حال ہی میں میری نظر ایک ایسے انٹرویو پر پڑی جو میں سمجھتا ہوں کہ قارئین کے لیے نہایت مفید ثابت ہوسکتا ہے۔ یہ انٹرویو آئی ایس آئی کے سابق عہدیدار اور پاک ائر فورس کے سابق اسکوارڈن لیڈر خالد خواجہ کا ہے۔ پیش خدمت ہے:

سوال: ماضی کے ہیروز آج کے دہشت گرد ہیں۔ ہر چیز ڈرامائی طور پر تبدیل ہو رہی ہے اور ٹھیک اس ہی طرح جب شیخ رشید احمد، جنہیں آج سے کافی سال قبل کشمیر کی مسلح جدوجہد میں حصہ لینے میں فخر محسوس ہوتا تھا، لیکن آج انہیں ڈر ہے کہ کہیں ان پر دہشت گرد کا ٹھپہ نہ لگ جائے۔ ایسا کیوں ہے؟
جواب: حقیقت میں جو موضوع ہے وہ دہشت گردی ہے۔ یہ ریاستیں اور حکومتیں ہوتی ہیں جو دہشت گردی کی پشت پناہی کرتی ہیں، شروع میں لوگ نشانہ بنتے ہیں اور اس ہی طرح دہشت کی یہ سائیکل چلتی رہتی ہے۔ اس ریاستی دہشت گردی میں کسی کو چھوٹ حاصل نہیں ہے اور امریکا، پاکستان، انڈیا اور اسراءیل سب ایک ہی کردار ادا کر رہے ہیں۔
ہم میں سے کئی لوگ اسے مشرق اور مغرب یا پھر مسلمانوں کی عیسائیوں اور یہودیوں کے ساتھ جنگ قرار دیتے ہیں لیکن یہ ایسا بالکل نہیں۔ حقیقت یہ ہے کہ حکمرانی کرنے والی حکومتیں اپنی بات منوانا چاہتی ہیں اور اس لیے وہ لوگوں کو مختلف طریقوں سے استعمال کرتی ہیں، کبھی بادشاہت کے نام پر، کبھی جمہوریت کے نام پر اور کبھی آمریت کے نام پر۔
دنیا کے نوے فیصد لوگ چاہتے ہیں کہ کوئی ان پر حکمرانی کرے لیکن کچھ عناصر ایسے ہوتے ہیں جو یہ نہیں چاہتے، وہ اپنی آزادی کے لیے لڑتے ہیں اور آخری دم تک جدوجہد کرتے ہیں۔ ان دو چھوٹے گروہوں، یعنی حکمرانی کرنے والوں اور اس کی مخالفت کرنے والوں، کے درمیان ہونے والی جنگ میں نقصان ایسی اکثریت کا ہوتا ہے جو چاہتی ہے کہ اس پر حکمرانی کی جاءے۔ اس کے باوجود لوگ اسلام کی عیسائیت اور یہودیت کے خلاف جنگ کی باتیں کرتے ہیں یعنی بات وہیں پر ہی اٹکی رہتی ہے۔ حقیقت یہ ہے کہ ایک گروپ حکمرانی کرنا چاہتا ہے، چاہے وہ مسلم ہو عیسائی ہو یا پھر یہودی، جبکہ دوسرا گروپ آزاد رہنا چاہتا ہے لیکن بیچ میں نقصان اکثریتی گروپ کا ہوجاتا ہے۔
جب ہم کشمیر کے حوالے سے بات کرتے ہیں تو مذکورہ بالا صورتحال پاکستان اور بھارت پر بھی لاگو ہوجاتی ہے۔ حقیقتاً دیکھا جائے تو پاکستان کبھی بھی کشمیریوں سے سچا نہیں تھا۔ یہ خود غرضی پر مشتمل ایک ایسا اسٹریٹجک ترکیب تھی جس کے ذریعے بھارت کو انتہائی حد تک نقصان پہنچانا تھا۔ کشمیر کے حوالے سے پاکستان نے جو بھی کیا اور جو کر رہا ہے اس کا مقصد صرف پاکستان ازم کو بڑھاوا دینا ہے یعنی علاقے میں اپنے اسٹریٹجک ایجنڈا کو محفوظ کرنا۔ ہم لفظ مذہب اور جہاد کو صرف مقاصد کے لیے استعمال کرتے ہیں۔ یہ ایک ایسا طریقہ ہے جس کے ذریعے بھارت کو کشمیر میں الجھا کر اس کے مالی وسائل کو کسنا ہے۔

سوال: کیا پاکستان نے کشمیری جدوجہد کی اخلاقی حمایت نہیں کی تاکہ مسلم آبادی کو اپنے حقوق مل سکیں؟
