر تربیت حاصل کئے آنے والے حاجی مسائل پیدا کرتے ہیں۔

دریں اثناء سفارتی مبصرین نے اشارہ دیا ہے کہ سابق وزیر اعظم نواز شریف جن کی سعودی قیادت کے ساتھ خصوصی دوستی ہے وہ سعودی عرب کی جانب سے مالیاتی مشکلات پر قابو پانے کےلئے تعاون کا راستہ ہموار کر سکتے ہیں۔