چیتا چالباز

ایک تازہ ترین جائزے سے ظاہر ہوا ہے کہ جو بچے دن میں دو گھنٹےسے زیادہ ٹیلی ویژن دیکھتے ہیں ان کی صحت کو خطرات لاحق ہوسکتے ہیں۔ طبی ماہرین کو معلوم ہوا ہے کہ جو بچے مسلسل کئی گھنٹے ٹیلی ویژن دیکھتے ہیں یا کمپیوٹر پر گیمز کھیلتے ہیں، وہ ان بچوں کی نسبت کم صحت مند ہوتے ہیں جو ایسا نہیں کرتے۔

اس جائزے میں 11 سے 15 سال تک کے 2750 بچوں کی مجموعی صحت کا جائزہ لیا گیا جس سے معلوم ہوا کہ بچوں کےسانس لینے کے عمل کی درستگی کا براہ راست تعلق اس بات سے تھا کہ انہوں نے کتنا وقت ٹیلی ویژن یا کمپیوٹر کی سکرین کے سامنے گذارا۔

اس جائزے سے پتہ چلا کہ 13 سے 15 سال کی جن لڑکیوں نے چار گھنٹے سے زیادہ وقت ٹیلی ویژن یا کمپیوٹر کی سکرین کے سامنے گذارا، وہ اپنی ان ہم عمر لڑکیوں کی نسبت کم صحت مند تھیں جو زیادہ سے زیادہ دو گھنٹے ٹیلی ویژن یا کمپیوٹر کے سامنے رہیں۔عمومی طورپر جن لڑکیوں نے ٹیلی ویژن زیاد ہ دیکھا یا زیادہ دیرتک کمپیوٹر گیمز کھیلیں وہ ان لڑکیوں کی نسبت نمایاں طورپر کم صحت مند تھیں جنہوں نے ایسا نہیں کیا تھا۔

جائزے میں شامل لگ بھگ دو تہائی بچوں نے تسلیم کیا کہ وہ روزانہ دوگھنٹےسے زیادہ ٹیلی ویژن دیکھتے تھے۔

اس مطالعے کے دروان وقفوں وقفوں سے بچوں کو ٹی وی کے سامنے سے اٹھا کر ایک خاص وقت کے لیے بھاگنے کو کہا گیا اور ان کے سانس لینے کے عمل کا مطالعہ کیا گیا۔ پھر ان طالب علموں سےپوچھا گیا کہ وہ کتنا وقت کمپیوٹر پر گیمز کھیلنے اور اسی طرح کے دوسرے مشاغل مثلاً میوزک بجانے یا پھر ہوم ورک کرنے میں گذارتے ہیں۔

یہ مطالعاتی جائزہ یونیورسٹی آف سڈنی کے وزن کی زیادتی اور موٹاپے سے متعلق مرکز کے ڈاکٹر لوئیس ہارڈی کی قیادت میں ہوا۔ وہ کہتی ہیں کہ جائزے کے نتائج سےظاہر ہوا کہ بچوں کو سکرین کے سامنے زیادہ سے زیادہ دوگھنٹے گذارنے چاہئییں۔اگر وہ اس سے زیادہ وقت کے لیے ایسا کریں تو ان کی صحت متاثر ہوسکتی ہے۔

ڈاکٹر ہارڈی کہتی ہیں کہ زیادہ تر بچوں کے لیے ضروری ہے کہ وہ زیادہ وقت بیٹھے نہ رہیں بلکہ کھیل کود میں بھی حصہ لیں۔

ان کا کہنا تھا کہ اپنے بچوں کے کمروں سے ٹیلی ویژن اور کمپیوٹر نکال دیں اور کھانا کھاتے وقت ٹیلی ویژن بند رکھیں اور یہ اصول صرف ٹیلی ویژن ہی نہیں بلکہ ان چیزوں پر بھی لاگو کریں جن میں سکرین کا استعمال ہوتا ہے۔ بہتر تو یہ ہوگا کہ بعض اوقات بچوں کو سکرین سے کئی کئی روز تک دور رکھا جائے۔

یہ تحقیق اس کے بعد سامنے آئی ہے جب برطانیہ میں والدین کو خبردار کیا گیا تھاکہ وہ اپنے بچوں کے ساتھ اپنے لاڈ پیار میں غیر صحت مند خوراک کھانے اور کمپیوٹر گیمز کھیلنے کی اجازت دے کر ان کی جانیں خطرے میں نہ ڈالیں۔

سرکاری اعدادوشمار کے مطابق برطانیہ میں ہر چار میں سے ایک بچہ جب اسکول جانے کی عمر کو پہنچتا ہے تو وہ وزن کی زیادتی کا شکار ہوتا ہے اور ہر تین میں سے ایک جب پرائمری پاس کرتا ہے تو اس وقت وہ موٹاپے کے مرض کا شکار ہوچکا ہوتا ہے۔

ڈاکٹر ہارڈی کہتی ہیں کہ بچوں میں سکرین کے سامنے زیادہ وقت گذارنے کے نتیجے میں نہ صرف یہ کہ وہ موٹاپے کا شکار ہوجاتے ہیں یا ان کی صحت خراب ہوجاتی ہے بلکہ اس سے ان کی نشوونما کے اہم ترین وقت کے دوران ان کی ہڈیوں کی مناسب نشوونما بھی نہیں ہوپاتی۔

آسٹریلیا میں کیے جانے والے اس مطالعاتی جائزے سے جو امریکی طبی جریدے ’پری ونٹیو میڈیسن‘ میں شائع ہوا، معلوم ہوا کہ جائزے میں شامل 60 فی صد سے زیاد بچے روزانہ دو گھنٹے سے زیادہ وقت ٹیلی ویژن یا کمپیوٹرکی سکرین کے سامنے گذارا کرتے تھے۔ ان 60 فی میں چھ فی صد سے زیادہ بچے روزانہ چھ گھنٹے سے زیادہ وقت چھوٹی سکرین کے سامنے بیٹھ کر گذارتے تھے۔

جائزے سے یہ بھی پتہ چلا کہ صحت کا یہ فرق لڑکوں کی نسبت لڑکیوں میں زیادہ تھا۔

جمیل اختر