پاکستان کے مشہور و معروف نیوکلئر سائنٹسٹ سلطان بشیر محمود صاحب کسی تعارف کے محتاج نہیں ہے ان کی خدمات کے اعتراف میں انہیں ستارہ امتیاز سے نوازا گیا ہے۔ انھوں نے ایک اصلاحی تحریک شروع کرنے کا بیڑا اٹھایا ہے۔ اس تحریک کا نام ، تحریک نور رکھا گیا ہے۔ اس کا تعارف، اور اغراض و مقاضد یہاں پیش تبصرے اور تجاویز کے لئے پیش کئے جا رہے ہیں تا کہ اس تحریک میں اور بہتری پیدا کی جا سکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
بسم اللّٰہ الرحمن الراحیم
مکرمی
السلام علیکم !
شروع دن سے پاکستان جن حالات سے گزر رہا ہے وہ ہر محبِ وطن پاکستانی کے لئے تشویش ناک ہیں۔ بہت سے سوالات ذہن میں اُٹھتے ہیں مثلاً ہمارا یہ مُلک جو اسلام کے نام پر بنایا گیاتھا وہ مصائب اوپر مصائب کی لپیٹ میں کیوں رہا ہے ؟کیا یہ آزمائشوں کے سلسلے ہیں یا ہمارے گناہوں پر اللہ تعالیٰ کی طرف سے عذاب ہیں ؟ ہمارا مستقبل کیا ہوگا ؟ کیا اِن سے نکلنے کا بھی کوئی راستہ ہے ؟ کیا ہم اُمید رکھیں کہ پاکستان دُنیا کے نقشے پر کبھی ایک مُبارک ، معزز اور خیر کی قوت بن کر اُبھرے گا ؟

1971 میں مُلک کا دو ٹکڑے ہوجانا ، اُس کے بعد روزِ افزوں بَد امنی ، بڑھتی ہوئی غُربت ، سیاسی ، معاشی اور معاشرتی ابتری ، 2005کا قیامت خیز زلزلہ اور حالیہ سیلاب ، اس کے بعد بھی اگر ہم اِن سوالات کا صحیح جواب نہیں ڈھونڈپاتے اور عملی طور پر کچھ نہیں کرتے ، تو تاریخ شاہد ہے کہ ایسی قوموں کے لئے جینے کا حق ختم ہوجاتا ہے ۔ آپ سے درخواست ہے کہ اپنی مومنانہ و حکیمانہ بصارت کی مدد سے اِن سوالات کا حل تلاش کریں تاکہ مجموعی فراست سے ہم کسی نتیجہ پر پہنچ سکیں ۔

ایک عرصہ پر محیط سوچ وبچار ، تاریخی جائزوں اور قرآن فہمی کے بعد میں خود اس نتیجہ پر پہنچا ہوں کہ جن مصائب سے ہم گُزر رہے ہیں یہ مادی وجوہ کی بنا پر نہیں بلکہ ہماری اخلاقی بُرائیوں اور باہمی ظُلم پر قدرت کا ردِّ عمل ہیں ۔ ہماری سب سے بڑی غلطی اپنے وطن کے نعرہ تخلیق ’’پاکستان کا مطلب کیا۔۔۔۔۔ لَا اِلہ اِلاَّ اللّٰہ‘‘سے غداری ہے ۔ علامہ اقبال ؒ اورقائداعظم ؒ کے مطابق جس مُلک نے ایک مثالی ریاست بن کر دُنیا کو اسلام کے نُور سے روشن کرنا تھا وہ اخلاقی گراوٹ اور بے دینی میں سیکولر ملکوں سے بھی آگے ہے۔ چنانچہ ہمارے کرتوت اسباب کی دُنیا میں مختلف عذابوں کی شکل میں ظاہر ہورہے ہیں شاید کہ لوگ عبرت پکڑیں اور اپنی اصلاح کرلیں اور بچ جائیں ۔ اس ضمن میں قرآنِ کریم پُرانی قوموں کے عروج وزوال کے حوالہ سے بتاتا ہے کہ جو قوم ایسی عبرت ناک آزمائشوں سے سبق نہیں سیکھتی اور بُرائیوں سے باز نہیں آتی بالآخراس کو جڑ سے کاٹ کر رکھ دیا جاتا ہے ۔

