پاکستان میں حزب مخالف کے دو بڑے اتحادوں کی جانب سے انتخابات کا بائیکاٹ کرنے سے پہلے متفقہ ’چارٹر آف ڈیمانڈ‘ مرتب کرنے کے لیے بنائی گئی کمیٹی کا اجلاس شروع ہوگیا ہے۔
دو سابق وزراء اعظم میاں نواز شریف اور بینظیر بھٹو کی پیر کی رات کو ملاقات کے بعد قائم ہونے والی کمیٹی میں کل جماعتی جمہوری تحریک ’اے پی ڈی ایم‘ اور اتحاد برائے بحالی جمہوریت ’اے آر ڈی‘ کے چار چار نمائندے شامل ہیں۔
کمیٹی میں اے آر ڈی کی جانب سے رضا ربانی، صفدر عباسی، ملک نوید اور عبدالقدیر شامل ہیں جبکہ اے پی ڈی ایم کی نمائندگی اسحاق ڈار، احسن اقبال، عبدالرحیم مندوخیل اور پروفیسر خورشید کررہے ہیں۔

کمیٹی کے ایک رکن اور مسلم لیگ نواز کے مرکزی سیکریٹری اطلاعات احسن اقبال کا کہنا ہے کہ ان کے مطالبات میں سپریم کورٹ کے معزول چیف جسٹس افتخار محمد چودھری سمیت اعلیٰ عدالتوں کے تمام برطرف ججوں کی بحالی سرفہرست ہے۔

انہوں نے کہا کہ پیپلز پارٹی کا ججوں کی بحالی کے بارے میں موقف مختلف ہے اس لیے ان کی کوشش ہوگی کہ ان کی مشاورت سے متفقہ مطالبات کی فہرست تیار کی جائے۔

سابق وزیراعظم میاں نواز شریف، قاضی حسین احمد، محمود خان اچکزئی، عمران خان سمیت حزب مخالف کے بیشتر رہنماؤں کا کہنا ہے کہ انتخابات میں حکومت دھاندلی کر رہی ہے اور ایسے میں ان کا بائیکاٹ کیا جائے۔

جبکہ اتحاد برائِے بحالی جمہوریت کی سربراہ اور سابق وزیراعظم بینظیر بھٹو اور ان کے ہم خیال کہتے ہیں کہ حکومت دھاندلی تو کر رہی ہے لیکن اس دھاندلی کو منظر عام پر لانے کے لیے انتخابات میں حصہ لینا چاہیے۔ تاہم ان کا کہنا ہے کہ اگر حزب مخالف کی تمام جماعتیں ملک میں جمہوریت اور آئین کی بحالی کے ایک نکتے پر متفق ہوں تو وہ بھی بائیکاٹ کرسکتے ہیں۔

لیکن جمیعت علماء اسلام (ف) کے مولانا فضل الرحمٰن واحد حزب مخالف کے رہنما ہیں جو کہتے ہیں کہ انتخابات کا بائیکاٹ غلط فیصلہ ہوگا اور اس سے جنرل پرویز مشرف مضبوط ہوں گے۔

حزب مخالف بیشتر جماعتیں ججوں کی بحالی کا مطالبہ کر رہی ہیں جبکہ بینظیر بھٹو اور مولانا فضل الرحمٰن عدلیہ کی آزادی کی بات کر رہے ہیں۔

حزب مخالف کی تمام جماعتیں غیر جانبدار الیکشن کمیشن کی از سر نو تشکیل، انتخابی قوانین میں تبدیلی، ایمرجنسی کا خاتمہ، آئین کی بحالی، پرویز مشرف کے صدارتی انتخابات کو غیر آئینی قرار دینے، نگران حکومتوں کو مسترد کرنے سمیت اکثر معاملات پر کم و بیش ایک جیسا ہی موقف ہے۔

بشکریہ بی بی سی