محبت بھی عجب شے ہے بڑی تکلیف دیتی ہے
اسی میں لطف ہیں سارے یہی تکلیف دیتی ہے

یہی دستور ہے شاید وفاداری کی دنیا کا
جسے جی جان سے چاہو وہی تکلیف دیتی ہے

... شکایت کر رہا تھا آسماں سے ایک صحراء کل
مجھے خوابوں میں اکثر اک ندی تکلیف دیتی ہے

پلک بھر کا ملن ہوتا ہے دو انجان چہروں میں
مگر پھر عمر بھر یہ اک گھڑی تکلیف دیتی ہے

قضا کا خوف لے کر جی رہے ہیں سب زمانے میں
حقیقت میں سبھی کو زندگی تکلیف دیتی ہے

کبھی موقع بہ موقع ہو تو کوئی صبر بھی کر لے
مگر آٹھوں پہر کی بے خودی تکلیف دیتی ہے

سوا نیزے پہ جب آجاۓ گا سورج تو کیا ہوگا
ہمیں تو گرمیوں کی لُو بڑی تکلیف دیتی ہے

زرا کچے مکانوں کی طرف بھی تم نظر کر لو
جہاں بارش کی ہرتیکھی جھڑی تکلیف دیتی ہے

عداوت کے جنہوں نے ہر طرف پرچم اٹھاۓ تھے
انہیں اب دوستوں کی بے رخی تکلیف دیتی ہے

نمو ہوتے ہی جس کی باغباں حسرت سے تکتا ہے
کئی کانٹوں کو وہ تازہ کلی تکلیف دیتی ہے

بھلانے کی تگ ودو میں جلا ڈالے ہیں خط میرے
مگر اس کو اسی کی ڈائری تکلیف دیتی ہے

نظر آئے جہاں سے روشنی مصلوب آنکھوں کی
بیاضِ دل کو ایسی شاعری تکلیف دیتی ہے

جسے جی جان سے چاہو وہی تکلیف دیتی ہے

ظر آئے جہاں سے روشنی مصلوب آنکھوں کی بیاضِ دل کو ایسی شاعری تکلیف دیتی ہے