وفاقی وزیر اطلاعات و نشریات شیری رحمن نے اعلان کیا ہے کہ میڈیا کے خلاف کالے قوانین پر مشتمل پیمرا آرڈیننس برائے 2002ء، جس میں گزشتہ سال 3 نومبر ترمیم کی گئی تھی، کو پارلیمنٹ میں بل پیش کرکے ختم کیا جا رہا ہے۔ ایک معزز وکیل فیصل صدیقی کے مطابق گزشتہ سال 3 نومبر کو پیمرا آرڈیننس میں 10 ترامیم کی گئی تھیں جو 3 مارچ کو ختم یا ایکسپائر ہوچکی ہیں لہٰذا ختم ہوچکی چیز کو ختم کرنے کےلئے پارلیمنٹ میں بل پیش کرنےکا کوئی قانونی جواز موجود نہیں ہے، اگر ایسا کیا گیا تو اس کا مطلب جنرل پرویز مشرف کی جانب سے تین نومبر کو اٹھائے گئے اقدامات کی توثیق کرنا ہوگا کیونکہ قانوناً اگر جنرل پرویز مشرف کے اقدامات غیر قانونی تھے تو ایسے غیر قانونی اقدامات کے خاتمے کےلئے اسے پارلیمنٹ میں پیش کرنے کی ضرورت نہیں ہے۔ حکومت کے اس اقدام سے وکلاء رہنمائوں کے اس موقف کو شدید دھچکا لگے گا کہ معزول ججوں کو بحال کرنے کےلئے کسی آئینی ترمیم کی ضرورت نہیں ہے۔ قانونی اور آئینی طور پر پیمرا آرڈیننس ختم ہوچکا ہے اور اس حوالے سے مندرجہ ذیل نکات اہم ہیں۔

۔ پیمرا آرڈیننس برائے 2002ء میں 3 ترامیم کرکے میڈیا کے خلاف 10 کالے قوانین بنائے گئے۔
۔ آئین کے آرٹیکل 89(2)(a)(i) کے مطابق کوئی بھی آرڈیننس اپنے اجراءکے چار ماہ بعد ختم ہوجاتا ہے۔ اسلئے آئین کے تحت پیمرا کا تیسرا ترمیمی آرڈیننس 2007ءتین مارچ 2008ءکو ختم ہوچکا ہے۔ یہاں یہ بات بھی قابل ذکر ہے کہ آئین کے مطابق چیف آف آرمی اسٹاف کو یہ اختیار نہیں کہ وہ آرڈیننس کا اجراءکرے۔ یہ اختیار صرف صدر مملکت کے پاس ہے۔
۔ اگر پیمرا کا تیسرا ترمیمی آرڈیننس 2007ءختم ہوچکا ہے تو اسکے بعد پارلیمنٹ میں اسے ختم کرنے کے حوالے سے مزید کوئی بل پیش کرنے کی ضرورت نہیں ہے۔
۔ جنرل پرویز مشرف کی جانب سے 21 نومبر 2007ءکو آئین کے آرٹیکل میں کی گئی ترمیم 270-AAA انکی جانب سے کئے گئے تمام غیر آئینی اقدامات کو تحفظ فراہم کرتا ہے۔ اس حوالے سے پیمرا کے ترمیمی آرڈیننس 2007ءکو آرٹیکل 270-AAA کی شق تین کے تحت تحفظ حاصل ہے۔ مذکورہ آرٹیکل کے تحت کہا گیا ہے کہ پیمرا ترمیمی آرڈیننس 2007ء چار ماہ کے بعد بھی ختم نہیں ہوگا اور ایسے تمام آرڈیننس صرف پارلیمنٹ کے ذریعے ہی ختم کئے جا سکیں گے۔
۔ مذکورہ بالا صورتحال کو دیکھتے ہوئے اگر پیمرا آرڈیننس میں تین نومبر کو کی گئی ترامیم کو ختم کرنے کےلئے کوئی بل پیش کیا جاتا ہے تو اس کا مطلب یہ ہے کہ پارلیمنٹ یہ تسلیم کرلے گی کہ آرٹیکل 270-AAA آئین کا حصہ ہے۔
۔ اسلئے ضرورت اس بات کی ہے کہ پارلیمنٹ میں اس بل کو پیش کئے جانے کی مخالفت کی جائے کیونکہ بل پیش ہونے سے عدلیہ کی بحالی کی تحریک کو نقصان ہوگا۔
۔ جہاں تک پیمرا آرڈیننس کی قانونی حیثیت کا سوال ہے تو اسکا جواب سیدھا سا ہے۔ آرڈیننس اپنے اجراءکے چار ماہ بعد ختم ہوچکا ہے، صرف وزارت اطلاعات و نشریات کو احکامات جاری کئے جانے ہیں کہ ان کالے قوانین پر مزید عمل درآمد نہ کیا جائے۔