عادل سہیل

السلام علیکم و رحمۃ اللہ و برکاتہ ،
آج کے جنگ آن لائن میں عرفان صدیقی صاحب کا ایک کام پڑھنے کو ملا ، کافی اچھا لگا اس لیے سیاست میں دلچسپی رکھنے والوں کے لیے یہاں ارسال کر رہا ہوں ،
اس کالم کی آخری چند سطور میں ، میں نے اپنی طرف سے چند ایک الفاظ کا اضافہ کیا ہے ، امید ہے میری تحریر پڑھنے والے جان جائیں گے کہ وہ اضافہ شدہ الفاظ کون سے ہیں ،
والسلام علیکم۔
::: یہ معافیاں ::::
عافیہ پہ ٹوٹتے ستم نے ایک پرانے زخم کے بخیے بھی ادھیڑ ڈالے ہیں۔ مجھے جامعہ حفصہ کی شہید بچیاں شدت سے یاد آرہی ہیں اور ایک رُکنی جماعت کے سربراہ شیخ رشید احمد نے ادھڑے ہوئے زخم پر مٹھی بھر نمک چھڑک دیا ہے۔ ووٹوں کی جستجو میں دو باریش شخصیات کو اپنے دائیں بائیں بٹھا کر انہو ں نے فرمایا ”علماء میرے ساتھ ہیں۔میں نے لال مسجد اور جامعہ حفصہ کے مقتولین پر معافی مانگ لی ہے“۔
ایک جملے نے حساب بے باق اور کھاتہ صاف کردیا ؟ !!!
کس قدر آسان نسخہ ‘ کس قدر سہل مداوا ہے۔
جب تک بس چلے آمر وقت کے دست ستمگر پر بوسے دیتے رہو‘ اس کے قدموں تلے آنکھیں بچھاتے رہو‘ اس کی چاپلوسی کو فلسفہٴ سیاست کی معراج قرار دیتے رہو‘ اس کی جمہوریت کشی کو دلائل کی قبائیں پہناتی رہو‘ اس کی غارت گری کو تقاضائے وقت قرار دیتے رہو‘ اس کی رعونت کی دہلیز پر سجدے کرتے رہو‘ اس کی خونخواری کو جوانمردی سے تعبیر کرتے رہو‘ اس کی درندگی کو قومی مفادکا جامہ زیبا پہناتے رہو‘ اس کی وطن فروشی کو حکمت کہتے رہو‘ اس کی دختر فروشی کو مصلحت کشی قرار دیتے رہو‘ اس کی بردہ فروشی پہ تالیاں پیٹتے رہو‘ اس کی سرکشی کے سامنے کورنش بجالاتے رہو‘ اس کی آئین شکنی کے قصیدے پڑھتے رہو‘ اس کے گھناؤنے کردار کی ترجمانی کو اعزاز سمجھتے رہو‘ اس کے دسترخوان کی ہڈیاں چچوڑتے رہو اور جب مکافات عمل ڈکٹیٹر کو گرفت میں لے لے ‘ مکے لہرانے والے کے بازو خزاں رسیدہ شاخوں کی طرح ناتواں ہوجائیں‘ اس کے سوکھے بالوں میں جوئیں رینگنے لگیں‘ اس کے دانت جھڑ جائیں اس کے پنجے کوڑھ کا شکار ہوکر گلنے سڑنے لگیں اور اس کا دستر خوان لپٹنے لگے تو گھر لوٹ آؤ او رکہو ”یہ سب اس کا کیا دھرا تھا“ کوئی دن گوشہ نشینی میں گزارو۔جب یقین ہوجائے کہ غم ہائے روز گار کی چکی میں پستے لوگ بھول بھلا گئے ہوں گے تو ایک بار پھر خلق خدا کی نمائندگی کا تاج سرپہ سجانے کی آرزو میں یہ کہتے ہوئے میدان میں کود پڑو کہ ”میں نے معافی مانگ لی ہے“۔
