پیپلز پارٹی کے رہنما اور پاکستان کے وزیر اعظم سید یوسف رضا گیلانی کے سامنے بے شمار چیلنجز ہیں۔ لیکن پہلی فرصت میں جن چیلنجز کا سامنا ہے اُن میں سب سے بڑا مسئلہ دہشت گردی کا ہے جس نے پاکستانی عوام کے دلوں میں انجانے خوف اور نفرت کی فضا قائم کی ہوئی ہے۔ بم دھماکوں میں جو لوگ ہلاک ہوتے ہیں اُن کے عزیز و اقارب کے دلوں پر قیامتیں گزر جاتی ہیں۔ آنکھوں میں آنسوئوں کا لامتناہی سلسلہ شروع ہوجاتا ہے کہ تھمنے میں نہیں آتا۔ ہلاک ہونے والے چھوٹے چھوٹے بچوں کی مائوں کی دوہائیاں اور بین، باپ کی اُمیدوں کا چراغ ہمیشہ کےلئے گل۔ بھائیوں بہنوں اور دیگر رشتہ داروں کے دلوں میں انتہائی نفرت کی کیفیت۔ اپنے ہی وطن میں غیر محفوظ ہونے کا شدید احساس! یہ سب کچھ کسی قوم کو نفسیاتی مریض بنانے کے اسباب ہیں۔
دوسرا بڑا چیلنج مہنگائی کا وہ طوفان بلا خیز ہے جو گزشتہ نو سالوں سے اپنی پوری آب و تاب کے ساتھ غریب عوام کو اپنے ساتھ بہا رہا ہے۔ اس طوفان کو روکنے کےلئے اور عوام کو ریلیف فراہم کرنے کےلئے جناب وزیر اعظم کو عملی اقدامات کرنا ہوں گے۔
تیسرا چیلنج ججز کی بحالی کا پُر زور عوامی مطالبہ ہے۔ اگر یہ مطالبہ پورا ہو جاتا ہے اور ججز بحال ہو کر اپنے اپنے مناصب پر دوبارہ فائز ہو جاتے ہیں تو یہ آمریت کے لئے بہت بڑا صدمہ اور دھچکا ہو گا جب کہ عوام کے چہروں پر خوشیوں اور رعنائیوں کی بہار لے آئے گا۔
وزیر اعظم سید یوسف رضا گیلانی کو عوام کی دکھتی رگ پر ہاتھ ہو گا اور عوامی امنگوں کے مطابق خود کو ڈھالنا ہوگا اور ایسے فیصلے کرنا ہوں گے جو عوام کی اکثریت کی ترجمانی کرتے ہوں۔ عوامی خواہشات کے بر عکس چل کر یا آمریت کی چھتری کے سائے تلے جا کرپناہ لینے والوں کا حشر نشر اُنہوں نے اپنی آنکھوں سے دیکھ لیا ہے۔ اُمید واثق ہے کہ وہ ایسا نہیں کریں گے اور جمہوری اقدار کی پاسداری کرتے ہوئے جمہوری روایات پر چلیں گے اور صیحح معنوں میں عوام کے دلوں پر حکمرانی کریں گے۔