ہوسکتا ہے کہ میرے اس تجزیہ پر کچھ لوگ کہیں کہ یہ کیسا سائنس دان ہے جو ملّاؤں کی باتیں کررہا ہے لیکن مجھے میری سائنس اور قرآن فہمی نے اس نتیجہ پر پہنچنے کے لئے مجبور کردیا ہے ۔ وسائل کے لحاظ سے پاکستان میں کوئی کمی نہیں لیکن روحانی طور پریہ دیوالیہ ہوچُکا ہے ۔ اگر کہیں دین ہے بھی تو وہ رواجی ہے ۔ اصل رُوح مرچُکی ہے ۔ ایسے میں ہمارا علاج IMFیا ورلڈ بینک اور غیروں کی مالی امداد میں نہیں بلکہ اللہ تعالیٰ کی خوشنودی حاصل کرنے میں ہے جس کے لئے وطنِ عزیز میں اسلامی روحانی قدروں کا احیاء اور اِن شہداء سے وفاداری ہے جنہوں نے اسلام کے نام پر اپنا خون پاکستان کی بنیادوں میں ڈالا تھا ۔ یعنی اپنے پاکستان کو واقعی پاکستان ( پاک جگہ ) بنادیں۔

اللہ تعالیٰ قرآن کریم میں فرماتے ہیں: ’’ تم میری مدد کر و میں تمہاری مدد کرونگا ‘‘ ۔ اللہ تعالیٰ جس کام میں مدد کے لئے فرماتے ہیںیہ وہی کام ہے جس کے لئے اس نے اپنے ایک لاکھ چوبیس ہزار پیغمبر بھیجے اور خاتم النبیین سرورِ کائنات صلی اللہ علیہ وآلہ وسلم پر اس ہدایت کی تکمیل فرمائی ۔ یہ کام نہ کرنے کی وجہ سے ہم اللہ تعالیٰ کی مدد سے محروم ہوچُکے ہیں اور اسباب کے سامنے لاچار ہیں ۔ اگر ہم خالص نیتوں کے ساتھ اپنی اس ذمہ داری کو پورا کرنے کی طرف لگ جائیں تو ربِ کائنات کی مدد ہمارے شاملِ حال ہوگی اورمصائب سے بھی جان چھوٹ جائے گی ۔

اللہ تعالیٰ کے اس وعدہ کے پیشِ نظر زندگی کی آخری سیڑھی پر بیٹھا میں آپ سے تعاون کی اُمید پر تحریکِ نُور کا آغاز کررہا ہوں ۔ جس کے سامنے مندرجہ ذیل مشن ہے ۔

’’ ظُلمت کی جن راہوں پرانسانیت آج ٹھوکریں کھارہی ہے اُن راہوں کو اسلام کی روشنی سے منور کردیا جائے ۔ تاکہ انسان جہنم میں گرنے سے بچ جائے اور اس صدی کے آخر تک، زیادہ نہیں تو کم ازکم دُنیا کا ہر دوسرا آدمی اس نعمت کو پالے ‘‘۔

اس کا م کاآغاز آپ مؤثر اسلامی کتابوں اور لٹریچر کو خرید کر دوسروں کو گفٹ کرنے سے کرسکتے ہیں ۔ تبلیغی نقطہ نظر سے اسلامی کتابوں کی طباعت سپانسر کرنا ، درس وتدریس کے مراکز قائم کرنا ، بیرونی ممالک میں جو لوگ تبلیغ کا کام کررہے ہیں اُنہیں تبلیغی لٹریچر مہیا کرنا، اس ضمن میں کچھ دوسرے ضروری کام ہیں۔ اِن کے علاوہ ہر وہ طریقہ ہماری تدابیر (Strategic Planning)کا حصہ ہوگا جس سے اللہ تعالیٰ کا نام بلند تر ہو اور اس کا پیغام آگے بڑھایا جاسکے ۔ جب آپ داعی الی اللہ بن جائیں گے تو ہمارا مہربان مالک خودہی اپنی راہیں کھولتا جائے گا ۔

