اس میں کوئی شک نہیں کہ پاکستان نے آزادی کے بعد کئی میدانوں میں فقید المثال ترقی کی ہے، لیکن بدقسمتی سے چند انتہائی ضروری میدان ایسے ہیں جہاں پاکستان نے ترقی معکوس کی ہے۔ اور یہ میدان کار ایسے ہیں جہاں کسی بھی ریاست کی ناکامی اُس کی وجود پر سوالیہ نشان لگا دیتی ہے۔

انسانی جان کا تحفظ:
پاکستانی ریاست اپنے عوام کے جان و مال کے تحفظ میں بُری طرح ناکام رہی ہے۔ غریب عوام کے چور لُٹیروں اور غارت گروں کے ہاتھوں لُٹنا تو الگ بات تھی، اس ملک کے محافظ ہی اس ملک کی عوام کے دشمن بن گئے۔ پہلے مشرقی پاکستان میں اپنی ہلاکت خیزیوں کو چھپانے کی کوشش کرتے رہے پھر بلوچستان میں قتل و غارت گری کی داستانیں بنا ڈالیں۔ ابھی یہ قصے تمام نہ ہوئے تھے کہ کراچی اور قبائلی علاقہ جات میں نئے فسادات کو جنم لینے کا سبب خود اس کی سیکیورٹی فورسز بن گئیں

کرپشن:
اس ملک میں امیر اور طاقتور طبقہ سے لے کر غریب طبقہ تک کرپشن اور دوسرے کی جیب کاٹنے کی کوششوں میں لگا ہوا ہے۔ جس کو جہاں موقع لگتا ہے وہاں پر "اضافی آمدن" کمانا اپنا فرض سمجھتا ہے۔ ایک دوسرے کے ساتھ دھوکہ دہی اور غلط بیانی کر کے اشیا کو بیچنا اس ملک کے عوام کا طرہ امتیاز ہے۔حالیہ کیس یعنی تین سے سات پاکستانی کرکٹرز کا تھوڑی سی رقم کی خاطر اپنا ایمان بیچنا ظاہر کرتا ہے کہ عوام کو ملک سے کسی قسم کی کوئی دلچسپی نہیں ہے۔

نا اہلی:
چند لوگوں کو چھوڑ کر اس ملک کی اکثریت ہر معاملے میں نا اہل ہے۔ کھیل کے میدان ہوں یا سرکاری دفاتر، ہر جگہ نا اہل لوگوں کے کارنامے سامنے نظر آ رہےہوتے ہیں۔

تربیت کا فقدان:
یہی وجہ ہے کہ اس ملک کی سکلڈ لیبر بھی ان سکلڈ تصورکی جاتی ہے۔ ملکی تعلیمی اسناد کو بیران ملک تو کُجا خود پاکستان کے تھوڑے سے اچھے ادارے بھی تسلیم نہیں کرتے۔ سندھ میں ڈگریوں کا بکنا اور بلوچستان میں نقل مافیا اسی بات کی ایک کڑی ہیں۔

یہ اور ان جیسے کئی دیگر فیکٹرز کی وجہ سے کہا جا سکتا ہے کہ پاکستان ایک ناکام ریاست ہے۔
اور ناکام ریاست ہو یا ناکام انسان، ان کے ساتھ کیا سلوک کیا جاتا ہے ، سب کو معلوم ہے۔