کیا بےنظیر بھٹو کا قتل پاکستان کو جوہری ہتھیاروں سے محروم کرنے اور غیر مستحکم کرنے کی ایک وسیع بین الاقوامی سازش کا حصہ ہے؟ یہ وہ سوال ہے جس سے بہت سے ازہان حتیٰ کہ حکومتی حلقوں میں بھی حیران و پریشان ہیں۔ اگرچہ کہ وزارت داخلہ نے انٹیلی جنس اےجنسیوں کی جانب سے مبینہ طور پر مانیٹر کی گئی بیت اللہ محسود کی ٹیلیفونک گفتگو کی بنیاد پر ذمہ داری کا تعین کردیا ہے لیکن حکومت میں موجود کچھ اہلکار حقیقتاً خطرے کی بو محسوس کر رہے ہیں۔
ایک سرکاری ذریعے کے مطابق یہ دیکھنا اہم نہیں ہے کہ پستول کا ٹریگر کس نے دبایا اور نہ ہی کرائے کے قاتل کے حوالے سے پریشان ہونے کی ضرورت ہے۔ جو حقیقتاً اہم ہے وہ یہ ہے کہ اس ہاتھ تک پہنچا جائے جس نے ڈوریاں کھینچیں۔ اس بات کا یقین پیدا ہوتا ہے کہ القاعدہ نہیں بلکہ کوئی غیر ملکی طاقت اس قتل کی ماسٹر مائنڈ ہے جس کی مثال ماضی میں نہیں ملتی۔ پیپلز پارٹی، بیت اللہ محسود اور القاعدہ کے ترجمان پہلے ہی وفاقی وزارت داخلہ کے دعوے مسترد کرچکے ہیں۔
بعض اخباری اطلاعات، جن میں دعویٰ کیا گیا ہے کہ مقتول رہنما بیت اللہ محسود کے ساتھ رابطے میں تھیں، وزارت داخلہ کے دعووں کی مزید نفی کرتی ہیں۔ سینئر صحافی حامد میر نے پیر کو بھی اپنے کالم میں اس حقیقت کی تصدیق کرنے کے علاوہ ایک حیران کن انکشاف کیا ہے کہ بےنظیر بھٹو نے اپنے قتل سے قبل انہیں بتایا تھا کہ امریکا برطرف چیف جسٹس افتخار محمد چوہدری کی بحالی نہیں چاہتا۔
ایک ذریعے نے، جس کی بےنظیر بھٹو سے بہت بے تکلفانہ مراسم تھے، بتایا کہ بےنظیر بھٹو پاکستان کو جوہری ہتھیاروں سے محروم کرنے اور عدم استحکام کا شکار کرنے کی بین الاقوامی سازش سے آگاہ تھیں۔ انہوں نے کہا کہ گزشتہ چند ماہ کے دوران بہت سی باتیں جو انہوں نے عوامی طور پر کہیں وہ ان کے عزم کا حصہ نہیں تھیں۔ ذریعے نے کہا کہ بےنظیر بھٹو کو اس بات کا اندازہ تھا کہ ملک کے مختلف حصوں خصوصاً قبائلی پٹی میں جو کچھ ہو رہا ہے اسے سیاسی طریقوں اور بات چیت کے ذریعے مناسب طریقے سے نمٹا جا سکتا ہے اور وہ اقتدار میں آنے کے بعد چاہتی تھیں کہ اس معاملے کو آگے بڑھایا جائے تاہم بےنظیر بھٹو کے حقیقی مقاصد کے بارے میں ان انکشافات کے برعکس ان کی خود ساختہ جلاوطنی سے واپسی خطرات سے بھرپور تھی اور یہ سب پر واضح تھا کہ واشنگٹن چاہتا تھا کہ وہ پاکستان کی آئندہ وزیراعظم بنیں۔
