گزشتہ کچھ ہفتوں سے جاری Conspiracyبلآخر اپنا پھل لا رہی ہے اور سابقہ اتحادیوں یعنی صحافیوں اور وکلا میں بظاہر آپس میں ٹھن گئی ہے۔ کچھ کالے کوٹوں والے گنجے فرشتے جہاں بھی صحافیوں کو دیکھتے ہیں ان کو دو چار ہاتھ جھاڑ دینا اپنا فرض عین سمجھتے ہیں۔ مارنے کے لیے ہاتھ کسی اور پر اٹھاتے ہیں اور معجزانہ طور پر لگتا صحافیوں کو ہے۔اگر اس بات کو قدرت کی طرف سے سزا نہ سمجھا جائے تو پھر کیا سمجھا جائے
مزے کی بات یہ کہ کالے کوٹوں والے گنجے فرشتے صرف اس وقت اپنے مضبوط کاندھوں ہاتھوں کو تکلیف دیتے ہیں جس وقت کوئی کیمرہ موجود ہو۔ ۔ ۔ لگتا ہے کالے کوٹوں کو ٹی وی پر آنے کا چسکا ہے۔
صحافیوں نے بھی اپنی آستینیں چڑھا لیں ہیں ۔ ۔ ۔ کالے کوٹوں والے گنجے فرشتے تو ان کے ہاتھ نہیں لگ رہے اس لیے انہوں نے ان گنجے فرشتوں کے رہنماؤں کو اپنے سٹوڈیوز میں دعوت دی کہ اپنا حصہ یہاں سے نوش فرما جائیں۔

"حیران کن بات یہ کہ جب حامد میر نے وکلا رہنماؤں کو اس موضوع پر بات کرنے کے لیے بلایا تو ویہ طارق محمود، وجہیہ الدین صدیقی،اعتزاز احسن جو ایک کال پر بھاگے آیا کرتے تھے ۔ ۔ ۔ ۔انکے پاس وقت نہ تھا اور کسی کا موبائل بند تھا۔"

میں سمجھتا ہوں کہ یہ بزدل کی انتہا ہے۔ دوسروں کا گریبان پکڑنا آسان ہوتا ہے۔ مزا تو تب آتا ہے کہ جب اپنے ہی گریبان میں جھانکنا پڑ جائے۔ کیا ہو جاتا کہ اگر وہ رہنما جیو ٹیلی ویژن پر آ کر ان واقعات کی مذمت کر دیتے۔بار کونسلز سے مطالبہ کرتے کہ ایسے شرپسندوں کے لائینسسز منسوخ کر دیئے جائیں۔انکی گرفتاری اور سزا کو عین انصاف قرار دے دیتے۔
اس سب کے کہنے میں انکا کیا جاتا تھا؟ مشرف کے خلاف انصاف کا تقاضہ کرنے والوں کی زبان اپنے ساتھیوں کی باری میں کیوں لڑکھڑانے لگی ہے؟ ببانگ دہل سلطان جابر کے سامنے کلمہ حق کہنے والے ۔ ۔ ۔ ۔ اس بار کلمہ حق کا مطلب اور مقصد کیوں بھول گئے؟ افتخار محمد چوہدری کوئی جادوگر ہے کہ وہ چھڑی ہلا کر سب ٹھیک کر دے گا؟ جناب اس کے لیے تو وکلا برادری کو سب سے پہلے ٹھیک ہونا تھا۔ اپنی باری آئی تے گھگھو کیوں بول گیا؟
میں سمجھتا ہوں کہ کیپٹل ٹاک میں نہ آ کر ان رہنماؤں نے سادہ سے مسئلہ کو گھمبیر کر دیا ہے اور اس سے بڑھ کر انہوں نے انتہائی بزدلی کا ثبوت دیا ہے۔ یقیناََ آج وہ گھر بیٹھے دل میں تسلیم کر رہے ہوں گے کہ یہ مشرف کا ہی حوصلہ تھا کہ اس قدر جرات سے تنقید کو سن کر برداشت کر جاتا تھا اور جب آج انکی باری آئی تنقید سننے کی تو اس ملک کو بدلنے کے سبھی عزم و حوصلے خاک میں مل گئے۔
تف ہے انکی بزدلی پر۔ ۔ ۔ اور تف ہے انکی لیڈری پر
(یہ خیالات کل کے کیپٹل ٹاک کا کچھ حصہ دیکھنے کے بعد کے ہیں۔ تاہم اگر وہ لیڈران عوام کے سامنے پیش ہو بھی گئے ہیں تو بھی ان لیڈروں کا طرز عمل دیکھنے کے بعد یہ خیالات اپنی جگہ قائم ہیں)