ائن الیون کی کوکھ سے جنم لینے والا کروسیڈ دسویں برس میں داخل ہورہا ہے۔ دنیا کے سب سے کمزور، ناتواں، نہتے، کم وسیلہ اور بے سروسامان ملک پر دنیا کے سب سے طاقت ور، مضبوط، ہلاکت آفریں اسلحہ سے لیس اور جدید ترین ٹیکنالوجی کے حامل ملک کی یلغار ابھی تک سنگلاخ پہاڑوں سے سر پھوڑ رہی ہے اور دور دور تک فتح کے آثار نظر نہیں آ رہے۔ بارک حسین اوباما تبدیلی کا نعرہ لگاتے ہوئے واشنگٹن کے قصر سفید میں داخل ہوئے لیکن راہداریوں میں چھپی بیٹھی بدروحیں انگڑائی لے کے لپکیں اور اوباما کو جکڑ لیا۔ تین ماہ تک اپنے آپ سے جنگ کرنے کے بعد بالآخر امریکی صدر جارحیت شعار لابی کے سامنے ڈھیر ہوگئے اور امن کا نوبل پرائز حاصل کرنے کے ساتھ ہی افغان جنگ کو نیا ایندھن فراہم کرنے کے لئے مزید تیس ہزار فوجی بھیجنے کا اعلان کردیا۔ قیاس کیا جاسکتا ہے کہ جو افواج قاہرہ ساڑھے آٹھ برس تک کوئی کارنامہ نہیں دکھا سکیں وہ سال ڈیڑھ سال مزید خیمہ زن رہیں تو کون سا معجزہ رقم کرلیں گی۔
مئی2009میں انسداد دہشت گردی کے سینئر ایڈوائزر اور امریکی فوج کے مشیر ڈیوڈ کیلکیولن (DAVID KILCULLEN)نے امریکی کانگریس کو بریفنگ دیتے ہوئے بتایا تھا کہ2006سے اب تک ہمارے ڈرون حملوں کے نتیجے میں صرف چودہ مطلوبہ دہشت گرد مارے گئے ہیں۔ جبکہ کل700افراد لقمہ بنے“ ڈیوڈ نے کانگریس کو مشورہ دیا تھا کہ ڈرون حملوں کا سلسلہ ختم کر دیا جائے لیکن اس مشورے کو نظر انداز کر دیا گیا ۔ اگر ڈیوڈ کی یہ بات مان بھی لی جائے کہ چودہ افراد واقعی دہشت گرد تھے اور انہیں ہلاک کرنا ضروری تھا تو بھی خود امریکیوں کے مطابق ان حملوں کا لقمہ بننے والے 98فیصد افراد معصوم تھے جن میں اچھی خاصی تعداد عورتوں ،بچوں اور بوڑھوں کی بھی تھی۔
گزشتہ برس2009میں امریکیوں نے پاکستان پر44ڈرون حملے کئے، امریکی اور پاکستانی حکام کے اعداد و شمار بتاتے ہیں کہ ان چوالیس حملوں کے دوران صرف پانچ القاعدہ طالبان ”مطلوب عناصر “ تھے۔ تصور کیجئے کہ ان حملوں کے دوران مجموعی طور پر708افراد لقمہ اجل بنے۔ اگر پانچ مطلوب بھی تھے تو 703کا لہو کس کے ہاتھوں پہ تلاش کیا جائے ؟ ہم یہ بھی کہہ سکتے ہیں کہ ایک مطلوب دہشت گرد ( اگر ایسا ہی ہے تو بھی) کے عوض 140 معصوم افراد شہید کر دیئے گئے۔ ذرا مزید غور فرمایئے۔ بارہ ماہ کے دورن703 معصوم افراد کی شہادت کا مطلب یہ ہے کہ اوسطا ہر ماہ58اور ہر روز دو افراد امریکی حملوں کی بھینٹ چڑھ گئے۔ جب ہر روز امریکہ دو پاکستانیوں کو اس بے دردی کے ساتھ قتل کر رہا ہو تو عوام کس طرح اس جنگ کی ہمنوائی کریں گے؟ پاکستانی حکومت کے مرتب کردہ اعداود و شمار کے مطابق 2006ء سے 2009ء تک چار برس کے دوران 83ڈرون حملوں کے دوران 1258افراد نشانہ بن چکے ہیں۔ اگر19 مطلوبہ دہشت گرد نکال بھی دیئے جائیں تو 1239مقتولین کا خون بہا کس سے طلب کیا جائے ؟ یہ کسی کو معلوم نہیں کہ ان حملوں کے باعث کتنی بستیاں غارت ہو گئیں؟ کتنے گھر پیوند زمین ہو گئے؟ کتنے افراد کے وسائل رزق ختم ہو گئے؟ کتنے لوگ عمر بھر کے لئے معذور ہو گئے ؟ جو بچ رہے، ان پر کیا گزر رہی ہے؟
ایک پہلو یہ بھی ہے کہ نام نہاد طالبان یا دہشت گردوں کا نشانہ بننے والے تو سب کو دکھائی دیتے ہیں نقصانات کے ازالے کیلئے اقدامات بھی کئے جاتے ہیں۔ متاثرین کی مالی امداد بھی کی جاتی ہے۔ مقتولین کے بچوں کی تعلیم ، پرورش اور ملازمت کا اہتمام کیا جاتا ہے۔ یہ سب کچھ ضرور ہونا چاہئے لیکن کیا حکومت بتائے گی کہ اس نے امریکی ڈرونز کا نشانہ بننے والے1239شہداء کے لواحقین، باقی بچوں اور پسماندگان کے لئے کیا کیا ؟ ان کی بحالی کے لئے کیا اقدامات کئے؟ ان کے بچوں کی نگہداشت کا کیا سامان کیا؟ کیا پہاڑوں میں رہنے والے پاکستانیت سے محروم ہو جاتے ہیں؟ اور کیا امریکی قہر کا نشانہ بنے والے لوگ ہر استحقاق گنوا بیٹھتے ہیں ؟ کیا یہ رویہ ایک بے ننگ و نام جنگ کو مزید بے اعتبار نہیں بنا رہا؟
کیا یہ پاکستانی نہیں؟,,,,نقش خیال…عرفان صدیقی