خاتم النبیین صلی اللہ علیہ وآلہ وسلم نے صلح حدیبیہ کے بعد جب ذرا امن ہوا تو بذاتِ خود اس دور کے رؤساء ، امراء اور سلاطین کو تقریباً 156دعوتی خطوط بھیجے ( حوالہ ڈاکٹر حمید اللہ ، خطباتِ بہاولپور ) افسوس کہ اسلام کی دعوت کا یہ طریقہ بعد کے ادوار میں مسلمانوں میں کمزور ہوتا گیا جب کہ عیسائی مشنیریوں نے اس پر عمل کرکے بھرپور فائدہ اُٹھایا اور آج بھی اربوں ڈالر خرچ کرکے کل دُنیا میں عیسائیت کی تبلیغ میں مصروف ہیں بلکہ یورپی اور امریکی ممالک ، سیکولر دعوے دار ہونے کے باوجود اس کام میں اِن کی مالی اور سیاسی اعانت بھی کرتے ہیں ۔ اِن کی کوششوں کا خاطر خواہ اثر بھی ہورہا ہے ۔ خصوصی طور پر جاپان ، کوریا ، روس ، چین ، فلپائن ، تھائی لینڈ وغیرہ اور براعظم افریقہ کی زیادہ تر آبادی عیسائی ہوچُکی ہے ۔ مسلمان ممالک میں بھی وہ اپنے فلاحی اداروں اور لٹریچر کی تقسیم کے ذریعہ آہستہ آہستہ لوگوں کو عیسائی بنانے میں کامیاب ہورہے ہیں ۔ افسوس ! کہ مسلمان حکومتیں بھی اسلام کی تبلیغ کے کام سے بیگانہ ہیں اور ہمارے اہلِ ثروت لوگ بھی اپنے مالی ذرائع کو اس طرف شاذونادر ہی انوسٹ کرتے ہیں ۔
اب جب کہ خود اسلام کا عملی نمونہ کسی جگہ نہیں تو اشد ضرورت ہے کہ تحریری ذرائع کی مدد سے اصل اسلام سے دُنیا کو متعارف کروایا جائے ۔ اس کام کی ضرورت غیر مسلم کو ہی نہیں بلکہ ہمارے اپنے نوجوانوں کو اِن سے بھی زیادہ ہے ۔ تحریکِ نُور اس کمی کو پورا کرنے کی طرف ایک بھرپور جدوجہد ہے ۔ جس میں شامل ہوکر آپ انسانیت کی بہت بڑی خدمت کرسکتے ہیں ۔اللہ تعالیٰ کا فرمان ہے کہ ’ ’ فَاِ نّما عَلَیْکِ الْبَلَغَ وَعَلَیْنَا الْحِسَابَ ‘‘ پس تحقیق تم پر لازم ہے ( میرا پیغام )پہنچادینا اور ہمارے اوپر حساب لینا ہے ‘‘ ۔ ہماری یہ انتہائی خوش قسمتی ہوگی کہ اس عمل میں حصہ دار کے طور پر ہمارا بھی نام لکھا جائے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تحریکِ نُور
کچھ ضروری بنیادی کام

تحریک نُور ایک رضاکارانہ کام ہے ۔ کسی کے لئے مجبوری نہیں ۔ آپ نے اپنے رب تعالیٰ کی رضا کی خاطر مندرجہ بالا مقاصد کی تکمیل کے لئے صرف ارادہ بنانا ہے باقی کام اس کے ہاتھ میں ہے ۔ہم نے مسلسل دُعائیں کرنی ہیں کہ اللہ تعالیٰ ہمیں اپنے کام کے لئے استعمال کرلے اور ہماری نیتوں کو قبول فرمائے ۔ وہی کام جس کے لئے اس نے اپنے ایک لاکھ چوبیس ہزار انبیاء بھیجے ۔ اِس ضمن میں اپنی اصلاح کے ساتھ ساتھ حسبِ ذیل بنیادی کام ہیں جن کے کرنے سے اسلام کی گاڑی چلنے لگے گی ۔