جواب: آپ کیا بات کر رہے ہیں؟ پاکستان کے مقابلے میں بھارتی مسلمانوں کو سب سے زیادہ حقوق حاصل ہیں۔ ایسے کئی پاکستان لوگ ہیں، جن میں فوجی، عالم، اسکالرز اور عام لوگ شامل ہیں، جو اپنے گھروں سے غائب کردیئے گئے ہیں اور انہیں لاپتہ ہوئے سالوں گزر گئے۔ یہ بات سب جانتے ہیں کہ انہیں انٹیلی جنس ایجنسیوں نے غائب کرایا۔ ایسے افراد پر کبھی کسی عدالت میں مقدمہ نہیں چلا جبکہ کئی افراد کو بغیر مقدمہ کے ہی مار دیا گیا۔ اس سے اچھے تو آزادی سے پہلے برطانوی راج کے دن تھے جب کسی کو بھی بغیر مقدمہ کے قید نہیں کیا جاتا تھا۔ ہم یہ نہیں کہتے کہ ہم مزید حقوق دیئے جائیں، ہمارا کہنا تو یہ ہے کہ کم از کم اتنے حقوق تو دیئے جائیں جتنے برطانوی راج میں ملتے تھے۔
کچھ سال قبل بھارت میں ایک ریاست کے مسلم باشندے کو انٹیلی جنس ایجنسیوں نے غائب کرادیا۔ نامور عالم اور اسکالر مولانا اسد مدنی نے ریاست کے گورنر سے اس معاملے پر بات کی تو انہوں نے کہا کہ بھئی پاکستان میں تو ایجنسیاں تفتیش کے لیے لوگ اٹھاتی رہتی ہے، وہاں بھی تو احتجاج نہیں ہوتا تو یہاں کے مسلمان کیوں احتجاج کر رہے ہیں۔ اس پر مولانا صاحب نے گورنر کو یاد دلایا کہ یہ پاکستان نہیں بھارت ہے اور ہر گرفتار شدہ شخص کو عدالت میں پیش کیا جانا لازمی ہے۔ نتیجتاً مذکورہ شخص کو عدالت میں پیش کردیا گیا۔
پاکستان میں سب سے بڑی بدنصیبی یہ ہے کہ ہر برا کام حب الوطنی کے نام پر کیا جاتا ہے۔ میں اس نظریئے پر عمل نہیں کرتا۔ جب تک اسے کسی نئی تشریح یا لفظ کے ساتھ نہ جوڑ دیا جائے، حب الوطنی ایک مبہم لفظ رہے گا۔ مجھے آج بھی کرنل سید فاروق، بنگلہ دیشی فوجی افسر جس نے بنگلہ دیش کے بانی شیخ مجیب الرحمن اور ان کے خاندان کو مار ڈالا تھا، نے انیس سو اسی میں دورہ پاکستان کے موقع پر کہا تھا کہ سن سینتالیس کی آزادی سے قبل میں ایسٹ انڈیا کمپنی کا ایک وفادار ملازم تھا، میں نے پاک فوج میں بھی کام کیا اور اب بنگلہ دیشی فوج کے ساتھ وفاداری نبھا رہا ہوں، ہو سکتا ہے کہ مستقبل میں میری وفاداری کسی اور کے ساتھ ہو لہٰذا اور کسی ایک زمین کے ساتھ وفاداری کی بات کرنا بے وقوفی ہے۔

سوال: افغانستان میں کیا ہوا؟
جواب: افغانستان کے معاملے میں بالکل ایسا ہی کھیل بڑے پیمانے پر کھیلا گیا جب امریکا اور پاکستان نے مل کر سوویت یونین کی فوجوں کے خلاف دنیا بھر سے مسلمان لڑکوں کو افغانستان میں جمع کیا۔ یہ مسلم نوجوان ریاستوں کی آپسی لڑائی کے لیے استعمال ہوئے، جہاد کا لفظ استعمال کیا گیا۔ ریاست کے مذہب کے مطابق اس وقت بھارت اور سویت کے خلاف جہاد جاءز تھا۔ لیکن جب جہاد کا ڈرامہ رچ گیا تو سب کو یہ سکھانا پڑا کہ جہاد امریکا کے لیے نہیں بلکہ صرف سوویت یونین اور بھارت کے خلاف تھا۔
