وجدان

پوری دنیا میں سالانہ 10ملین مریض کینسر سے متاثر ہوتے ہیں

دنیا میں کینسر سے ہونے والی اموات 23فیصد تک ہیں

موجودہ حالات میں ہیپاٹائٹس بی اور سی تیزی سے بڑھتا ہوا وائرس آئندہ دس سال میں پاکستان میں جگر کا کینسر متعارف کرادے گا

والنٹیئر ہیلتھ آرگنائزیشن ضلع بدین کے زیر اہتمام چھاتی کی مختلف بیماریوں کے معائنے کیلئے لگائے گئے امدادی کیمپ میںڈاکٹروں کو کینسر کے بارے میں آگاہی لیکچر

کراچی ۔ کینسر ویلفیئر سوسائٹی کے ڈاکٹر نور محمد سومرو نے کہا ہے کہ پوری دنیا میں سالانہ 10ملین مریض کینسر سے متاثر ہوتے ہیں جس میں سے 6ملین خالق حقیقی سے جاملتے ہیں ۔ اسی تناسب سے پوری دنیا میں ہونے والی اموات میں سے کینسر سے ہونے والی اموات 23فیصد تک ہیں ۔ انہوں نے کہا کہ پاکستان میں ہر آٹھویں عورت کو بریسٹ کینسر ہے جو کہ 10سال میں بڑھ کر ہر دوسری عورت تک پہنچ جائے گا۔ انہوں نے کہا کہ کینسر ایک رات میں نہیں ہوتا بلکہ اس کی 6بنیادی صورتیں ہیں جو کہ وقت پر علاج نہ کروانے کی صورت میں کینسر کی صورت اختیار کرلیتی ہیں ۔ ان خیالات کا اظہار انہوں نے والنٹیئر ہیلتھ آرگنائزیشن ضلع بدین کے زیر اہتمام یونائیٹڈ میمن جماعت اور نووارٹس فارما پاکستان کے تعاون سے خواتین میں بریسٹ کینسر اور چھاتی کی مختلف بیماریوں کے معائنے کیلئے لگائے گئے امدادی کیمپ میں کینسر کے بارے میںڈاکٹروں کو آگاہی لیکچردیتے ہوئے کیا۔ انہوں نے کہا کہ پیٹ کی تمام بیماریاں کینسر کا باعث بنتی ہیں جبکہ ماحولیاتی آلودگی ، 10سے زائد بار ایکسرے یا الٹراساؤنڈ کروانے والے افراد کے جسم میں بھی کینسر کا وائرس داخل ہوسکتا ہے۔ انہوں نے بتایا کہ خواتین میں سب سے زیادہ بریسٹ کینسر ہوتا ہے جبکہ مردوں میں گلے اور منہ کا کینسر عام ہے جو سگریٹ و شراب نوشی کی وجہ سے ہوتا ہے۔ انہوں نے کہا کہ مارکیٹ میں دستیاب ڈبوں کی خوراک میں 45سو ایسے کیمیکل ہیں جو کینسر کا سبب بننے میں مدد فراہم کرتے ہیں ۔ اگر مرغی کا تکہ بھی زیادہ پک کر کڑک ہوچکا ہو تو وہ بھی کینسر کا باعث بن سکتاہے۔ انہوں نے کہا کہ موجودہ حالات میں ہیپاٹائٹس بی اور سی تیزی سے بڑھتی ہوئی بیماریاں ہیں جو آئندہ دس سال میں پاکستان میں جگر کا کینسر متعارف کرادیں گی۔ انہوں نے اس موقع پر ورکشاپ میں موجود ای ڈی او ہیلتھ ڈاکٹر عبدالستار چنہ اور تعلقہ ناظمہ بدین فرحت بچل پڑھیار سے اپیل کی کہ وہ کینسر سے متعلق آگاہی کیلئے ہر ممکن کوشش کریں۔ انہوں نے اعلان کیا کہ وہ سول اسپتال بدین کی 5لیڈی ڈاکٹرز کو میموگرافی اور کینسر کیتشخیص کی تربیت مفت دیںگے۔ آخر میں ای ڈی او ہیلتھ نے کراچی کے ڈاکٹروں کا بدین آمد ہر شکریہ ادا کیا۔