تعلیمی کام :۔

(1) اس نُوری کام کا آغاز اسلام کے متعلق محققانہ منتخب کتابوں کو دوسروں کو گفٹ کرنے سے شروع کیا جاسکتا ہے ۔ کسی کو دینے کے لئے کتاب سے بہتر کوئی گفٹ نہیں ۔ آپ کے تعلق اور محبت کا پائیدار اظہار بھی ہے اور مستقل دعوتی ذریعہ بھی ہے ۔( تحریکِ نُور کی کتابوں کی لسٹ حاضر ہے۔ دعوتی تبلیغی مقاصد کے لئے آپ کو یہ کتابیں لاگت قیمت پر مہیا کردیا جائیں گی)

(2) کتابوں اور مضامین کے علاوہ دعوت کا کام ای میل اور انٹرنیٹ کے ذریعہ بھی رہا ہے ۔ اس کے لئے سافٹ کاپیاں درکار ہو ں تو لاگت قیمت پر بھیج دی جائیں گی ۔اس لئے ایک مخصوص شعبہ قائم کرنا ضروری ہے ۔ آپ اس کو سپانسر بھی کرسکتے ہیں ۔

(3) اگر اللہ تعالیٰ استطاعت فرمائے تو کسی منتخب کتاب کی ہزاروں کی تعداد میں پبلیشنگ کو سپانسر کریں ۔یہ آپ کی طرف سے صدقہ جاریہ ہوگا ۔ والدین کے نام پر بھی یہ صدقہ جاریہ کیا جاسکتا ہے ۔ کتابوں کی تقسیم کا کام آپ خود بھی کرسکتے ہیں اور آپ کی جگہ تحریک نُور اسلام آباد ہیڈ کواٹر سے بھی ہوسکتا ہے ۔

(4) اگر آپ کاروبار کے متعارف کرانے کے لئے ڈائریاں ، کیلنڈر یا دوسرے قیمتی گفٹ دیتے ہیں تو اِن کی بجائے کسی اچھی اسلامی کتاب کا انتخاب کیا جائے اور اپنی کمپنی کے لوگو کے ساتھ چھپوا کرمتعلقہ لوگوں کو گفٹ کی جائیں ۔ آپ خود دیکھیں گے کہ کاروبار کی ترقی کے لئے انشاء اللہ یہ کام بہت بابرکت ثابت ہوگا ۔

(5) اگر آپ سکالر ہیں تو تحریک نُور کے ساتھ مل کر علمی خدمات کا کام کریں تاکہ ٹھوس بنیادوں پر اسلام کی حقانیت کو ثابت کیا جائے ۔مشترکہ تحقیقی پراجیکٹس شروع کریں ۔ تحقیق کے کاموں کی حوصلہ افزائی کے لئے مقامی اور مُلکی سطح پر سمینار ، ورکشاپ اور انعامات کا انتظام کیا جائے ۔

(6) اگر آپ کسی غیر مُلکی زبان میں دسترس رکھتے ہیں تو ترجمہ کا کام کریں تاکہ اللہ تعالیٰ کے نُور کو دُنیا بھر کی زبانوں میں منتقل کردیا جائے ۔ بہت ضروری ہے کہ دُنیا کی بڑی بڑی زبانوں میں اسلام کے متعلق بہترین کتابوں کے تراجم کئے جائیں تاکہ ہر آدمی تک حق کا پیغام واضح کردیا جائے ۔آپ ترجمہ کے کام کو سپانسر کرسکتے ہیں ۔