عافیہ صدیقی کو امریکی عدالت نے مجرم قرار دیا تو جناب مشاہد حسین سید بھی نعرہ زن ہوئے۔ انہوں نے حکومت پر طعن کیا۔ اصحاب ”ق“ کے عمائدین نے بھی بھاشن دیا‘ شیخ رشید احمد نے بھی لب کشائی کی۔ آنکھ کی حیا کا یہ عالم ہے کہ جس شخص نے عافیہ کو امریکی درندوں کے ہاتھ بیچا‘ یہ سب اس شخص کی غلامی پہ ناز کرتے رہے۔ عافیہ 31 مارچ 2003ء کو اٹھائی گئی تو یہ سب مشرف کے دست بستہ درباری بنے ہوئے تھے۔ ساڑھے چار برس تک وہ جانے کن عقوبت خانوں میں تڑپتی رہی اور یہ سب اقتدار کی عشرتیں سمیٹتے رہے۔ آج یہ عوام کو احساس دلارہے ہیں کہ عافیہ کے غم نے انہیں نڈھال کردیا ہے۔ کیا فریب کی کوئی حد نہیں ہوتی؟ شیخ رشید احمد نے پریس کانفرنس کی اور فرمایا ”میں نے لال مسجد کے واقعہ پر بھی معافی مانگ لی تھی“۔ کیا معافی کا لفظ نوک زباں پہ لاتے ہی سارا ماضی دھل جاتا ہے؟ یہ کوئی معمولی سانحہ نہ تھا۔
انگریز ایک صدی تک یہاں قابض رہا۔ اس کے سامراجی مظالم کی درندہ صفت کہانیاں تاریخ کے اوراق پر جابجا بکھری پڑی ہیں۔
امریکہ گزشتہ نوبرس سے درندگی کا ایک شرمناک باب رقم کررہا ہے۔
بھارت نصف صدی سے مقبوضہ کشمیر میں خون کی ہولی کھیل رہا ہے۔
لیکن جو کچھ لال مسجد اور جامعہ حفصہ میں ہوا‘ اس کی نظیر کہیں نہیں ملتی۔
یہ سانحہ کسی لادین یا غیر مسلم ملک میں نہیں۔ اسلامی جمہوریہ پاکستان میں ہوا۔ اس ملک میں ہوا جو """لاالہ الاالله """ کے نعرے (کے پس منظر میں ہزاروں لاکھوں مسلمانوں کے جان مال و آبرو کی قربانیوں کے بعد اللہ کی طرف سے وجود) تخلیق ( میں ظاہر) ہوا۔ اسلام ( کے پیروکاروں ) کی بیٹیوں پر یہ ستم اس شہر میں ٹوٹا جس کا نام ”اسلام آباد“ ہے۔ یہ غارت گری الله کے گھر اور اس سے منسلکہ ‘ بچیوں کے دینی مدرسے میں ہوئی۔ قرآن کی تلاوت کرتی معصوم بیٹیاں فاسفورس کے بموں کا رزق ہوگئیں۔ اُن کی گلی سڑی ہڈیاں گندے نالوں میں بہادی گئیں۔ کیا دلوں کو چیر دینے والا سانحہ تھا کہ اڑھائی سال بعد بھی خون کے آنسو رلادیتا ہے۔
اور موصوف کس سادگی سے فرماتے ہیں۔”میں نے معافی مانگ لی تھی“۔
4 جولائی 2007ء کو لال مسجد اور جامعہ حفصہ پہ یلغار ہوئی‘ پانی بند‘ خوراک بند‘ بجلی بند‘ پانچ دن وہ بھوک اور پیاس سے تڑپتی رہیں۔ 9 جولائی کو آپریشن ہوا اور پاکباز روحیں آسمانوں کو پرواز کرگئیں۔ جناب شیخ اُس وقت کہاں تھے؟ کیا کررہے تھے؟ کیا یہ سچ نہیں کہ قیامت کی اس گھڑی میں بھی اُن کے لئے ”سیدمشرف“ کی چاکری ‘ سید الابرار کی خوشنودی سے زیادہ عزیز رہی ؟ قبیلہٴ ”ق“ کا کوئی ایک فرد بھی مستعفی نہیں ہوا۔ آج یہی قبیلہ شیخ صاحب کی پشت پہ کھڑا اُن کی فتح کے لئے نعرہ زن ہے۔
مشرف کے عہدِ نابکار میں کیا کیا نہیں ہوا۔
