اے دل رائیگاں اداس اداس
پھررہے ہو کہاں اداس اداس
چاند اک عمر سے سفر میں‌ہے
آسماں آسماں اداس اداس
جب بھی دیکھا ہے جھانک کردل میں
ہوگیا سب جہاں اداس اداس
زندگی کھیل ہے اداسی کا
ہم یہاں تم وہاں اداس اداس
پھرتے رہتے ہیں ہم محبت میں
مضمحل، ناتواں، اداس اداس
سوچتا ہوں کہ میرے سینے میں
جانے کیا ہے نہاں اداس اداس
کیااداسی سوا نہیں کچھ بھی
اے مرے لامکاں اداس اداس
رات بھر جاگتے ہو کیوں آخر
اس طرح میری جان اداس اداس
اک طرف غم ہیں‌اک طرف خوشیاں
اور میں درمیاں اداس اداس
سارے کردار ہیں محبت کے
داستاں داستاں اداس اداس
یہ وہی ہیں ہمارے فرحت جی
شاعر بے کراں اداس اداس
ہم سے حساس لوگ فرحت جی
رہ رہے ہیں یہاں اداس اداس

----------

اصل مراسلہ منجانب : ننھا بچہ کمال کی ہے جی واہ اے دل رائیگاں اداس اداس پھررہے ہو کہاں اداس اداس