مسلم لیگ (ن) کے رہنما میاں نواز شریف نے تحریک انصاف کے چیئر مین عمران خان کو دس دس اوورز کے میچ کا مذاق میں چیلنج کیا دیا خان صاحب نے اسے اتنی سنجیدگی سے لیا کہ ایک جلسے میں تقریر کے دوران انہوں نے نہ صرف اس چیلنج کو قبول کرنے کا اعلان کیا بلکہ میاں صاحب کو ایک کلب لیول کا کرکٹر قرار دیتے ہوئے کہا کہ وہ ٹیسٹ کرکٹر رہ چکے ہیں اور مقابلے میں وہی جیتیں گے۔ (بشکریہ جنگ)

عمران خان جتنے سینئر کھلاڑی ہیں وہ اتنا تو بخوبی جانتے ہوں گے کہ کلب لیول کی ٹیم کا کوئی کوچ ہو یا نہ ہو۔۔۔۔ ٹیسٹ لیول کی کرکٹ ٹیم کا کوئی نہ کوئی کوچ ضرور ہوتا ہے۔

کیا عمران خان اپنی ٹیم کے (جس کے وہ کپتان ہیں)کے کوچ کا نام بتانا پسند کریں گے؟

ویسے تو عمران خان جیسے سوبربندے سے یہ توقع نہیں تھی کہ وہ اس طرح کیچڑ میں چھلانگیں مارے گا جس طرح وہ آج کل کیچڑ میں اُچھل کود کر رہا ہے۔ ۔ ۔ لیکن اگر اس نے سیاست کو کرکٹ کا میدان سمجھ ہی لیا ہے تو اب وہ دوسروں کی زبان تو بند کر نہیں سکتا۔۔۔ جبکہ ہم نے تو محض کی بورڈ سے تائپ کرنا ہوتا ہے۔

اگر عمران خان کی تحریک انصاف کو ایک کرکٹ ٹیم فرض کر لیا جائے تو جس تواتر سے اس ٹیم میں "میدان سیاستی کرکٹ" کے کھلاڑی شامل ہو رہے ہیں اس حساب سے عمران خان کی ٹیم "انڈین آئی پی ایل" ٹورنامنٹ کھیلنے کی تیاری میں لگتی ہے۔ جس میں ہر ٹیم اچھے کھلاڑی کو "منہ مانگے داموں پر" خریدنے پر تیار رہتی ہے۔ اور کون نہیں جانتا کہ "آئی پی ایل" دنیا کا سب سے بڑا "ان آفیشل جوا ٹورنامنٹ" ہے۔ اور عموماً اس پر یہ الزام بھی لگتا ہے کہ یہ فکسڈ ٹورنامنٹ ہے۔

عمران خآن کی سربراہی میں پاکستان کرکٹ ورلڈ کپ جیتا تو ضرور تھا ۔ ۔ ۔ لیکن اس دور سے آگاہ سبھی لوگ جانتے ہیں کہ عمران خآن انتہائی آمرانہ ذہن کا مالک تھا۔ جو اس کو نا پسند ہوتا یا اس کے خلاف آواز بلند کرتا ، اس کو باہر کردیتا تھا۔

لیکن میری رائے میں جاوید ہاشمی کی صورت میں "کوچ" نے ایک نیا جاوید میانداد اس کی ٹیم میں شامل کر دیا ہے۔ یہ انتہائی خطرناک یارکر ہے جو عمران خان کو مارا گیا ہے۔ دیکھنا یہ ہے کہ عمران خان اس یارکر کو کس انداز میں کھیلتا ہے۔ لیکن اس کا اندازہ ابھی نہیں چند سال بعد ہی ہو گا۔

قریشی صاحب کی تقاریر کے انداز سے خوب اندازہ ہو رہا ہے کہ وہ سولو گیم کھیل رہے ہیں۔ انکو ٹیم سے یا کپتان سے اتنی غرض نہیں۔ قریشی صاحب درحقیقت ایک گُگلی ہیں۔ اورعمران خآن گگلی کھیلنے میں اتنا زیادہ ماہر نہیں تھے۔ یہ سیدھے سادھے بندے ہیں اور سیدھی سیدھی بات اور بال کھیلنے کے عادی ہیں۔ ان کو اس گگلی کو نہایت احتیاط سے کھیلنا ہو گا ۔ ۔ ۔ ورنہ میاں اظہر کی طرح یہ گگلی ان کی سٹیمپس کو بھی اُڑا سکتی ہے۔ پھر یہ میاں اظہر کی طرح "اے کی ہو گیا ، اے کی ہو گیا" کہتے پھریں گے۔

سچی بات تو یہ ہے کہ قریشی، قصوری، ترین جیسے نا پسندیدہ افراد کی موجودگی میں ہم جیسے گلی محلے کی کرکٹ کے تماشائی عمران خان کی حمایت تو نہیں کر سکتے ، لیکن ان کے لیے دعا گو ضرور ہو سکتے ہیں کہ اللہ نہ صرف ان کو سیاست کا ورلڈ کپ جیتنے بلکہ قابل عزت انداز میں جیتنے اور پھر ملک میں انصاف، امن قائم کرنے کی جیت بھی عطا فرمائے۔
کیونکہ انصاف، امن، مساوات، وغیرہ ایسی چیزیں ہیں جو خواہ عمران کے ذریعے ملک میں آئیں یا زرداری و نواز شریف کے ذریعے (جنہوں نے موقع ضائع کر دیا) ۔ ۔ ۔ جیت سبھی کی ہو گی۔
اس لیے ہم تو عمران خان کے بیانات کو حقیقت میں بدلنے کے لیے ان کے لیے دعا گو ہیں۔