امریکا کے خلاف سخت جذبات کے باوجود امریکی حکام بشمول محکمہ خارجہ کے حکام نے ان کے حق میں بار بار بیانات جاری کئے جبکہ وہ یہ جانتے تھے کہ مسلم ممالک اور پاکستان میں گیارہ ستمبر کی پالیسیوں سے امریکا مخالف جذبات انتہائی عروج پر ہیں۔ اسلام آباد میں ایک اعلیٰ سرکاری اہلکار نے نام ظاہر نہ کرنے کی شرط پر مجھے بتایا کہ بےنظیر بھٹو کے قتل کے حوالے سے کچھ لوگ اسلام آباد میں موجود کسی شخص یا ملک کی ناقابل شناخت اسٹیبلشمنٹ پر انگلیاں اٹھا رہے ہیں۔ ان کا خیال تھا کہ منصفانہ، خود مختار اور مکمل تحقیقات ہی سے ممکنہ طور پر یہ معاملہ حل ہوسکتا ہے کہ بےنظیر بھٹو کے قتل کے پیچھے کس کا ہاتھ تھا۔ حکومت میں موجود کوئی بھی شخص اس گھنائونے اقدام سے فائدہ حاصل نہیں کرسکتا اور بےنظیر بھٹو کے قتل کے بعد کی صورتحال سے یہ بات ثابت ہوگئی ہے کہ حکمرانوں ہی کو درحقیقیت نقصان ہو رہا ہے۔
ذریعے نے مجھے مزید بتایا کہ ممکن ہے کہ کچھ انٹیلی اےجنسیاں یا عسکری تنظیموں سے تعلق رکھنے والے مقامی کھلاڑی اس میں ملوث ہوں لیکن اس کا ماسٹر مائنڈ کسی دور دراز غیر ملکی سرزمین پر بیٹھا دکھائی دیتا ہے۔
ذریعے نے بےنظیر بھٹو کے قتل سے کچھ عرصہ قبل ملک کی ممتاز انٹیلی جنس ایجنسی کی جانب سے دی گئی رپورٹ کا حوالہ دیتے ہوئے کہا کہ حکومت اس بات پر حیران رہ گئی تھی کہ جب رپورٹ سے یہ معلوم ہوا کہ ایک بین الاقوامی کھلاڑی جو بظاہر اسلام آباد کا دوست ہے افغانستان کے ذریعے پاکستان کے قبائلی علاقوں میں مخصوص انتہا پسند عناصر کو فنڈ فراہم کر رہا ہے تاکہ عدم استحکام پیدا کیا جا سکے۔
بےنظیر بھٹو کے بعد نواز لیگ کے چیف (نواز شریف) کی سلامتی کے حوالے سے سنگین تشویش کا اظہار کیا جا رہا ہے جن کے نام کا انکشاف وزارت داخلہ نے کیا تھا کہ وہ القاعدہ کی ہٹ لسٹ پر ہیں۔ اگرچہ کہ بےنظیر بھٹو کا نام القاعدہ کی ہٹ لسٹ پر ہونے کا امکان اس وجہ سے ہوسکتا ہے کہ انہوں نے امریکا نواز بیانات دیئے تھے لیکن اس بات پر بہت سے لوگوں کو حیرت ہے کہ نواز شریف بھی القاعدہ کی ہٹ لسٹ پر ہیں۔ نواز شریف اور ان کی مسلم لیگ گیارہ ستمبر کے بعد امریکی پالیسیوں کی ناقد رہی ہے اور اس نے کبھی ایسی حرکت نہیں کی جو القاعدہ کے غضب کو دعوت دینے والی ہو۔ وہ ہمیشہ قبائلی علاقوں میں فوجی ایکشن کی مذمت اور مخالفت کرتے رہے ہیں۔
سرکاری حلقوں میں بھی اس بات پر خدشے کا اظہار کیا جا رہا ہے کہ خدا نخواستہ نواز شریف کا انجام بھی بےنظیر بھٹو جیسا ہوا تو یہ پاکستان، جو پہلے ہی مقبول عام رہنما کے قتل کے بعد شدید دھچکوں کا شکار ہے، کی سلامتی کےلئے ایک سنگین خطرہ اور افراتفری کا باعث بنے گا۔
تاہم، سرکاری حلقوں میں اس بات کا اعتراف بھی ہے کہ جس قسم کی سیکیورٹی بےنظیر بھٹو کو فراہم کی جانی چاہئے تھی وہ فراہم نہیں کی گئی جس کی وجہ سے قاتل ان تک باآسانی پہنچ گیا۔ یہ صرف بےنظیر بھٹو ہی نہیں تھیں جو حکومت کی فراہم کردہ سیکیورٹی پر غیر مطمئن تھیں بلکہ نواز شریف نے بھی پیر کو شدید تشویش کا اظہار کیا تھا۔