خرم شہزاد خرم

حسنِ فردا غمِ امروز سے ضَو پاۓ گا
چاند ڈوبا ہے تو سورج بھی اُبھر آۓگا
آندھیوں میں بھی فروزاں ہے چراغِ امّید
خاک ڈالے سے یہ شعلہ کہیں بجھ جاۓ گا
کو بہ کو دام بچھے ہوں کہ کڑکتی ہو کماں
طائرِ دل پرِ پرواز تو پھیلاۓ گا
توڑ کے حلقۂ شب، ڈال کے تاروں پہ کمند
آدمی عرصۂ آفاق پہ چھا جاۓ گا
ہم بھی دو چار قدم چل کے اگر بیٹھ گئے
کون پھر وقت کی رفتار کو ٹھہراۓ گا
راہ میں جس کی دیا خونِ دل و جاں ہم نے
وہ حسیں دور بھی آۓ گا، ضرور آۓ گا