عمر گزرے گی امتحان میں کیا
داغ ہی دے گی مجھ کو دان میں کیا

مری ہر بات بے اثر ہی رہی
نَقص ہے کچھ مرے بیان میں کیا

خود کو جانا تھا جُدا زمانے سے
آگیا تھا مرے گمان میں کیا

اب تو کوئی ٹوکتا بھی نہیں
یہی ہوتا ہے خآندان میں کیا

یوں جو تکتا ہے آسمان کو تُو
کوئی رہتا ہے آسمان میں کیا

یہ مجھے چین کیوں نہیں پڑتا
ایک ہی شخص تھا جہان میں کیا

کبھی شکستوں کے دکھ اٹھائے تو اس سے پوچھوں
وہ میری مانند ٹوٹ جائے تو اس سے پوچھوں


اسے بھی کوئی ستارہ منزل سے دور کر دے
اسے بھی راستہ نظر نہ آئے تو اس سے پوچھوں


سفر میں وہ بھی کسی کڑے امتحان سے گزرے
اسے بھی یوں کوئی آزمائے تو اس سے پوچھوں


اسے محبت میں کونسا دکھ دیا ہے میں نے
کبھی نظر سے نظر ملائے تو اس سے پوچھوں


میری طرح دن چڑھے تلک وہ بھی سوئے سالک
اسے بھی شب بھر نیند نہ آئے تو اس سے پوچھوں

ہم کو سودا تھا ،سر کے مان میں تھے
پاؤں پھسلا تو آسمان میں تھے

میرے کتنے ہی نام اور ہمنام
میرے اور میرے ہی درمیان میں تھے

میرا خود پر سے اعتماد اُٹھا
کتنے وعدے میری اُٹھان میں تھے

واہ ! اُن بستیوں کے سناٹے
سب قصیدے ہماری شان میں تھے

آسمانوں میں گر پڑے یعنی
ہم زمین کی طرف اُڑان میں تھے