درجہ بندی: (1 votes - 5.00 average)

میں یہاں پر ایک ایسے وکیل کا آنکھوں دیکھا احوال پیش کر رہا ہوں جس کا یہ ماننا ہے کہ 9 اپریل کو سٹی کورٹ کراچی میں ہونے والا واقعہ عدلیہ کی بحالی کا مطالبہ کرنے والے وکلاءنے نہیں بلکہ دانستہ طور پر ایم کیو ایم کے غنڈہ وکیلوں کی دانستہ حرکت کی وجہ سے ہوا۔ وکیل کا نام نہیں دیا جا رہا۔:
جہاں تک میرا خیال ہے، کراچی بار ایسوسی ایشن میں تقریباً دوپہر 12 بجے کے قریب افراتفری اس وقت شروع ہوئی جب ایم کیو ایم کے سٹی ڈسٹرکٹ گورنمنٹ، کے ای ایس سی اور دیگر اداروں میں کام کرنے والے وکلاءکے گروپ (لیگل ایڈ کمیٹی) نے غیر وکلاءافراد کے ساتھ مل کر کراچی بار ایسوسی ایشن کی جنرل باڈی کے اجلاس میں داخل ہوگئے اور جنرل پرویز مشرف کی حمایت اور شیر افگن نیازی پر تشدد کے خلاف نعرے لگانے لگے۔ اس موقع پر لیگل ایڈ کمیٹی سے تعلق رکھنے والا ایک وکیل چلایا کہ کمیٹی کے ایک رکن پر دوسرے وکلاءنے تشدد کیا ہے جس سے وہ زخمی ہوگیا ہے جس کے بعد بات گالم گلوچ سے ہاتھا پائی تک پہنچ گئی۔
چند ہی منٹ بعد ایم کیو ایم کے غیر وکلاءافراد نے سٹی کورٹ کا گھیرائو کرلیا اور وہاں عدلیہ کی بحالی کا مطالبہ کرنے والے چیدہ چیدہ وکلاءکی گاڑیوں کو نذر آتش کرنا شروع کردیا۔ اس دوران ہمیں معلوم ہوا کہ ملیر بار کی بلڈنگ کو بھی جلادیا گیا ہے۔ ابھی ہم یہ خبر ہضم ہی نہیں کرپائے تھے کہ انہی مسلح افراد نے سٹی کورٹ کے ارد گرد کی عمارتوں خصوصاً طاہر پلازہ کے کمروں کو تالے لگا کر آگ لگانا شروع کردیا۔ آگ صرف ان ہی عمارتوں کو لگائی جا رہی تھی جس میں وکلاءکے دفاتر تھے۔ کچھ وکلاءدوست اپنے دفاتر میں موجود ہی تھے کہ ان کے کمروں پر تالے لگا کر انہیں زندہ جلنے کے لئے چھوڑ دیا گیا۔ یہ سب پری پلانڈ لگ رہا تھا، بالکل ایسے ہی جیسے آپ کوئی چیز پہلے سے ہی طے کرکے آئے ہوں کہ یہ کرنا ہے وہ نہیں اور وہ کرنا یہ نہیں۔ ہم اپنی جانیں بچانے کےلئے اِدھر اُدھر دوڑ رہے تھے۔ صرف سٹی کورٹ کے اطراف میں نہیں بلکہ زمزمہ، پیر الٰہی بخش کو آپریٹیو ہائوسنگ سوسائٹی (المعروف پی ای سی ایچ ایس) اور گلستان جوہر تک جیسے علاقوں میں بھی وکلاءکو نقصان پہنچانے سے دریغ نہیں کیا گیا اور ان کے گھروں پر حملے کئے گئے۔
چونکہ طاہر پلازہ میں جل جانے والے افراد کی شناخت نہیں ہوپائی اسلئے میرا یہ ماننا ہے کہ سوختہ لاشیں وکلاءکی ہی ہیں۔ دعوے تو کوئی بھی کرسکتا ہے۔ ایم کیو ایم کے حیدر عباس رضوی کا کہنا ہے کہ جن دو خواتین کی سوختہ لاشیں ملی ہیں وہ انکی پولنگ ایجنٹس کی ہیں لیکن یہ نہیں بتایا کہ یہ خواتین ان وکلاءکے دفاتر میں کیا کر رہی تھیں جو عدلیہ کی بحالی کا مطالبہ کر رہے تھے۔ حقائق جاننے کے حوالے سے ہماری کوششوں کو اس وقت شدید دھچکا لگا جب ہمیں یہ معلوم ہوا کہ کراچی بار کے سابق صدر افتخار قاضی کے دفتر اور بار کے موجودہ جنرل سیکریٹری نعیم قریشی کے اپارٹمنٹ کو آگ لگادی گئی ہے۔ اس واقعہ کے بعد تقریباً وہ تمام وکلاءانڈر گرائونڈ ہوگئے جو عدلیہ کی بحالی کا مطالبہ کرتے رہے ہیں۔
بدقسمتی سے اس پورے واقعہ میں میڈیا کا کردار مایوس کن رہا کیونکہ میڈیا پورا دن یہی بات دہراتا رہا کہ فسادات وکلاءکے دو گروپس کے درمیان لڑائی کے بعد پھوٹ پڑے۔ یہ بات بالکل سمجھ میں نہیں آتی کہ جب پیپلز پارٹی اور ایم کیو ایم (جو ہمیشہ سے ہی اقتدار کی لالچی رہی ہے) کے درمیان مفاہمت ہوگئی تھی تو آخر کیا وجہ تھی کہ وہ محض ارباب رحیم اور شیر افگن جیسے شخص کےلئے بائیکاٹ کرنے پر اتر آئے۔ میں سمجھتا ہوں کہ ایم کیو ایم نے یہ سارا ڈراما اس لئے رچایا ہے کیونکہ اسے من پسند وزارتیں نہیں مل رہی تھیں۔
واضح رہے کہ 9 اپریل کو صرف ان وکلاء کو نشانہ بنایا گیا جو ججوں کی بحالی چاہتے ہیں۔ ایم کیو ایم نے جس طرح ایک بار پھر 12مئی کے واقعے کو دہرانے کی کوشش کی ہے اس سے اس بات کی ضرورت محسوس ہوتی ہے کہ ان کا کڑا احتساب کیا جائے اور واقعہ کی غیر جانبدارانہ تحقیقات کروا کر ان ہی کا جوتا ان ہی کے منہ پر مارنا چاہئے۔ اس واقعہ کے عینی شاہدین وکلاءبھی ہیں اور صحافی بھی۔ دونوں کی مشترکہ ٹیم یا کمیٹی بنا کر تحقیقات کرائی جا سکتی ہے۔