اب ایک بار پھر معاملہ وہیں پر آکر رک گیا ہے کہ ایک ریاست اپنی مرضی تھوپنا چاہتی ہے۔ پیغام بالکل واضح ہے: کوئی اس سے پاک نہیں چاہے پاکستان ہو، انڈیا، اسرائیل ہو یا پھر امریکا، مسلمان، عیسائیت، یہودیت سب ایک ہی مقصد کے پیچھے ہیں۔
آپ انفرادی طور پر لوگوں کی دہشت گردی کی بات کرتے ہیں لیکن یہ ڈسکس نہیں کرتے کہ یہ دہشت گرد ماضی میں کیا تھے اور وہ دہشت گرد کیوں بنے۔ حقیقتاً یہ سارا ڈراما ریاستی دہشت گردی ہی شروع کرتی ہے۔ پہلے ایک ریاست نے دنیا بھر سے لوگوں کو افغانستان میں جمع کیا، اور پھر انیس سو اٹھانوے میں امریکا نے کروز میزائلوں کے ذریعے ان سب کو اس لیے ختم کرنا چاہا کیوں کہ وہ افریقا میں امریکی سفارت خانے پر حملے کا الزام کسی نہ کسی پر ڈال کر کارراوئی کرنا چاہتا تھا۔ امریکا کی یہ دہشت گردی کسی نے نہ دیکھی، کروز میزائل کے اس حملے میں کئی معصوم بچے اور خواتین جاں بحق ہوگئے۔ ابھی تک یہ ثابت ہی نہیں ہوا کہ گیارہ ستمبر کا حملہ اسامہ نے کرایا لیکن اس سے پہلے ہی امریکا نے افغانستان اور پتہ نہیں کہاں کہاں حملے کردیئے۔ جب رد عمل سامنے آیا تو لاچار اور بے بس انسان خود کش بمبار بن گئے جنہیں دہشت گرد کہا گیا۔
میرے پاس احمد سعید کھدر خاندان کی ایک مثال موجود ہے۔ پوری فیملی کینیڈین شہریت کی حامل تھی۔ پوری فیملی افغانستان کی تعمیر نو کے لیے افغانستان پہنچی۔ سب سے پہلے احمد سعید کھدر کا چودہ سالہ بیٹا عمر کھدر افغانستان میں گرفتار کرلیا گیا اور اسے گوانتانامو بے بھجوا دیا گیا۔ پورے امریکی میڈیا میں اس بات کا ذکر کافی عرصے تک چلتا رہا کہ گوانتانامو بے میں امریکی فوجی اس لڑکے کو اپنی جنسی ہوس کا نشانہ بناتے رہے۔ احمد سعید کے دوسرے بیٹے عبدالکریم کو افغانستان میں امریکی فوجیوں نے پیٹھ میں گولی ماری جس کی وجہ سے وہ مکمل طور پر معذور ہوگیا، جب کہ تیسرا بیٹا عبدالرحمٰن امریکی مخبر بننے کو تیار ہوگیا۔ مجبوراً احمد سعید افغانستان سے اپنی دو بیٹیوں اور اہلیہ کے ہمراہ جنوبی وزیرستان میں پناہ لینی پڑی۔ لیکن یہاں انہیں پاکستانی فوجیوں نے نہیں چھوڑا۔ احمد سعید کو مار دیا گیا جبکہ اس کی بیٹیوں اور بیوی کو اسلام آباد لا کر چھوڑ دیاگیا، کوئی انہیں پناہ دینے یا گھر کرائے پر دینے کو تیار نہ تھا۔ ہوتا یہ ہے کہ مجرم چاہے کتنا بھی سفاک کیوں نہ ہو، اس کے خاندان کو حقوق سے محروم نہیں کیا جاتا لیکن ہماری حکومت ایسا کرتی ہے۔ احمد سعید کی اہلیہ نے حکومت پاکستان سے درخواست کی کہ اس کی لاش انکے حوالے کردی جاءے لیکن یہ درخواست مسترد کردی گئی۔ اب آپ خود کو احمد سعید کی اہلیہ کی جگہ پر رکھ کر سوچیں اور پھر یہ بتائیں کہ آپ کے پاس کچھ کرنے کے لیے کتنے آپشنز باقی رہ گئے ہیں۔
