پاکستانی

اقبال کونوبیل انعام کیوں نہ ملا ؟

علامہ اقبال اور رابندر ناتھ ٹیگور ہندوستان کے دو عظیم ہم عصر شاعر تھے جن کا کلام ایک ہی زمانے میں مشہور ہوا۔شاعری کی حدود سے نکل کر سیاسی اور سماجی میدان میں بھی دونوں شخصیات بیسویں صدی کے اوائل میں ایک ساتھ نمودار ہوئیں لیکن یہ امر دلچسپی سے خالی نہیں کہ عمر بھر دونوں کی ملاقات کبھی نہیں ہوئی۔
علامہ اقبال کے مداحوں کو اس بات کا ہمیشہ قلق رہا ہے کہ ہندوستان کے اوّلین نوبیل انعام کا اعزاز اقبال کی بجائے ٹیگور کو حاصل ہوا۔ شاید اس ’زیادتی‘ کی تلافی ہو جاتی اگر بعد کے برسوں میں اقبال کو بھی اس انعام کا مستحق قرار دے دیا جاتا لیکن 1913 سے 1938 تک کے 25 برسوں میں ایک بار بھی نوبیل کمیٹی کی توجہ اقبال پر مرکوز نہ ہو سکی۔
چونکہ نوبیل کمیٹی کی تمام دستاویزات اور خط و کتابت پر پچاس برس تک اِخفاء کی پابندی رہتی ہے اس لیے سن ساٹھ کے عشرے تک یہ محض ایک راز تھا اور اس پر ہر طرح کی چہ می گوئیاں ہوتی تھیں۔اسےایک سوچی سمجھی سازش بھی قرار دیا جاتا تھا ۔علامہ اقبال کو نوبیل پرائیز سے کیوں محروم رکھا گیا تھا۔
1963 میں پرانے دستاویزات کے سامنے آنے پر کھُلا کہ کمیٹی نے کوئی سازش نہیں کی تھی اور نہ ہی علامہ اقبال کی نامزدگی کا جھگڑا کبھی پیدا ہوا تھا۔ لیکن اگر بنگال کے شاعر رابندر ناتھ کا نام کمیٹی کے سامنے پیش کیا جا سکتا ہے تو اقبال کی نامزدگی میں کیا قباحت تھی؟ پرانے دستاویزات اس سلسلے میں کوئی واضح رہنمائی نہیں کرتے۔ سن 1914 کےاوائل میں تیار ہونے والی ایک رپورٹ میں نوبیل کمیٹی کے چئر مین ہیرلڈ ہئیارن نے جِن خیالات کا اظہار کیا ہے اُس سے پتہ چلتا ہے کہ یورپ میں چھڑنےوالی جنگ کی ممکنہ تباہ کاری کو دیکھتے ہوئے کمیٹی سوچ رہی تھی کہ نوبیل انعام ایسے ہاتھوں میں نہیں جانا چاہیئے جو جنگ اور تباہی کے پرچارک ہوں۔
کمیٹی کو احساس تھا کہ نوبیل انعام حاصل کرنے والا ادیب راتوں رات شہرت کےآسمان پر پہنچ جاتا ہے۔ ظاہر ہے اِن تحریروں کا اثر دنیا کے سبھی باشندوں پر پڑتا ہے۔ہیرلڈ ہئیارن نے مختلف ماہرین کی آراء پیش کرنے کے بعد رپورٹ میں خیال ظاہر کیا کہ ادب کا نوبیل انعام دیتے وقت اس امر کو بطور خاص مدِّ نظر رکھنا چاہیئے کے یہ انعام کسی قوم پرستانہ مصنف کو نہ چلا جائے یعنی کسی ایسے قلم کار کو جو ایک مخصوص قوم کے ملّی جذبات کو ابھار کر دنیا پرچھا جانے کی ترغیب دے رہا ہو۔
ظاہر ہے کہ اقبال کی شاعری کا بیشتر حصّہ اسلام اور مسلمانوں کی عظمتِ رفتہ کو یاد کرنے اور اسے بحال کرنے کی شدید خواہش کا مظہر ہے۔ اقبال اپنی ملت کو اقوامِ مغرب سے بالاتر سمجھتے تھے کیونکہ اُن کے خیال میں قومِ رسولِ ہاشمی جن عناصر سے مل کر بنی ہے وہ دنیا کی کسی اور قوم میں نہیں پائے جاتے۔

اگرچہ پہلی جنگِ عظیم سے قبل بھی یورپ کے سلسلے میں اقبال کسی خوش فہمی کا شکار نہیں تھے لیکن جنگ کے بعد یورپ کے بارے میں اُن کی تلخی مزید بڑھ گئی۔

1907 کی ایک غزل میں اقبال نے کہا تھا:

دیارِ مغرب کے رہنے والو، خدا کی بستی دُکاں نہیں ہے
کھرا جسے تم سمجھ رہے ہو، وہی زرِ کم عیار ہوگا
نکل کے صحرا سے جس نے روما کی سلطنت کو اُلٹ دیا تھا
سنا ہے یہ قدسیوں سے میں نے وہ شیر پھر ہوشیار ہوگا
تمھاری تہذیب اپنے خنجر سے آپ ہی خود کُشی کرے گی
جو شاخِ نازک پہ آشیانہ بنے گا، ناپائیدار ہوگا 1914

انیس سو چودہ کی ایک رپورٹ میں نوبیل کمیٹی کے چیئرمین خیال ظاہر کرتے ہیں کہ سیاسی اتھل پتھل ایک عارضی مرحلہ ہے، ادب کو اِن وقتی مصلحتوں سے ماوراء ہوکر عالمی اور دائمی اقدار کا دامن تھامنا چاہیئے۔

کم و بیش یہی وہ خیالات تھے جن کی بنیاد پر مہاتما گاندھی کے نوبیل پرائز کا راستہ بھی عرصہ دراز تک رُکا رہا لیکن گاندھی کےکیس میں کم از کم چار مرتبہ ان کا نام کمیٹی کے سامنے آیا اور اس پر خاصی بحث بھی ہوئی بلکہ نئی تحقیق کے مطابق تو 1948 میں انھیں انعام ملنے ہی والا تھا کہ ان کی ناگہانی موت واقع ہوگئی۔

علامہ اقبال کا معاملہ البتہ مختلف ہے۔ 1913 میں ٹیگور کو انعام ملنے کے ربع صدی کے بعد تک اقبال زندہ رہے لیکن نوبیل کمیٹی نے کبھی اُن کے نام پر غور نہیں کیا۔ اقبال کی شہرت کا سورج اس وقت نصف النہار پر تھا اور یہی وہ زمانہ تھا جب اقبال کو حکومتِ برطانیہ نے ٰسر ٰکا خطاب عطا کیا تھا، اگرچہ یہاں بھی ٹیگور انہیں مات دے گئے کیونکہ ٹیگور کو سر کا خطاب سات برس پہلے 1915 ہی میں مِل گیا تھا۔

ٹیگور مادری زبان کو مقدس سجھتے تھے۔ ایک بار جب وہ اسلامیہ کالج لاہور کے طالب علموں کی دعوت پر پنجاب آئے تو طالب علموں نے ان کے استقبال کےلیے اُن کا معروف بنگالی ترانہ گانا شروع کر دیا۔ ٹیگور نے شکریہ ادا کرتے ہوئے کہا کہ مجھے زیادہ خوشی ہوگی اگر آپ پنجاب کی کوئی سوغات پیش کریں۔ چنانچہ ٹیگور کی خدمت میں ہیر وارث شاہ کےچند بند، ہیر کی روائیتی طرز میں پیش کئے گئے۔ ٹیگور مسحور ہو کر رہ گئے اور محفل کےاختتام پر بولے میں زبان تو نہیں سمجھتا لیکن جتنی دیر ہیر پڑھی جاتی رہی میں مبہوت رہا اور مجھے یوں محسوس ہوتا رہا جیسے کوئی زخمی فرشتہ فریاد کر رہا ہو۔
ٹیگور کو اقبال سے بھی یہی شکوہ تھا کہ اس نے اپنی مادری زبان کےلئے کچھ نہیں کیا۔ بقول ٹیگور اگر اقبال نے فارسی اور اُردو کی بجائے پنجابی کو اپنا ذریعہء اظہار بنایا ہوتا تو آج پنجابی ایک پُرمایہ زبان ہوتی۔

اقبال کے سلسلے میں ٹیگور کا یہ بیان ایک نوبیل انعام یافتہ شاعر کا بیان بھی تھا ---- ایک ایسے شاعر کے بارے میں جو اس اعزاز سے محروم رہا۔

یہ بیان تھا ٰسر ٰکا خطاب ٹھکرا دینے والے ایک شخص کا، اُس شخص کے بارے میں جس نے انگریزوں کے عطا کردہ اس خطاب کو عمر بھر سینت سینت کے رکھا۔

علامہ اقبال کی شعری کائنات یقیناً ٹیگور کے شعری احاطے سے بہت بڑی تھی کیونکہ شعرِ اقبال کا ایک سرا اگر بطونِ ذات میں تھا تو دوسرا وسعتِ کائنات میں تھا لیکن ٹیگور کے مقابل نوبیل انعام سے محرومی یقیناً ان کے سینے کا ایک داغ بن گئی تھی جس کی کسک انہوں نے آخری دم تک محسوس کی ہوگی۔