جمہوریت قتل ہوئی‘
آئین مسخ ہوا ‘
پورا ملک امریکہ کے قدموں میں ڈھیر کردیا گیا‘
ڈرون حملوں کا اجازت نامہ دیا گیا‘
دینی مدارس کو نکیل ڈالی گئی‘
علماء کی قبائیں نوچی گئیں‘
اسلام کا مضحکہ اڑایا گیا‘
بگٹی کو قتل کیا گیا‘
بھارت کی غلامی اختیار کی گئی‘
جہاد کشمیر کا گلاگھونٹا گیا‘
عافیہ صدیقی کو امریکی گرگوں کے حوالے کیا گیا‘
سینکڑوں افراد کو بیچ دیا گیا‘
ڈاکٹر عبدالقدیر کو نشانہِ تضحیک بنایا گیا‘
ججوں کو بچوں سمیت قید کیاگیا‘
قبائلی علاقوں کو میدان جنگ بنا دیا گیا‘
دینی مدرسے کے نوجوان طلبہ پر بمباری کرائی گئی۔
یہ سب کچھ ہوتا رہا لیکن شیخ صاحب اور ان کا قبیلہ ہاتھ باندھے‘ گردن جھکائے مشرف کی چوکھٹ پرکھڑے رہے۔ شیخ صاحب سانحہ لال مسجد کے پانچ ماہ سات دن بعد تک وزارت کے مزے لوٹتے اور درندگی کی وکالت کرتے رہے‘ یہاں تک کہ 16 دسمبر 2007ء کو حکومت ختم ہوگئی اور وہ گھر آگئے۔ انہوں نے فروری 2008ء کا الیکشن بھی ”ق“ کے رہنما اور مشرف کے ہمنوا کے طور پر لڑا۔ پنڈی کے لوگوں نے عبرت کا سبق یاد دلایا تو شیخ صاحب بولے۔ ”مجھے لال مسجد لڑ گئی“ ان کا یہ جملہ گواہی دیتا ہے کہ اُن کے دل میں لال مسجد کا کتنا احترام اور شہداء کا کیا درجہ و مقام ہے۔
الله غفور و رحیم ہے۔ وہ جسے چاہے معاف کردے لیکن وہ دلوں کا بھید بھی جانتا ہے۔نیتوں کے احوال سے بھی باخبر ہے۔وہ معافی کے ایسے اعلانات کے معنی و مفہوم کی تمام پرتوں سے واقف ہے۔
عافیہ کے دکھ نے جامعہ حفصہ کی بچیوں کا غم بھی تازہ کردیا ہے۔ الله کے خزانے بے کراں ہیں لیکن میرا دل گواہی دیتا ہے کہ عافیہ کو بیچنے اور جامعہ حفصہ کی بچیوں کو قتل کرنے والا قبیلہ معافی کا استحقاق کھوبیٹھا ہے۔ا س قبیلے کے سردار کو وطن کی مٹی سے کوسوں دور کردیاگیا ہے اور اس کے چیلے کسی میدان میں سرخرو نہ ہوں گے۔ ان خونیوں کو معاف کردینے والے بھی الله کی پکڑ سے نہیں بچ سکیں گے۔
وہ دن بھی کیا دن ہوگا جب جامعہ حفصہ میں شہید ہونے والی مسلمان بیٹیاں نورانی پوشاکیں پہنے میرے نبی صلی اللہ علیہ وعلی آلہ وسلم کے جلو میں اللہ کے دربار میں کھڑی ہوں گی اور اُن کی انگلیاں قاتل قبیلے کی طرف اٹھی ہوں گی اور سیاہ کار ٹولہ خوف سے کانپ رہا ہوگا اور کسی کی زبان کو یہ کہنے کا یارا نہ ہوگا کہ :::
”میں نے معافی مانگ لی تھی“۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔
اے اللہ ہم بہت خطا کار ہیں ، گناہ گار ہیں ، لیکن تو غفورو رحیم ہے ، معاف فرما دے اے سچے مولانا ، ہمارے وطن اور اہل وطن اور مسلمانوں کو ایسے ضمیر فروشوں سے نجات دے دے۔