بنیادی خلافت کے کام:۔

(7) مساجد کو محلہ کا مرکز بنانے کے لئے تحریکِ نُور کے ممبران مقامی انتظامیہ اور امام صاحب کا ساتھ دیں۔ہر طرح کے فتنے سے بچتے ہوئے محبت اور پیار سے مساجد کے انتظامات میں حصہ لیں اورنظامِ صلوٰۃ و زکوۃٰ قائم کرنے اور اسلامی معاشرہ میں مسجد کے مرکزی کردار کو اُجاگر کرنے کی کوشش کی جائے ۔ آئمہ کرام کو وہ عزت دی جائے جس کے وہ حق دار ہیں ۔

( نمازیوں میں باہمی رابطے استوار کرنے کی طرف توجہ فرمائیں ۔ ایک دوسرے کے دُکھ سُکھ میں شریک ہوں اگر کوئی نمازی کچھ دنوں سے مسجد نہیں آتا تو اُس کے گھر سے اُسکی خیریت کا پتہ کیا جائے ۔مسجد مسلمانوں کا مرکزی گھر ہے ۔ اس گھر کے ماحول کو باہمی شناسائی ، پیار، محبت سے بہتر سے بہتر کرنے کی کوشش جاری رہنا چاہیے ۔
(9) مسجدوں میں بغیر تالہ لائبریریاں قائم کریں تاکہ پڑھنے کا رجحان ترقی پائے ۔مقامی تحریکِ نُور کے ارکان لوگوں میں اسلامی کتابیں پڑھنے کا شوق پیدا کرنے کے لئے کتابوں کی نمائش لگائیں اور اہلِ توفیق کا تعاون حاصل کریں ۔
(10) مسجدوں کے ساتھ ملحقہ ڈسپنسریاں بنائیں تاکہ غریب غُرباء کا مفت علاج ہوسکے اور مسجد کے لوگوں کو بھی ہنگامی طبی امداد مل سکے ۔

(11) مسجد کی انتظامیہ اور امام صاحب کے تعاون سے پرائمری سکولنگ کا مسجد میں انتظام کرناچاہیے تاکہ بچے اسلامی ماحول میں ابتدائی تعلیم پالیں ۔مقامی سکول کے نصاب کو بھی پڑھایا جائے ۔ سٹینڈرڈ اعلیٰ ہو تاکہ امیر لوگ اپنے بچوں کو مسجد پرائمری سکول میں بھیجنے پر تیار ہوں ۔

(12) مسجد انتظامیہ کے ساتھ مل کر زکوۃٰاور صدقات کا نظام قائم کریں ۔غُربت مکاؤ (Poverty Elimination)کے لئے روزگار کے مواقع پیدا کئے جائیں جہاں سے ضرورت مندوں کی مالی امداد ہوسکے۔

تنظیمی کام :۔

(13) اپنے علاقے میں تحریکِ نُور کا دفتر قائم کرکے مندرجہ بالا کاموں کے لئے ساتھیوں کو تیار کیا جائے ۔

(14) زیادہ سے زیادہ لوگوں کو تحریک کے کام سے آگاہ کیا جائے اور ممبر بنایا جائے ۔فعال تنظیمی ڈھانچہ قائم کیا جائے ۔

(15) درس وتدریس سے لوگوں میں اسلام کے متعلق علمی شوق پیدا کیا جائے ۔


(16) مُلکی سطح پر علمی ورکشاپیں ، سمینار ، علمی انعامی مقابلے منعقد کئے جائیں ۔بین الاقوامی سطح پر علمی طریقوں سے اسلام کو متعارف کروایا جائے ۔