__________________

عبدالقدوس

مزید کا انتظار رہے گا

پاکستانی لڑکی

ہمممم۔۔۔۔۔۔

محمدخلیل

زبردست تحرریر ہے بھائی اللہ تعالٰی آپ کو خوش رکھے

ضرغام

زبردست تحرریر ہے بھائی اللہ تعالٰی آپ کو خوش رکھے ،مزید توفیقات عطا فرمائے

مسافر

بہت خوب آپ نے دل خوش کر دیا

arifkarim

نوبیل انعام ہی کو ایک اسٹینڈرڈ کیوں‌مانا جائے؟ قائد اعظم نے بھی تو پاکستان کو الگ ریاست بنانے کیلئے رات و دن محنت کی تھی۔ کبھی انکا نام یورپ کے تدریسی اداروں میں‌گونجا؟ یہاں تو ہر کوئی مہا تاما گاندھی کو جانتا ہے، جبکہ اسلام پرستوں کی کوئی جگہ نہیں! یورپی اقوام کی اسلام بضض دشمنی عیاں ہے۔ انکے انعامات ہمارے نزدیک کوئی حیثیت نہیں رکھتے جب تک یہ تہے دل سے ہمارا اور ہمارے دین کا اہترام کرنا نہ سیکھ لیں!

shafresha

لاجواب تحریر، اور سب سے بڑھ کر اس تحریر کے آخری جملے!
میری جانب سے ایک درجن بار شکریہ قبول فرمائیں۔

رضی

بھائی میرے انگریزوں کے دئے گئے تمغات سے بہتر ہے جو عزت اللہ دے اور میرے خیال میںرابندر ناتھ ٹیگور سے زیادہ دنیا اقبال کو پڑتی ہے

ھارون اعظم

نوبل انعام تو اوباما کو بھی ملا ہے، انعام سے زیادہ عزت اچھی چیز ہے۔

سام

آخری پیرے کی وضاحت کریں گےاقبال کی کسک اور مایوسی کی خبرآپکو کس نےدی

حیدر

سام بھائی نے درست کہا۔ مجھے خؤد بھی اس بات کی سمجھ نہیں آئی۔ ہو سکتا ہے کہ اقبال نے اپنئ زندگی میں اس غم کا اظہار کیا ہو (جس پر دل نہیں مانتا کہ وہ کسی اعزاز کے لیے تڑپتے ہوں گے)
مجھے اس ٹاپک کو پڑھ کر یہی سمجھ میں آیا ہے کہ اقبال اور ٹیگور ہم عصر شاعر تھے۔ ٹیگور کو نوبیل انعام مل گیا۔ جس کی وجہ سے اقبال کی مغرب دشمنی میں آضافہ ہوا۔ تاہم چونکہ انکو آخر وقت تک نوبیل انعام کے لئے نامزد نہ کیا گیا تو وہ اسکی کسک محسوس کرتے رہے۔ اگر مجھ سے اس پوسٹ کا خلاصہ کرنے میں کوئی غلطی ہوئی ہو تو مجھے معاف کر دیجیے گا۔ میں دوبارہ نظر ثانی کرنے کو تیار ہوں گا ۔ تاہم اگر یہی خلاصہ ہے تو اس بات کو تسلیم کرنے کے لیے مصنف کو چاہیے تھا کہ اقبال کی زندگی میں سے کوئی حوالے تو دیتا کہ جس میں انہوں نے یہ انعام ملنے کی خواہش کا اظہار کیا ہو۔ انہوں نے سر کا خطاب کی خؤاہش کی ہو۔یا وہ اپنے ویزیٹنگ کارڈز پر فخر سے سر اقبال لکھوایا کرتے ہوں یا اپنی کتابوں پر سر محمد اقبال کا لفظ کندہ کرواتے ہوں یا لوگوں سے توقع کرتے ہوں کہ ان کو سر اقبال کہا جائے۔ اگر اس قسم کے کوئی حؤالے بھی پیش کیے جاتے تو بات مستند بھی ہوتی۔ کہنے کو تو یہ بات بھی کہہ دی جاتی ہے کہ وہ شرابی تھے۔ کیوں بھئی؟ اس لیے کہ انکو نوبیل انعام نہیں ملا تھا۔ ہاہاہاہا۔

عارف اقبال

اک ولولہ تازہ ديا ميں نے دلوں کو
لاہور سے تا خاک بخارا و سمرقند

علامہ اقبال کی پوری کوشش مسلمانوں کو اسلام سے آگاہ کرنا اور ان کو اتفاق اوریقین کی طرف لانا
تھا ۔اس نے کسی اعزاز کے لیے کام نہیں کیا۔
تمھاری تہذیب اپنے خنجر سے آپ ہی خود کُشی کرے گی
جو شاخِِِِِِِ نازک پہ آشیانہ بنے گا، ناپائیدار ہوگا

__________________

اندازِ بیاں گرچہ بہت شوخ نہیں ہے
شاید کہ اتر جائے ترے دل میں مری بات

عدنان دانی

واہ یونس بھایی۔۔۔۔۔۔۔۔۔۔۔۔۔۔۔