نکاح...انداز بیاں …سردار احمد قادری

عام طور پر ”نکاح“ کو شادی کے نام سے یاد کیا جاتا ہے۔ شادی فارسی زبان کا لفظ ہے جس کا مطلب ہے ”خوشی“، ”نکاح“ ایک معاہدہ ہوتا ہے جس کے بندھن میں بندھ جانے کی وجہ سے ایک جوڑا خوشی خوشی اپنی نئی زندگی کا آغاز کرتا ہے اس کی وجہ سے اس کو شادی کی تقریب کہتے ہیں۔ اسلام میں نکاح کا تصور اتنا آسان ہے کہ اس میں جوڑے کی رضا مندی بنیادی شرط ہے جب وہ بالغ ہوں تو والدین کو ان کے فیصلے سے اختلاف نہیں کرنا چاہئے، دعا دینی چاہئے۔ اگر انہیں رشتہ پسند نہ ہو تو انہیں قائل کرنے کی کوشش کریں۔ اسلام کے اولین دور میں شادیاں اتنی آسانی اور سادگی سے ہوتی تھیں کہ صحابہ کرام جو اپنے آقاء مولانا حضور سرور کائنات ﷺ سے اپنی جان سے بڑھ کر محبت کرتے تھے بعض دفعہ انہیں بھی مطلع نہیں کرتے تھے اور نکاح سادگی سے کرتے تھے۔ ہمارے ہاں شادی کو اتنا مشکل اتنا مہنگا کام بنا دیا گیا ہے کہ لڑکے اور لڑکی والے دونوں خاندان اس صورت حال سے پریشان رہتے ہیں، لیکن معاشرے کی غلط رسومات اور فضول اور بے جا رسموں پر اٹھنے والے اخراجات کے خلاف کچھ نہیں کہہ سکتے صرف یہ سوچ کر برادری اور لوگ کیا کہیں گے حالانکہ شادی کی فضول اور خود ساختہ رسمیں اکثر ہندوانہ رسمیں ہیں جو صدیوں اکٹھے رہنے کی وجہ سے مسلمان معاشرہ میں آگئی ہیں۔ ان کا اسلام سے کوئی تعلق نہیں سب ہندوانہ رسمیں ہیں۔ اپنی حیثیت سے بڑھ کر شادی کے اخراجات اور کھانے و آرائش کے لوازمات اس قدر زیاں ہوتے ہیں کہ دونوں طرف کے خاندان اپنے بچوں کی شادی کا سوچ کر پریشان ہو جاتے ہیں۔ شاید یورپ اور بالخصوص برطانیہ میں مسلمان معاشرہ اس حقیقت کو جلد جان لے گا کہ سادگی میں ہی عافیت ہے۔ جس طرح ہمارے نوجوان بچے اور بچیاں شادی کے بغیر زندگی گزارنے کو ”ڈیٹنگ“ (Dating) کا نام دے رہے ہیں اور غیر مسلموں کی طرح اکٹھے رہنے کا رجحان بڑھتا جا رہا ہے خطرہ ہے کہ دس بیس سالوں میں نکاح کا تصور آہستہ آہستہ اس طرح کم ہو جائے جس طرح برطانیہ کی اکثریت میں ہوچکا ہے۔ آج سے پچاس سال پہلے تقریباً پچاس ساٹھ فیصد انگریز چرچ میں جا کر شادی کرتے تھے اب یہ شرح گھٹ کر بہت کم ہوگئی ہے اور آہستہ آہستہ شادی کا معاہدہ مذہبی عبادت گاہ (چرچ) میں کرنے کی رسم ختم ہوتی جا رہی ہے اکثر جوڑے کئی کئی سال اکٹھے رہنے کے بعد بالآخر اپنے بچوں کے اصرار پر رجسٹریشن آفس جا کر اپنے تعلق کو قانونی حیثیت دیتے ہیں اور رجسٹریشن (Resistration) کے ذریعے میاں بیوی بن جاتے ہیں۔ جمعہ کو انگلستان کے ولی عہد کے بیٹے کی شادی ہو رہی ہے۔ اس کے لئے انتظامات چھ ماہ قبل شروع ہوگئے تھے۔ انگلستان کے لوگ اس کو دیکھنے کے لئے سڑکوں پر اور گھروں میں ٹی وی کی سامنے بیٹھ کر نظارہ کریں گے، اگر آپ ان سے پوچھیں کہ کیا آپ بھی اس طرح چرچ میں جا کر شادی کرنے کا
نکاح...انداز بیاں …سردار احمد قادری

سوچتے ہیں تو اکثر کا جواب یہ ہوگا کہ چرچ میں شادی کرنا اتنا مہنگا ہے کہ ہم اس کو ”افورڈ“ نہیں کرسکتے۔ میرے ایک جاننے والے انگریز نے اپنی بیٹی کی شادی کے لئے چرچ ایک سال پہلے بک کرایا ہے اور وہ میاں بیوی مجھے بتا رہے تھے کہ اس شادی پر پارٹی وغیرہ اور لباس و تحائف پر دس ہزار پونڈ سے زیادہ خرچ آئے گا۔ ان کی بیٹی تو شاید یہ شادی سادگی سے کرنا چاہتی تھی لیکن والدین چونکہ پکے عیسائی ہیں اس لئے چرچ میں شادی کرنے کے حق میں ہیں ہم بھی اخراجات بڑھا کر اپنے بچوں کو ”نکاح“ سے دور تو نہیں کر رہے ؟ صرف سادگی کو رائج کرکے ہی ہم ”نکاح“ کومقتدر شادی میں بدل سکتے ہیں۔

__________________
لا فتی الا علیّ لا سیف الاّ ذوالفقار