تھی سکینہ کی صدا مجھ کو بلا لو بابا
نیند کا وقت ہے سینہ پہ سلا لو بابا
مجھ کو اس آگ سے اس خون سے‌ڈر لگتا ہے
اپنے دامن میں کہیں مجھ کو چھپا لو بابا
گر پڑی ہوں میں یہاں راہ میں ٹھوکر کھا کر
گود میں اپنی مجھے آ کے اٹھا لو بابا
مجھ کو مارے نہ طمانچے وہ ستم گر کہیں
شمر آتا ہے مجھے اس سے بچا لو بابا
قبر اصغر پہ بہت روئے تھے میں جانتی ہوں
میری حالت پہ بھی دو اشک بہا لو بابا
میرا دل گردن اصغر سے سوا زخمی ہے
دل کے یہ زخم کسی کو بھی دکھا لو بابا
اپنے چہرے پہ لگایا ہے جو خوں‌ اصغر کا
میری کانوں کا لہو بھی تو لگا لو بابا
اب نہیں دل میں زرا بھی جو محبت میری
میں بھی ہوتی ہوں بس اب تم سے خفا ،لو بابا
آج کیا ہےمرے ناز اٹھاتے ہی نہیں
اپنی روٹھی ہوئی بیٹی کو منا لو بابا
اب نہ عمو ہیں نہ بھائی ہیں جو بہلائیں مجھے
جتنا جی چاہے مجھے آج رلا لو بابا
مجھ سےناراض ہو ،بھیا سے تو ناراض نہیں
ان کو اب خیمہ میں جلنے سے بچا لو بابا
بے ردا میں بھی ہوں ،اماں بھی ہیں پھوپھیاں بھی سبھی
کیسے دیکھو گے نگاہوں کو جھکا لو بابا
میرے فریاد سے تڑپے تو تڑپ جائوں گی میں
ٹیس اٹھتی ہوئی سینہ میں دبا لو بابا
تم کو تو مقتل کے اندھیرے سے جو ڈر لگتا ہو
میرے اشکوں سے کے چراغوں کو جلا لو بابا
اب تو بننے کو ہے زنداں میں لحد بھی میری
اور کچھ روز مرے ناز اٹھا لو بابا
دل کو تڑپاتی تھی ساحر یہ سکینہ کی صدا
اپنی بیٹی کو طمانچوں سے بچا لو بابا

شاعر حضرت ساحر لکھنوی