ابوسعد

محمد زکی کیفیؔ مرحوم ومغفور مفتی اعظم پاکستان مولانا مفتی محمد شفیع صاحب مرحوم کے بڑے صاحب زادے تھے دارالعلوم دیوبند کے فاضل تھے پاکستان ہجرت کرنے کے بعد لاہور میں مقیم رہے،ادارہ اسلامیات کے نام سے لاہور میں ایک کتب خانہ بھی قائم کیا جو اس وقت ان کے صاحب زادے چلارہے ہیں اسی ادارہ نے "کیفیات" کے نام سے ان کا مجموعہ کلام شائع کیا ہے،جس کی ابتدا میں جناب احسان دانش صاحب مرحوم،مولانا ماہرالقادری مرحوم،مولانا مفتی محمد تقی عثمانی صاحب مدظلہ،ڈاکٹر سید محمد عبداللہ صاحب اور جناب احمد ندیم قاسمی صاحب کے تاثرات بھی شامل ہیں لیکن کیا ہی اچھا ہوتا کہ ان کا تفصیلی تعارف بھی اس کی ابتدا میں شامل کرلیا جاتا۔ان کی یہ کتاب نعتوں،غزلوں اور نظموں پر مشتمل ہے اور بہت ہی قابل قدر اشعار کا گنجینہ ہے اگر پاک،نیٹ کے منتظمین ان کے لئے ایک الگ دھاگہ قائم فرمادیں تو بندہ ان کے اشعار کا کچھ انتخاب پیش کردیا کرے گا۔فی الحال بطور "مشتے نمونہ از خروارے"چند اشعار پیش خدمت ہیں۔
نعتیہ اشعار
آپ ہی کے جلؤوں سے، ہر طرف اُجالا ہے
ظلمتوں سے انساں کو،آپ نے نکالا ہے
ربط جسم و جاں میں‌ہے آپ ہی کے صدقے میں
اسمِ پاک سے چلتی ہر نفَس کی مالا ہے

حسن بے مثال ان کا،شان لازوال اُن کی
اُن سے برگزیدہ بس، ذاتِ حق تعالیٰ ہے
اُس کو دین ودنیا کی ہر خوشی میسر ہے
جس نے عشقِ احمدکو اپنے دل میں پالاہے

غزل کے منتخب اشعار
بے پردہ انہیں دیکھ سکے کس میں یہ دم ہے
اے اہلِ نظر ان کا یہ چھپنا بھی کرم ہے
اب ہوش ہے باقی نہ مسرت ہے نہ غم ہے
اے جانِ وفا تیری توجہ بھی ستم ہے
اے دوست مجھےتیری محبت کی قسم ہے
دنیا میں مسرت کا ترے غم سے بھرم ہے
تُومَہرِ جہان تاب ہے میں شبنمِ گریاں
ملنابھی ستم تیرا نہ ملنا بھی ستم ہے




تیری گلی سے جب ہم نکلے،ہم کو یہی محسوس ہوا
جیسے تیری آنکھ کا کاجل ،سارے جہاں میں پھیل گیا
کیفیؔ کا اب حال عجب ہے،عشق کہو یا پاگل پن
روتے روتے ہنس پڑتا ہے ،ہنستے ہنستے رونے لگا

عبیداللہ عبید

آپ مسلسل پیش کیا کریں پھر انتظامیہ پر دباؤ ڈالیں گے کہ وہ ان کے کلام کے لیے الگ سے کوئی دھاگہ بنالے ۔

دراصل انتظامیہ اس سلسلے میں اس لیے متحرک نہیں ہوتی کہ بعض سلسلے شروع ہو کر ادھورے رہ جاتے ہیں ۔آپ کچھ قسطیں پوسٹ کرلیں وہ بھی ہوجائے گا ۔

ابوسعد

ٹھیک ہے ان شاء اللہ
لیجئے ایک نعت سے ابتدا کرتے ہیں

آیہ رحمت
تم فخر رسولاں،شہ کون ومکاں ہو
تم حاصلِ کل،باعثِ تخلیقِ جہاں ہو
تم بحرِ کرم ،ابرِسخا،منبعِ احساں
تم مظہرِاوصافِ خدائے دو جہاں ہو
تم سارے زمانے کے لئے آیہ رحمت
تم درسِ اخوت ہو،محبت کا بیاں ہو
تم خستہ دلوں کے لئے سرمایہ تسکیں
تم مرہمِ زخمِ دل آشفتہ سراں ہو
ظلمت کدۂ دہر میں ہے تم سے اجالا
پردے میں مہ و مہر کے تم نور فشاں ہو
وہ سنگِ گراں راہ میں ہوتا ہے جو حائل
چھولے جو قدم آپ کا منزل کا نشاں ہو
کب آئے گی وہ صبحِ سعادت مرے آقا
جب یہ دلِ شوریدہ مدینہ کو رواں ہو
ہو نام محمد لبِ کیفی‌پہ الٰہی
جب طائرِ جاں گلشنِ ہستی سے رواں ہو

عبیداللہ عبید

ہر پوسٹ الگ الگ دیجیے اورہوسکے تو اس کے لیے وہ نام / مطلع اختیار کیجیے جو اس کتاب میں ہو یا غزل کے شروع میں ہو۔

ابوسعد

اس میں اکا دُکا نعتوں یا نظموں کے تو عنوان ہیں لیکن اکثر نعتوں اور غزلوں کے عنوان نہیں ہیں

عبیداللہ عبید

مطلع دیجیے ہر غزل یا نعت کا ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔

عبیداللہ عبید

میں نے عرض کیاتھا الگ الگ تھریڈ بنائیے ہرایک کا ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔

ابوسعد

وہ آئے ہیں جہاں میں رحمۃ للعالمیں ہوکر
پناہ بیکساں بن کر،شفیع المذنبیں ہوکر
خِرد کیا کرسکے گی رفعتوں کا اُن کی اندازہ
فلک بھی رہ گیا جن کے لیے فرشِ زمیں ہوکر
انھوں نے اس طرح سے گلشنِ ہستی سنوارا ہے
کہ دنیا رہ گئی ہے رشکِ فردوسِ بریں ہوکر
ضمیرِ آدمیت میں انھیںﷺ کا نور شامل ہے
وہ سب نبیوں کے بعد آئے ہیں فخرالاولیں ہوکر
قدم بوسی کی دولت مل گئی تھی چند ذروں کو
ابھی تک وہ چمکتے ہیں ستاروں کی جبیں ہوکر
یتیم و بے نوا سمجھا تھا جن کو اہلِ نخوت نے
جہاں پر چھا گئے وہ سرورِ دنیا و دیں ہوکر
ہزارون بار اس پر عشرتِ کونین صدقے ہو
غمِ عشقِ نبی رہ جائے جس دل میں مکیں ہوکر
نگاہِ اولیں کیفی کی،جب روضہ پہ ہو یا رب
تمنا ہے کہ رہ جائے نگاہِ واپسیں ہوکر