عبدالقدوس

کراچی (شبانہ شفیق … اسٹاف رپورٹر) سول اسپتال کراچی میں پبلک پرائیویٹ پارٹنر شپ کے تحت میڈیکل آئی سی یو اورسینٹرل پیتھالوجی لیبارٹری قائم کی جائے گی۔دونوں منصوبے 2008ء تک مکمل کر لئے جائیں گے۔ میڈیکل آئی سی یو تقریباً 10 کروڑ اور سینٹرل پیتھالوجی لیبارٹری 7 کروڑ روپے سے تعمیر ہوگی۔ دونوں منصوبے ڈاؤ میڈکل کالج کے سابق طلبہ کی فنڈنگ سے مکمل کئے جائیں گے۔ اسپتال میں میڈیکل آئی سی یو کے قیام کا مطالبہ دیرینہ تھا، جو اسپتال کے قیام کے 110 سال بعد پورا ہوگا۔ سینٹرل پیتھالوجی لیبارٹری میں وہ تمام ٹیسٹ جو اب تک اسپتال میں نہیں ہو رہے ہیں، ہو سکیں گے۔ سول اسپتال کے میڈیکل سپرنٹنڈنٹ ڈاکٹر کلیم بٹ نے دونوں منصوبوں کے متعلق گفتگو کرتے ہوئے بتایا کہ سینٹرل پیتھالوجی لیبارٹری ڈاؤکالج 1983ء بیچ اور میڈیکل آئی سی یو ڈاؤ کالج 1982ء بیچ کے طلبہ کے تعاون سے قائم کیا جائے گا۔ انہوں نے کہا کہ اپنے مادرعلمی کا کچھ قرض اتارنے کی یہ بہترین مثال ہے۔ میڈیکل آئی سی یو سے متعلق انہوں نے کہا کہ یہ 12 بستروں پرمشتمل ہوگا۔ سول اسپتال میں میڈیکل آئی سی یوکی ضرورت ایک طویل عرصے سے محسوس کی جا رہی تھی اور حکومت سے کئی مرتبہ اس کے قیام کے لئے درخواستیں کی جاتی رہی ہیں کیونکہ یہ ایک مہنگا ترین ڈپارٹمنٹ ہوتا ہے اس کے لئے خاص مشینری اور آلات کی ضرورت ہوتی ہے۔ اس لئے اس کا قیام ایک مشکل مرحلہ ہوتا ہے تاہم اب ڈاؤکالج کے سابقہ طلبہ کے تعاون سے یہ مطالبہ پورا ہونے جا رہا ہے۔ انہوں نے بتایا کہ پرائیویٹ اسپتالوں میں میڈیکل آئی سی یو کے روزکے اخراجات 20 سے 25 ہزار کے قریب ہوتے ہیں لیکن اب سول اسپتال میں غریب اورضرورت مند مریض یہ سہولت مفت حاصل کرسکیں گے۔ میڈیکل آئی سی یو آپریشن تھیٹروں کی جگہ پر قائم ہوگا۔ سینٹرل پیتھالوجی لیبارٹری جو اپنی نوعیت کی جدید ترین لیبارٹری ہوگی وہاں مریضوں کو ان تمام ٹیسٹوں کی سہولتیں میسر ہونگی جو اب تک اسپتال میں دستیاب نہیں تھیں۔ اس لیبارٹری کے قیام سے ڈاکٹروں کو مریضوں کا فوری درست علاج کرنے میں مدد حاصل ہوگی۔ یہ لیبارٹری آپریشن تھیٹر 2 کی جگہ تعمیر کی جائے گی۔

__________________