__________________
اب نہ ہو گا کہیں کوئی نزول کتاب ::: بند کر دیا رب العالمین نے یہ باب
ہے جو بھی صحیح سنت رسالت مآب ::: بے شک ہے وحیء رب الارباب

راجہ اکرام

جزاک اللہ خیر عادل بھائی

یحیٰی

بھائی معضرت میں نے تحریر نہ پڑ کر بہت غلطی کردی
اصل میں
اس جملے نے کچھ اور خیال دماغ ڈال دیا
فیصل بھائی کی پوسٹ دیکھ کر خیال آیا اسے میں پڑنا چاہتا ہوں۔
اس لئے پوسٹ ایڈٹ کردی

__________________
تیری امید آج بھی ہے ۔ ۔ ۔ ۔ ۔ ۔ ۔ ۔ ۔ ۔ ۔ ۔ ،

فیصل ناصر

اللہ آپ کو جزائے خیر دے سہیل بھائی
مجھے یقین ہے لال مسجد اور جامعہ حفصہ کے معصوم اور بےگناہ افراد کا لہو رائیگاں نہیں جائے گا

__________________
(اے پروردگار) ہم تیری ہی عبادت کرتے ہیں اور تجھ ہی سے مدد مانگتے ہیں

یحیٰی

انشاءاللہ بےگناہ افراد کا لہو رائیگاں نہیں جائے گا

عبیداللہ عبید

عرفان صدیقی اورآپ دونوں کواللہ تعالی اس مفیدکالم پر جزائے خیر عطافرمائے

فیصل ناصر

اے اللہ ہم بہت خطا کار ہیں ، گناہ گار ہیں ، لیکن تو غفورو رحیم ہے ، معاف فرما دے اے سچے مولانا ، ہمارے وطن اور اہل وطن اور مسلمانوں کو ایسے ضمیر فروشوں سے نجات دے دے۔
آمین

عبداللہ حیدر

کی میرے قتل کے بعد اس نے جفا سے تو بہ
ہا ئے اس زود پشیما ں کا پشیما ں ہو نا

عادل سہیل

السلام علیکم ورحمۃ اللہ و برکاتہ ،
اللہ تعالیٰ آپ کو بھی بہترین جزا عطاء فرمائے راجہ بھائی ، و السلام علیکم

عادل سہیل

السلام علیکم ورحمۃ اللہ و برکاتہ ،
جزاک اللہ خیرا ، جاوید بھائی ، معذرت والی کوئی بات نہیں ، ایسا بھی ہوتا ہے ، انسان سے خطاء واقع ہوتی ہے ، لیکن سب سے اچھے انسانوں میں سے وہ ہوتے ہیں جو اپنی خطاء کی اصلاح کر لیں ((((( كُلُّ بن آدَمَ خَطَّاءٌ فَخَيْرُ الْخَطَّائِينَ التَّوَّابُونَ ::: آدم کی ساری اولاد خطاء کار ہے لیکن خطاء کاروں میں سب سے اچھے وہ ہیں جو توبہ کر لیں ))))) المستدرک الحاکم ، مسند احمد ،
اللہ تعالیٰ آپ پر راضی ہو ، و السلام علیکم۔

عادل سہیل

السلام علیکم ورحمۃ اللہ و برکاتہ ،
اللہ تعالیٰ آپ کو بھی بہترین اجر عطاء فرمائے فیصل بھائی ،
مجھے بھی یقین ہے ، اور دیکھ لیجیے ایک پر تو اللہ کی طرف سے آغاز ہو گیا ، ان شاء اللہ باقیوں پر بھی اللہ کے عذاب کا کوڑا برسے گا ، و السلام علیکم۔

