اخوندزادہ جلال نورزئی
(بلوچستان کی ڈائری)

پاکستان پیپلز پارٹی کی حکومت کا مقصد بھی دہشت گردی کے خلاف امریکہ کے شانہ بھانہ جنگ ٹھہر گیا ہے ۔ حالات تیزی سے بگڑ رہے ہیں معلوم نہیں کہ اس گمھبیر صورتحال کا پیپلز پارٹی کے مٹی بھر رہنماء کس طرح حل نکالیں گے ۔پر تشدد اور ہلاکت خیز واقعات میں دن بدن تیزی آرہی ہے ۔اپنے ملک کے اندر ہی میدان جنگ لگ گیا ہے ۔ نا عاقبت اندیش صاحبان اقتدار کو شاید معلوم نہ تھا کہ اغیار کا مقصد بھی یہی تھا جو ہورہا ہے۔ اب اس جنگ سے اگرگلو خلاصی ہوگی تو پیپلز پارٹی دسرے اندرونی معاملات پر توجہ دے سکے گی ۔ امریکہ مطمئن نہیں ہوگا بلکہ ان کے صدارتی امیدواروں اورنائب صدارت کے امیدواروں کے درمیان مناظرں اور مباحث کا موضوع ہی پاکستان اور ایٹمی ٹیکنالوجی رہا ہے ان کے نزدیک دہشت گردی کا اصل سر چشمہ پاکستان اور افغانستان ہے گویا امریکہ نے اپنے طور پر یہ فیصلہ کرلیا ہے کہ پاکستان ایک غیر مستحکم ملک ہے اور غیر مستحکم ممالک خطے کی سیاست پر ملکی منفی اثرات مرتب کرتے ہیں بلکہ امریکہ یہ بھی کہتا ہے کہ قبائلی علاقوں کے پہاڑوں میں موجود دہشت گرد اور پاکستان کے دیگر علاقوں میں پھیلے طالبان یا عسکریت پسند امریکہ کے لیے خطرہ ہیں ۔ پاکستان اپنے آپ سے متصادم ہوچکا ہے ۔ افغانستان کی سرزمین اب پاکستان کے خلاف استعمال ہورہی ہے یہی نہیں بلکہ ذرائع کے مطابق پاکستان کے اندر سے بھی قبائلی علاقوں پر حملے کئے جاتے ہیں اس تناظر میں بلوچستان کا شمسی ایئر پورٹ کا بطور خاص ذکر کیا جاتا ہے ۔ حیرت اس بات پر ہے کہ ملک کی آرمی کو امریکہ اپنے مفاد کے لیے استعمال کررہا ہے مگر اس کے برعکس افغانستان میں موجود بھارتی لابی کی ملی بھگت سے بلوچستان کی شورش کو بھی ہوادی جارہی ہے جبکہ حقیقت یہ ہے کہ حکومت کو اب اتنی مہلت ہی نہیں مل رہی ہے کہ بلوچستان کے مسئلے پر تسلسل کے ساتھ پیشرفت کی جائے۔ یہ الگ موضوع ہے کہ بلوچستان کا مسئلہ آئینی اور سیاسی ہے یہاں صوبائی خود مختاری اور حقوق کا مطالبہ کیا جارہا ہے تاہم یہ امر بھی ثابت شدہ ہے کہ بلوچ مسلح مزاحمت کو بیرونی پشت پناہی حاصل ہے اور ان قوتوں کی کوشش اور منصوبہ بندی یہی ہے کہ بلوچستان کا مسئلہ جوں کا توں رہے اور یہ اپنے مقاصد میں پیشرفت کرتے رہیں۔ بلوچستان کے ساتھ افغانستان کی طویل سرحدی پٹی پر آمدروفت روکنا قطعی نا ممکن ہے نا ہی کسی کے ماتھے پر دہشت گرد اور طالبان لکھا ہوا ہوتا ہے اگر امریکہ نیٹو اتنی بڑی ٹیکنالوجی سے لیس ہونے کے باوجود افغانستان سے مبینہ طور پر طالبان کے تدارک کے اقدامات نہیں کرسکتا ہے تو حکومت پاکستان کے لیے یہ کام کیسے آسان ہے ۔ باجوڑ اور دیگر قبائلی علاقوں کے عوام افغانستان بھی ہجرت کررہے ہیں بڑی تعداد میں آپریشن کے متاثرین نے ملک کے مختلف علاقوں کا رخ کر لیا ہے امدادی کیمپوں میں رہائش اختیار کرلی گئی ہے ۔ جنگجوئوں کے خلاف آپریشن کے باعث یقینا عسکریت پسند بھی ادھر ادھر جائے پناہ ڈھونڈیں گے خصوصا بلوچستان کا علاقہ ژوب وانا سے متصل ہے ،بیت اللہ محسود کا بھائی عبداللہ محسود بھی 24جولائی007کو ژوب میں مارا گیا چنانچہ یہ امکان موجود ہے کہ ژوب سمیت بلوچستان کے سرحدی علاقوں میں آپریشن کا آغاز کردیا جائے اگر ایسا ہوتا ہے تو ایک طویل پٹی پر غیر یقینی صورتحال جنم لے لے گی جبکہ بلوچ مزاحمت کار بھی تقویت حاصل کریں گے نیز طالبان یا وہ قوتیں جو افغانستان میں قابض امریکہ اور نیٹو فورسز کے خلاف بر سرپیکار ہیں نتیجتاً ًفورسز پر حملے شروع کردینگے اور خودکش حملے بھی ہوسکتے ہیں۔ گزشتہ چند دنوں میں سوئی ،جعفرآباد اور دیگر علاقوں میں نا خوشگوار واقعات رونما ہوچکے ہیں ۔عید سے قبل یعنی 28ستمبر کو کوئٹہ میں ایک شاپنگ سینٹر اور سی ڈی پلازہ میں دھماکے ہوئے یہ دھماکے دن کے وقت ہوئے جب مرد و خواتین عید کی خریداری میں مصروف تھے۔ 3اکتوبر کو ڈی آئی جی انسویٹی گیشن رحمت اللہ نیازی اور ڈی آئی جی آپریشن وزیر خان ناصر نے مشترکہ پریس کانفرنس سے خطاب کیاجس میں بتایا گیا کہ پولیس نے کوئٹہ کے جنوب میں واقع میاں غنڈی میں چھاپہ مار کر دو مکانوں میں ٹھہرے ہوئے پانچ افراد کو گرفتار کرلیا ۔ افراد کے قبضے سے خودکش جیکٹس، راکٹ لانچر، پانچ دستی بم، اٹھارہ کلو دھماکی خیز مواد، ڈیٹر نیٹر پولیس اور اے ٹی ایف کی وردیاں برآمد کرلیں۔ گرفتار افراد کا تعلق کالعدم تنظیم لشکر جھنگوی سے بتایا گیا ہے ۔ بلوچستان میں بلوچ مزاحمتی تنظیمیں علیحدگی کا مطالبہ کررہی ہیں اور مزاحمت کو آزادی کی جنگ قرار دے رہی ہیں۔ چودہ اگست کے دن کو یوم سیاہ منایا جاتا ہے ۔ عید الفطر کو بھی یوم سیاہ کے طور پر منایا گیا۔ بلوچ خواتین پینل نے عید کے پہلے روز شہر میں احتجاجی ریلی نکالی۔ علیحدگی کی بات کرنے والے بلاشبہ قلیل تعداد میں ہے مگر یہ نعرہ بے معنی نہیں ہوسکتا اس مزاحمتی سوچ کے باعث بلوچ لیڈر شپ کمزور ہوگئی ہے طاقت و قوت کا سر چشمہ مزاحمت کار اور اس سوچ کو سیاسی قوت فراہم کرنے والی جماعتیں بن رہی ہیں۔ عید کے دن خواتین نے پلے کارڈ پر’’ ہمار پیغمبر ہمارا نبی نواب مری نواب مری‘‘ کے الفاظ تحریر کئے تھے یعنی جذباتی فضاء بن رہی ہے ۔اور ان کے جذبات سے بیرونی قوتیں اپنا مقصد حاصل کرسکتی ہے مقصد بیان یہ ہے کہ ملک یقینا مشکل میں پھنس چکا ہے چنانچہ اس تناظر میں بہر طور حکومت کو مفاہمت کے عمل کو آگے بڑھانا ہوگا۔ بلوچستان کے مسئلے کو ترجیح دینی ہوگی۔ وزیراعلیٰ بلوچستان نواب محمد اسلم رئیسانی نے بزرگ بلوچ قوم پرست رہنماء نواب خیر بخش مری اور ان کے صاحبزادے نوابزادہ حیربیار مری کے خلاف قائم مقدمات لیکر ایک مستحسن اقدام اٹھایا ہے جس کی تفصیل 30ستمبر کے اخبارات میں چھپ چکی ہے ۔ ان مقدامات میں چار زیر سماعت ہیں اور چار میں عدم پیروی کی وجہ سے انہیں مختلف المعیاد سزائیں سنائی گئی تھیں ان مقدمات میں ان کی سزا ختم کردی گئی ہے ۔ سوائے بلوچستان ہائی کورٹ کے سینئر جج جسٹس محمد نواز کے قتل کے مقدمہ کے۔ جسٹس نواز مری کا مقدمہ کا فیصلہ ابھی تک نہیں ہوا ہے ۔ علاوہ ازیں محکمہ داخلہ نے باقی تمام واپس لینے کا نوٹیفکیشن جاری کردیا ہے ۔ پیپلز پارٹی کا دبئی میں قیام پذیر نواب مری کے بیٹے نوابزادہ گزین مری سے بھی رابطے ہیں تقریبا ڈیڑہ ماہ قبل صدر آصف علی زرداری نے بھی ان سے ملاقات کی تھی ان رابطوں میں مفاہمت کے عمل کو آگے بڑھانے میں متعلق امور پر بات چیت کی گئی تھی اور نوابزادہ گزین مری کو پاکستانی پاسپورٹ جاری کرنے کا فیصلہ کیا گیا۔ وفاقی مشیر داخلہ نے رمضان سے قبل اپنے دورہ کوئٹہ کے دوران کہا تھا کہ اب نوابزادہ گزین مری اپنے ملک کسی بھی وقت آسکتے ہیں۔ اس کے علاوہ نوابزادہ حیربیار لندن میں مقیم ہے سابق حکومت کی درخواست پر برطانوی حکومت نے حیر بیار مری کو گرفتار کرلیا تھا جس کی بعد ازاں ضمانت پر رہائی عمل میں آئی تھی۔ واضح رہے کہ جسٹس نواز مری کے قتل کے بعد ناخوشگوار واقعات رونما شروع ہوگئے تھے بہر کیف نواب مری اور ان کے صاحبزادوں پر قائم مقدامت کی واپسی خوش آئند ہے اور ہونا یہ چاہیئے کہ صوبے کے قوم پرست رہنماء اپنا مثبت کردار ادا کریں۔