The Great

بس گھڑی دو گھڑی کو ترا ساتھ ہو اس سے بڑھ کر سعادت نہیں چاہیے
عمر بھر کے لئے اور غم ھیں بہت، عمر بھر کی رفاقت نہیں چاہیے

ایسی گونگی محبت کا کیا فائدہ جس میں اظہار جذبات ممکن نہ ہو
جس میں سچ بھی نہ ہم کہہ سکیں ڈھنگ سے، ایسی جھوٹی مروت نہیں چاہیے

ایسے راہی کا بھی کیا سفر کیا حضر، شوق منزل تو جس کو بہت ہو مگر
ہر قدم پر بھرے سسکیاں چیخ اٹھے ، راستے کی طوالت نہیں چاہیے

جس کو جانا نہیں جس کو پرکھا نہیں اس پہ کیا اپنے دل کی گرہ کھولتے
کیسے سچ بولتے اس کی خدمت میں ہم ،جس کو حرف صداقت نہیں چاہیے

تو نے کیا سوچ کر آگ میں رکھ دیئے تیرے پاؤن کے یہ پھول جل جائیں گے
چاہیں عشق میں شدتیں بھی مگر ، یہ جنوں ایسی وحشت نہیں چاہیے

جس کو پڑھ کر سلگنے لگیں چشم و دل جس کو پا کر دھوئیں میں بکھر جائیں ہم
چاہیے تیرا خط بے طلب چاہیے ، لیکن ایسی عبارت نہیں چاہیے

ساعتیں چند گنتی کی ھیں جیب میں ، خرچ کرنا ھے ان کو بہت سوچ کر
قرض ھیں مجھ پہ اوروں کی بھی راحتیں صرف اپنی ہی راحت نہیں چاہیے