عادل سہیل

السلام علیکم ورحمۃ اللہ و برکاتہ ،
ان شاء اللہ ضرور یہ خون رنگ لائے گا ، اللہ کے ہاں دیر ہے اندھیر نہیں، اور اللہ کی گرفت سے کوئی بچ نہیں سکتا خواہ موسیٰ علیہ السلام کے زمانے کا فرعون ہو، یا ہمارے زمانے کا کوئی فرعون ، اللہ تبارک و تعالیٰ کے ہاں کسی مظلوم پر ہونے والے ظلم کا کھاتہ کسی کے زور سے ، کسی این آر او سے بند ہونے والا نہیں ، اور نہ ہی اس کے ہاں بے انصافی نام کی کوئی چیز ہے،
میں تو دعا کرتا ہوں کہ اللہ تعالیٰ اس ظلم میں ، اور مسلمانوں پر ہونے والے ہر ظلم میں دانستہ طور پر شامل لوگوں کو قیامت تک کے لیے عبرت کا نشان بنا دے ، آآآآآآآآآآآآآآآآمین ، ثُم آآآآآآآآآآآآآآآآآمین ، و السلام علیکم۔

عادل سہیل

السلام علیکم و رحمۃ اللہ و برکاتہ ،
بھائی عبید اللہ ، اللہ تعالیٰ آپ کو بھی بہترین ثواب سے نوازے ، و السلام علیکم۔

عادل سہیل

السلام علیکم و رحمۃ اللہ و برکاتہ ،
بھتیجے یہ شاعر پیار میں مارا گیا تھا ؟ یا سیاست میں ؟ یا اللہ کے دین پر چلنے کی پاداش میں ؟ اگر تو پہلا معاملہ تھا تو ایسے لوگوں سے پیار کے جرم میں اسے یہی کچھ ملنا تھا ،
اگر دوسرا معاملہ تھا تو وہاں اب سب کچھ ہی جائز ہو چکا ہے ،
اور اگر تیسرا معاملہ تھا تو شکوہ بے جا ہے ،
بھتیجے توبہ کا معاملہ تو اللہ کی ذات سے متعلق ہے ، اگر کوٕئی سچی توبہ کر لے تو اللہ جو چاہے اسے معاف فرمائے ، اور حق داروں کو جس طرح چاہے راضی کر لے ، لیکن قرائن سے ظاہر ہے کہ یہ قاتل تو پشیمان ہی نہیں توبہ کہاں ہوئی ، اگلے دھوکے دینے کے لیے پچھلوں کے بارے میں ایسی باتیں کرنا ہمارے ان سیاستدانوں کا عام معمول ہے ،
اللہ تعالیٰ ان کو ہدایت دے اور اگر اس کی مشیئت میں ان کے لیے ہدایت نہیں تو اللہ ہم سب کو ، ہمارے وطن اور اہل وطن کو اور تمام مسلمانوں کو ان کے اور ان جیسوں کے اور ان کے مددگاروں کے شر سے محفوظ کر دے ، اور انہیں دُنیا کے آخری لمحے تک ہر ایک کے لیے عبرت کا نشان بنا دے ، آمین ، ثم آمین ، و السلام علیکم۔

محمدمبشرعلی

جزاک اللہ بھائی!

دراصل یہاں لوگ حلال حرام میں تمیز نہیں کرتے تو دعائیں کیسے قبول ہوں،
نیکی کا حکم اور برائی سے نہیں روکتے تو اللہ کی مدد کیسے آئے،
انصاف نہیں کرتے تو عذاب الہیٰ (ذلزلے، غلامی) کیوں نہ آئے۔ ۔ ۔

__________________
کچھ لوگ سفر کے لئے موزوں نہیں ہوتے،
کچھ رستے نہیں کٹتے تنہا، اُسے کہنا۔ ۔ ۔ ۔ ۔ ۔ ۔