غرض بہت سے طریقے ہیں جو استعمال کرتے ہوئے آپ اللہ تعالیٰ کے نُور سے دُنیا کو منور کرسکتے ہیں ۔ جب خالص نیت اور پختہ ارادہ سے آپ کام شروع کردیں گے تو اللہ تعالیٰ خود آپ کوسمجھائے گا کہ کیا کرسکتے ہو اور کس طرح کیا جائے ۔جیسے پہلے بھی کہا گیا ہے کہ تحریک نُور کے کاموں کا بدلہ اللہ تعالیٰ کا یہ وعدہ شریف ہے فَاذْکُرُوْنِیْ اَذْکُرْکُمْ’’تم میرا ذکر کر و ، میں تمہارا ذکر کروں گا ۔ تم میری مدد کرو ، میں تمہاری مدد کروں گا ‘‘ ۔سبحان اللہ ! کہاں ہم اور کہاں مالک کون ومکاں کی شان ۔ اگر اس کی مدد شاملِ حال ہو اور وہاں آپ کا ذکر بھی ہو تو اور کیا چاہیے ۔ اگر ایک آدمی بھی آپ کی کوششوں سے راہ ہدایت پاگیا تو آپ کا جنت میں بینک اکاؤنٹ کُھل گیا ۔ ساری دُنیا کے پہاڑ اگر سونا بن کر آپ کے پاس آجائیں یہ اس سے بھی بہتر سودا ہے ۔

سب سے بڑھ کر فائدہ ذاتی ہے ۔ موت کی وادیوں میں جب ہر طرف اندھیرا ہوگا ، عالمِ برزخ اور حشر کے میدان میں تاریکی ہوگی تو دُنیا میں کفر اور جہالت کے اندھیروں کو دُور کرنے کی کوششوں کے نتیجہ میں اللہ تعالیٰ آپ کے دائیں، بائیں آگے ، پیچھے جنت کو جانے والی شاہراہ روشن کردے گا ۔سبحان اللہ ! ایسا کیوں نہ ہو ؟ جب کہ خود اس کا فرمان ہے ۔ھَلْ جَزَاءُ الْاِ حْسَانِ اِلَّاالّاِحْسَان (سورۃ الرحمٰن، آیت نمبر 60) ’’احسان کا بدلہ احسان کے علاوہ اور کیا ہوسکتا ہے‘‘ ؟

مندرجہ بالا مقاصد کے حوالہ سے تمام مسلمان بھائی ، بہنوں کو تحریکِ نُور میں شمولیت کی دعوت ہے ۔ صرف خالص نیت ، پختہ ارادہ ، اللہ تعالیٰ اور خیر ابشر خاتم النبیین صلی اللہ علیہ وآلہ وسلم کی رضا کے لئے زبردست خواہش ہونا چاہیے۔ توفیق صرف اللہ تعالیٰ کی طرف سے ہے ۔اس کا حکم ہے ’’فَاسْتَبِقُو الْخَیْرَات ‘‘ ’’نیکی میں سبقت لینے کی کوشش کرو ‘‘۔ اس لئے تحریک کا ممبر بننے میں دیر نہ کریں ۔
ممبر شب فارم۔ (ذاتی کوائف سے متعلقہ شقیں حذف کر دی گئی ہیں۔ )