آپ کا یہ وزیر شیخ رشید احمد ٹی وی پر آکے روزانہ بیان دیتا ہے کہ آج ہم نے اتنے شر پسند مار گرائے، کل اتنوں کو ٹھکانے لگایا، آئندہ اتنے غیر ملکی ماریں گے، یہ وہی شیخ رشید ہے جو کسی زمانے میں ببانگ دہل کشمیریوں کے دہشت گرد ٹریننگ کیمپ چلاتا تھا، یہ اس وقت کی بات ہے جب شیخ رشید حکومتی حصہ نہیں ہوا کرتا تھا، اسے دہشت گرد قرار دیا جا سکتا تھا، لیکن چونکہ اب وہ حکومت کا حصہ ہے تو سب ٹھیک ہے۔ کوئی بات نہیں۔ مفادات کی جنگ میں بھارت اور پاکستان نے اپنی آپسی جنگ کے لیے کشمیریوں کو استعمال کیا، بیچ میں یہ بیچارے پس گئے، کبھی ہلاک ہوئے تو کبھی ان کی عزتیں لوٹی گئیں، کبھی گرفتار ہوکر جیلوں میں سڑتے رہے۔ یہ دہشت گرد ہیں۔
جب دو ہاتھی آپس میں لڑتے ہیں تو کچلی صرف گھاس ہی جاتی ہے اور جب دو ہاتھی لو میکنگ کرتے ہیں تو بھی گھاس ہی کچلی جاتی ہے۔ چاہے ریاستیں آپس میں جنگیں لڑیں یا پھر دوستی کریں، کچلے ہمیشہ ہتھیار یا ذرائع ہی جاتے ہیں۔

سوال: شیخ رشید نے دہشت گرد کیمپ کیسے چلانا شروع کیے؟ وضاحت کریں۔
جواب: انیس سو چھیاسی، ستاسی کے دوران یہ کہانی اس وقت شروع ہوتی ہے جب جذبات میں آکر میں نے جنرل ضیاء الحق کو خط لکھا کہ وہ ایک خود غرض جنرل ہیں، وہ ملک میں اسلامی نظام قائم کرنے کی بجائے صرف حکمرانی کرنا پسند کرتے ہیں۔ خط پڑھ کر ضیاء الحق نے مجھے میرے پاک ائر فورس کے اسکوارڈن لیڈر اور آئی ایس آئی کی افغانستان ڈیسک کے عہدوں سے برطرف کرنے کا حکم جاری کردیا۔ ملازمت سے فارغ ہونے کے بعد میں افغانستان چلاگیا جہاں مجاہدین کے ساتھ مل کر سوویت افواج کے خلاف لڑا۔ وہاں میری ملاقات اسامہ بن لادن کے استاد عبداللہ اعظم، اسامہ بن لادن اور شیخ عبدالمجید زندانی سے ہوئی۔ ملازمت سے برطرف کیے جانے کے باوجود میرے آئی ایس آئی کے ڈی جی حمید گل اور پوری تنظیم سے روابط قائم تھے۔
جنرل ضیاء الحق کی پلین کریش میں ہلاکت کے بعد انتخابات ہوئے جس میں اس بات کے زیادہ تر امکانات دکھائے دیئے کہ پیپلز پارٹی جیت جائے گی، اگر ایسا ہوا تو جہاد کا کیا ہوگا۔ ہم سب مجاہدین نے مل کر اس ساری صورتحال پر مباحثہ کیا اور یہ طے پایا کہ پیپلز پارٹی کو الیکشن میں کامیاب ہونے سے روکا جائے۔ میں نے پاکستان جا کر ڈی جی آئی ایس آئی جنرل حمید گل سے ملاقات کی اور جماعت اسلامی اور مسلم لیگ پر مشتمل ایک اتحاد اسلامک ڈیموکریٹک الاءنس بنانے میں کردار ادا کیا۔ بہر حال پی پی الیکشن تو جیت گئی لیکن اکثریت حاصل نہ کرسکی۔ مجھے اسامہ بن لادن نے فنڈز فراہم کیے کہ میں وہ رقم اس وقت کے وزیراعلیٰ پنجاب میاں نواز شریف کو دوں تا کہ بے نظیر بھٹو کی حکومت گرائی جا سکے۔ نواز شریف نے مجھ پر دبائو ڈالا کہ میں اسامہ بن لادن سے ان کی براہ راست ملاقات کا انتطام کروں جو میں نے کیا اور نواز شریف نے سعودی عرب میں تین بار شیخ اسامہ بن لادن سے ملاقات کی۔ جب تک میں یہ ملاقات کرواتا تب تک نواز شریف مجھ سے پوچھتے رہتے تھے کہ شیخ صاحب مانے یا نہیں مانے۔ نواز شریف چاہتے تھے کہ اسامہ سے انہیں چار اعشارئیہ آٹھ ملین ڈالر کا فنڈ ملے۔ انہیں فنڈ تو ملا لیکن کم، اسامہ کے توسط سے جو قیمتی چیز نواز شریف کو ملی وہ تھی سعودی شاہی خاندان سے دوستی اور مراسم۔ اس کے نتیجے میں نواز شریف کو سعودی عرب کی بھرپور سیاسی حمایت حاصل ہوئی اور وہ اس ہی بناء پر وزیراعظم بھی رہے تاوقتیکہ پرویز مشرف نے ان کی حکومت کا تختہ الٹ دیا لیکن اس کے بعد بھی سعودی خاندان نے نواز شریف کی حمایت ختم نہ کی اور انہیں پاکستان سے نکالنے کا بندوبست بھی کیا۔
اس وقت صورتحال بڑی عجیب تھی، غلام مصطفیٰ جتوئی بھی مجھے کہتے رہتے تھے کہ میری شیخ ’’اسامہ‘‘ سے ملاقات توکرا دو۔ شیخ صاحب بڑے سخی ہوا کرتے تھے اور سیاست دان ان کی سخاوت چکھنا چاہتے تھے۔
نواز شریف نے میری ملاقات شیخ رشید سے کرائی، مجھے معلوم ہوا کہ شیخ رشید راولپنڈی میں فتح جنگ روڈ پر فریڈم ہاءوس نامی ٹیرر کیمپ چلاتے ہیں۔ شیخ رشید نے مجھے اپنے کیمپ کا دورہ کرایا اور مجھ سے عربوں سے حمایت دلوانے کی درخواست کی۔ میں اپنے کئی عرب دوستوں کو شیخ رشید کے کیمپس میں لے گیا اور ان سے پیسے اور فنڈز دلوائے تاہم وہ عرب اس ماحول سے مطمئن نہ تھے۔
اس کیمپ میں نوجوانوں کو اے کے فورٹی سیون رائفل چلانا سکھائی جاتی تھی لیکن ان کی نظریاتی تربیت نہیں ہوتی تھی اور یہی بات عرب ناپسند کرتے تھے۔ عرب کہتے تھے کہ یہ نظریاتی تربیت ہی ہے جو ایک بھاڑے کے ٹٹو اور ایک پکے مجاہد میں فرق محسوس کراتی ہے۔ شیخ رشید کو نظریاتی تربیت سے کوئی لینا دینا نہیں تھا، اسے بس رقم چاہئے تھی، یعنی پچاس ہزار روپے فی بندہ۔ عربوں سے اسے پیسے تو ملے، جس کے بارے میں اس نے کہا کہ اس نے اے کے فورٹی سیون رائفلز خریدی ہیں، کتنی! مجھے علم نہیں۔

سوال: جناب، آپ یہ کیا کہہ رہے ہیں؟ یعنی جہاد کے نام پہ اتنا بڑا دھوکا؟
جواب: جہاد کے لیے جواز چاہئے ہوتا ہے، اور جب بھی جہاد کیا جاتا ہے تو انسان کا مذہبی ہونا ضروری ہوتا ہے۔ ہم مسلمانوں کا یہ ماننا ہے کہ ایک معصوم انسان کا خون پوری انسانیت کا خون کرنے کے مترادف ہے۔

سوال: آپ کا خود کش بمباروں کے بارے میں کیا کہنا ہے جو یہاں وہاں حملے کرتے پھر رہے ہیں؟
جواب: یہ لوگوں کا رد عمل ہے جو کہ ان کی پریشانیوں اور غصے کی وجہ سے ہے، لیکن اسے اسلامی طرز عمل نہیں کہا جاسکتا۔ گو کہ یہ حملہ آور نام سے مسلمان ہوتے ہیں لیکن یہ ڈونلڈ رمسفیلڈ، ڈک چینی یا دیگر امریکیوں سے کم نہیں جنہوں نے گیارہ ستمبر کے حملوں کے بدلے میں افغانستان اور عراق میں خون کا بازار گرم کردیا۔ جس طرح امریکا نے افغانستان میں جنگ شروع کی، ویسے ہی اسامہ اور ملا عمر جیسے حقیقی مجاہد بیک گرائونڈ میں چلے گئے لیکن تنظم کی باگ ڈور ایسے لوگوں کے ہاتھ میں آگئی جنہیں یہ معلوم ہی نہیں کہ جہاد ہوتا کیا ہے، ایسے افراد تو صرف امریکا کا غصہ دوسروں پر اتارتے ہیں۔