میں ہوں تیرا خیال ہے اور چاند رات ہے
دل درد سے نِڈھال ہے اور چاند رات ہے


آنکھوں میں چُبھ گئیں تیری یادوں کی کرچیاں
کاندھوں پہ غم کی شال ہے اور چاند رات ہے


دل توڑ کے خاموش نظاروں کا کیا ملا
شبنم کا یہ سوال ہے اور چاند رات ہے


پھر تتلیاں سی اُڑنے لگیں دشتِ خواب میں
پھر خواہشِ خیال ہے اور چاند رات ہے


کیمپس کی نہر پر ہے تیرا ہاتھ ہاتھ میں
موسم بھی لازوال ہے اور چاند رات ہے


ہر اِک کلی نے اوڑھ لیا ماتمی لِباس
ہر پھُول پُرملال ہے اور چاند رات ہے


چھلکا سا پڑ رہا ہے وصی وِحشتوں ‌کا رنگ
ہر چیز پہ زوال ہے اور چاند رات ہے

Life is a gift given to us by Allah.Death is a gift returned to Allah.