تحریک نُور کے مقاصد اور طریقہ کار سے متفق ہو ں ۔ اس میں رضاکارانہ طور پر شامل ہوکر دینِ اسلام کے نُور کو دُنیا بھر میں پھیلانے کا ارادہ رکھتا ہوں ۔ میں حسبِ ذیل طریقوں سے اپنی اس ذمہ داری کو پورا کرنا چاہتا ہوں ۔
(1) اپنی ذاتی اصلاح اور علمی ترقی کے لئے قرآنِ کریم ، احادیثِ پاک ، سیرتِ طیبہ اور اسلام کے متعلقہ اپنی واقفیت بڑھانے کے لئے روزانہ کچھ نہ کچھ وقت نکالنا اور سنجیدگی سے علم حاصل کرنے کی کوشش کرنا ۔
(2) تحریک نُور کی منتخب شُدہ کتابیں تبلیغ کے لئے رعایتی قیمت پر خرید کر خود پڑھنا اور دوسرے لوگوں میں گفٹ کرنا ، فری تقسیم کے لئے طباعت کو سپانسر کرنا اور تحریکِ نُور کی حسبِ توفیق باقاعدگی سے مالی امداد کرتے رہنا ۔
(3) اسلام کے حوالہ سے جدید دور کے تقاضوں اور مسائل کے حل کے لئے خصوصی موضوع پر تحقیق وتصنیف کا کام کرنا ، سکالرز کے باہمی رابطے قائم کرنا اور مل جُل کر تحقیق کے کام کو آگے بڑھانا ۔
(4) مقامی اور عالمی سطح پر ای میل اور انٹرنیٹ کے ذریعے تبلیغ اسلام کا کام کرنا ۔
(5) فری تقسیم کے لئے منتخب شدہ کتابوں اور مضامین کو پبلیشنگ کرنے کے لئے مالی تعاون کرنا ۔
(6) اللہ تعالیٰ کے دین کو دُنیا بھر میں پھیلانے کے کام کی تقویت کے لئے ماہانہ مالی تعاون پیش کرنا ۔
(7) اپنے علاقہ میں تحریک نُور کا دفتر کھول کر تحریک کے مقاصد کی تکمیل کے لئے کام کرنا ۔درس وتدریس ، سمینار ، ورکشاپ اور علمی مجالس شروع کرنا ۔ نشاط ثانیہ کے لئے مساجدکو معاشرہ میں مرکزی کردار ادا کرنے کے لئے تیار کرنا ۔
( مساجد کو محلہ کا معاشرتی مرکز بنانے کے لئے انتظامیہ اور امام صاحب کے ساتھ مل کر کام کرنا ۔
(9) نمازیوں میں باہمی رابطے استوار کرنے کی طرف توجہ کرنا ۔ ایک دوسرے کا تعارف حاصل کریں اور خوشی غمی میں بھی شامل ہوں ۔
(10) مسجدوں میں بغیر تالہ لائبریریاں قائم کرنا تاکہ پڑھنے کا رجحان ترقی پائے ۔
(11) مسجدوں کے ساتھ ملحقہ ڈسپنسریاں بنانا تاکہ غریب غُرباء کا مفت علاج ہوسکے اور مسجد کے فلاحی پہلو اُجاگر ہوں ۔
(12) مسجد کی انتظامیہ اور امام صاحب کے تعاون سے پرائمری سکولنگ کا مسجد میں انتظام کرنا تاکہ بچے اسلامی ماحول میں ابتدائی تعلیم پالیں ۔
(13) مسجد انتظامیہ کے ساتھ مل کر زکوۃ اور صدقات کا نظام قائم کرنا جہاں سے ضرورت مندوں کی مالی امداد ہوسکے ۔
(14) مساجد میں نکاح کی رسم کی حوصلہ افزائی کرنا ۔ اس طرح کے اور کئی معاشرتی کام جو ہوسکتے ہیں اور بغیر جھگڑے کے کئے جاسکتے ہیں ۔اِن کے لئے کوشش کرنا ۔
(15) نبی پاک صلی اللہ علیہ وآلہ وسلم کے زمانہ کی مسجدِ نبوی کے نمونہ پر کوشش کرنا کہ خواتین باپردہ مسجدوں میں نماز کے لئے آئیں ، خصوصاً جمعہ اور عیدین پر ، عورتوں کی مسجدوں میں آکر نماز پڑھنے کی حوصلہ افزائی کی جائے ۔
نام۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔
دستخط۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔
تاریخ۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔


امید ہے۔۔۔ ساتھی ڈاکٹر صاحب کی اس محنت پر توجہ دیں گے اور اس تحریک کو مزید بہتر بنانے کے حوالے سے مذکورہ بالا امور اور طریقہ کار کے حوالے سے اپنی رائے ضرور دیں گے۔۔۔ شکریہ۔

__________________
بندے اور اللہ تعالی سے محبت کا فرق یہ ہے کہ۔ بندے کی محبت ہمیشہ انسان کی بڑی کمزوری بن جاتی ہے۔ اور اللہ تعالی کی محبت ہمیشہ انسان کی سب سے بڑی طاقت بن جاتی ہے۔